១០ឆ្នាំមកនេះ ស្ត្រីច្រើនជាងបុរស ចូលប្រឡងធ្វើអ្នកការទូត៖មន្ត្រីការទូតជាន់ខ្ពស់ជាស្ត្រីរឹពឹងថា ឆ្នាំនឹងទទួលបានអ្នកការទូតស្ត្រីមានសក្ដានុពល និងឆន្ទៈស្នេហាជាតិកាន់តែច្រើន

ក្នុងរង្វង់១០ឆ្នាំចុងក្រោយ ស្ត្រីដែលបានចូលប្រឡងប្រជែងធ្វើជាអ្នកការទូត ដើម្បីបម្រើការនៅក្រោមដំបូលក្រសួងការបរទេសកម្ពុជាគឺមានចំនួនច្រើនជាងបុរស។ សម្រាប់ឆ្នាំ២០២៥ នេះ ចំនួនស្ត្រីដែលចូលប្រឡងធ្វើជាអ្នកការទូត គឺមានចំនួន៤០៤នាក់ ក្នុងចំណោមបេក្ខជនប្រឡង៨០៣នាក់។ ការណ៍នេះ រដ្ឋលេខាធិការក្រសួងការបរទេស លោកស្រី ពេជ្រ ពុទ្ធិសាធបព៌ានាគី បង្ហាញមោទនភាពដែលមានស្ត្រីជាច្រើន ចូលប្រឡងធ្វើជាអ្នកការទូត និងរពឹងថា ឆ្នាំនេះ ក្រសួងការបរទេសនឹងទទួលបានអ្នកការទូតជាស្ត្រី ដែលមានចំណេះដឹង សក្ដានុពល នឹងមានឆន្ទៈស្នេហាជាតិកាន់តែច្រើនបន្ថែមទៀត។

ថ្លែងមកកាន់ក្រុមអ្នកសារព័ត៌មាន ក្នុងពេលរៀបចំការប្រឡងជ្រើសរើសមន្ត្រីការទូតជាន់ខ្ពស់ លោកស្រី ពេជ្រ ពុទ្ធិសាធបូព៌ានាគី ដែលជាអ្នកការទូតជានារី បង្ហាញក្ដីមោទន នឹងរំពឹងដូច្នេះ៖«ក្រសួងការបរទេស មានមោទនភាពដែរ គឺជាទូទៅគឺស្ត្រីដាក់ពាក្យប្រឡងធ្វើជាអ្នកការទូតច្រើនជាងបុរស រយៈពេលដូចជា១០ឆ្នាំចុងក្រោយនេះ  ហើយអត្រាដែលស្ត្រីប្រឡងជាប់ក្នុងរង្វង់៣០ទៅ៤០ភាគរយ។ អ៊ីចឹងបានន័យនារីឥឡូវចូលចិត្តធ្វើការងារបែបការទូត ហើយបន្តិចទៀតនេះយើងនឹងទទួលបានមន្ត្រីការទូតផ្នែកនារីដែលមានសក្ដានុពលល្អ មានចំណេះដឹង ប្រឹងប្រែងធ្វើការងារ ហើយមានទេពកុសល្យ ជាពិសេសនោះមានឆន្ទៈស្នេហាជាតិ។»។

នៅក្នុងការប្រឡងមន្ត្រីការទូតជាន់ខ្ពស់ ក្របខណ្ឌក្រសួងការបរទេស រៀបចំឡើងនៅថ្ងៃទី០៣ ខែសីហា ឆ្នាំ២០២៥ មានបេក្ខជនចូលរួមប្រកួតប្រជែងសរុប៨០៣នាក់ ក្នុងនោះនារីមានចំនួន៤០៤នាក់ ។ ក្នុងការប្រឡងនាពេលនេះ  បេក្ខជនត្រូវឆ្លងកាត់ការប្រឡងលើវិញ្ញាសាសរសេរលើកទី១ ដើម្បីជាប់បន្តទៅវគ្គសម្ភាសន៍ ជាវគ្គចុងក្រោយទើបក្លាយជាមន្ត្រីការទូតជាន់ខ្ពស់។

នៅក្នុងឆ្នាំ២០២៥នេះ បើតាមលោកស្រី ពេជ្រ ពុទ្ធិសាធបូព៌ានាគី ក្រសួងការបរទេសជ្រើសរើសមន្ត្រីការទូតជាន់ខ្ពស់លើជំនាញដូចជា មន្ត្រីការទូតជាន់ខ្ពស់ផ្នែកច្បាប់  មន្ត្រីការទូតជាន់ខ្ពស់ផ្នែកទំនាក់ទំនងអន្តរជាតិ មន្ត្រីការទូតជាន់ខ្ពស់ផ្នែកសេដ្ឋកិច្ច និងមន្ត្រីជាន់ខ្ពស់ផ្នែកភាសាបរទេស។   លោកស្រីបន្ថែមថា ការជ្រើសមន្ត្រីនាពេលនេះ គឺក្រសួងការបរទេសរើសស្របតាមជំនាញ នឹងអ្វីដែលជាតម្រូវរបស់ក្រសួងកំពុងខ្វះជំនាញពិតប្រាកដ។ ក្រោយពីជ្រើសរើសបានមន្ត្រីការទូតទាំង៤ជំនាញខាងលើ ក្រសួងនឹងបញ្ជូលទៅតាមអគ្គនាយកដ្ឋានដែលកំពុងខ្វះមន្ត្រីជំនាញទាំងនោះ​។   

ក្រសួងការបរទេសទទួលបានក្របខណ្ឌពិសេសពីសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ឱ្យជ្រើសរើសមន្ត្រីការទូតចំនួន៥០រូប សម្រាប់បំពេញាការងារនៅក្នុងក្របខណ្ឌរបស់ក្រសួង ចំណែកឆ្នាំ២០២៦ សម្ដេចធិបតី ផ្ដល់ឱ្យ៥០រូបបន្ថែមទៀត ហើយនៅឆ្នាំ២០២៧ សម្ដេចអនុញ្ញាតឱ្យជ្រើសរើសមន្ត្រីការទូតចំនួន៥០រូបបន្ថែមទៀត ដើម្បីបំពេញបន្ថែមលើសេចក្ដីត្រូវការ។ នេះបើតាមការបញ្ជាក់រដ្ឋលេខាធិការក្រសួងការបរទេសដដែល។​

អ្នកការទូតជានារីរូបនេះ ឱ្យដឹងដែរថា ក្រោយពីប្រឡងជាប់ជាស្ថាពរ បេក្ខជនទាំងអស់នឹងទទួលបានការបណ្ដុះបណ្ដាលបន្ថែមពីសំណាក់សាលាភូមិន្ទរដ្ឋបាល ដែលស្ថិតនៅក្រោមក្រសួងមុខងារសាធារណៈមួយជំហាន ហើយជំហានបន្ទាប់ក្រសួងការបរទេស នឹងបញ្ជូនបេក្ខជនមន្ត្រីការទូតជាន់ខ្ពស់ទៅសិក្សាបន្ថែមនៅក្នុងវិទ្យាស្ថានការទូត និងទំនាក់ទំនងអន្តរជាតិស្ថិតក្រោមការគ្រប់គ្រង់របស់ក្រសួងចន្លោះពី៣ខែទៅ៦ខែ ទើបអនុញ្ញាតឱ្យចូលបំពេញការងារ។

បន្ថែមពីនេះ បេក្ខជនដែលប្រឡងនៅថ្ងៃនេះ បន្ទាប់ពីបានឱកាសបម្រើការនៅក្រសួង ក៏នឹងមានឱកាសបន្ថែមទៅបំពេញការងារនៅតាមស្ថានទូតរបស់កម្ពុជាប្រចាំនៅក្រៅប្រទេសផងដែរ ប៉ុន្តែត្រូវឆ្លងកាត់ការបំពេញការងារនៅក្រោមដំបូលរបស់ក្រសួងការបរទេសចាប់ពី៣ទៅ៥ឆ្នាំជាមុនសិន ទើបក្រសួងវាយតម្លៃពីសមត្ថភាពជាក់ស្ដែង រួចនឹងបញ្ជូនទៅស្ថានទូតណាមួយនៅក្រៅប្រទេសដែលសមនឹងតម្រូវការសមត្ថភាព។ នេះបើតាមការពន្យល់របស់លោកស្រី  រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ៕

ដោយ៖ង៉ិល ណារ៉ាត់