ព័ត៌មានជាតិ

អ្នកវិភាគយល់ថាការស្ដារទំនុកចិត្តជាមួយថៃឡើងវិញពេលនេះត្រូវការពេលយូរជាងជម្លោះឆ្នាំ២០០៨

បានផុស

១០ ខែ មុន

នៅ

ថ្ងៃពុធ ១៣ សីហា ២០២៥

ដោយ

អ្នកវិភាគបានមើលឃើញថាការស្ដារទំនុកចិត្តពីកម្ពុជាចំពោះថៃឡើងវិញនៅពេលនេះគឺត្រូវការពេលវេលាដ៏យូរអង្វែងមួយ ខុសពីពេលដែលមានជម្លោះប្រដាប់អាវុធកាលពីឆ្នាំ២០០៨។ ការលើកឡើងនេះដោយមើលឃើញថាពីការកាត់ផ្ដាច់ទំនាក់ទំនងទូត ថៃបាត់បង់អំណាចទន់លើកម្ពុជា ភាពក្រឡិចក្រឡុចរបស់ថៃក្នុងជម្លោះត្រូវបានមហាជនបានដឹងឮទូលំទូលាយ ខណៈដែលកម្ពុជាកាន់តែឯករាជ្យពីថៃទាំងថាមពល និងទំនិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងវេទិកាអ្នកជំនាញរបស់កម្ពុជាថ្មីកាលពីថ្ងៃសៅរ៍ អ្នកតាមដានភូមិសាស្ត្រនយោបាយលោកបណ្ឌិត ជ័យ តិច មានប្រសាសន៍ក្នុងន័យធៀបថា សង្គ្រាមពេលនេះគឺដូចជាចានដែលបែកហើយនិងមិនងាយភ្ជាប់ឡើងវិញទេ ដោយសារបញ្ហាព្រំដែននេះកើតឡើងដោយសារបញ្ហាផ្ទៃក្នុងរបស់ថៃបានបង្វែរមកព្រំដែនកម្ពុជា និងរាលដាលដល់ពាណិជ្ជកម្ម ហើយពលរដ្ឋបានដឹងឮច្រើនពីជម្លោះនេះ។ លោកថាដែលពេលនេះប្រជាជនកម្ពុជាបានធ្វើពហិកាជាបន្តបន្ទាប់ក្នុងការឈប់ប្រើផលិតផលថៃ ខណៈដែលប្រទេសកម្ពុជាក៏កំពុងផលិតផលិតផលរបស់ខ្លួន Made in Cambodia ហើយទំនិញដែលមិនទាន់ផលិតបានកម្ពុជាបានស្វែងរកពីប្រទេសទីបីក្រៅពីថៃដើម្បីផ្គត់ផ្គង់។

លោកថា៖ «ការស្ដារទំនាក់ទំនងជាមួយថៃពេលនេះគឺជារឿងដែលវែងឆ្ងាយនិងលំបាកបើសិនជាចង់ឱ្យមានការស្ដារឡើងវិញគឺមិនដូចជា២០០៨ទេ។ ២០០៨គឺការសម្រេចបញ្ចប់នូវអរិភាពនេះគឺថៃបានបញ្ចប់នូវបញ្ហាផ្ទៃក្នុងរបស់ថៃ ទី២គឺការសម្រេចបញ្ជាក់ឡើងវិញពីការសម្រេចក្ដីរបស់ ICJ ពេលនោះដែលព្រះវិហារមកកម្ពុជានិងតំបន់ជុំវិញ»។

កាលពីថ្ងៃទី២៣ ខែកក្កដា ប្រទេសថៃបានបន្ថយកម្រិតទំនាក់ទំនងការទូតជាមួយកម្ពុជានិងឱ្យឯកអគ្គរាជទូតកម្ពុជាត្រលប់មកកម្ពុជាវិញ ជាការឆ្លើយតបកម្ពុជាក៏សម្រេចទម្លាក់កម្រិតទំនាក់ទំនងការទូតកម្ពុជាថៃឱ្យមកនៅទាបបំផុតត្រឹមលេខាទី២ និងដកមន្ត្រីផ្សេងទៀតទាំងអស់ដែលបម្រើការងារនៅស្ថានទូតកម្ពុជានៅទីក្រុងបាងកកឱ្យត្រឡប់មកប្រទេសកម្ពុជាវិញ ហើយតម្រូវឱ្យមន្ត្រីទូតថៃកែសម្រួលចេញពីកម្ពុជាដូចគ្នា។ នៅថ្ងៃបន្ទាប់គឺនៅថ្ងៃទី២៤ ខែកក្កដា ជម្លោះប្រដាប់អាវុធរវាងកម្ពុជានិងថៃបានផ្ទុះឡើង។

ប្រធានវិទ្យាសា្ថនទំនាក់ទំនងអន្តរជាតិកម្ពុជានៃរាជបណ្ឌិត្យសភាកម្ពុជាលោកបណ្ឌិត គិន ភា ថាពិបាកក្នុងការនិយាយថាពេលណាដែលកម្ពុជានិងថៃអាចទុកចិត្តគ្នាឡើងវិញណាស់ នៅពេលដែលស្ថានភាពព្រំដែនកំពុងប្រឈមមុខដាក់គ្នាដូចបច្ចុប្បន្ននេះ។ លោកមើលឃើញដំណោះស្រាយមួយចំនួនដែលអាចនាំឱ្យប្រទេសទាំងពីរអាចស្ដារទំនាក់ទំនងការទុកចិត្តគ្នាឡើងវិញបាននោះគឺការគោរពបទឈប់បាញ់ បញ្ឈប់ស្នូរកាំភ្លើង បើកព្រំដែនឡើងវិញ ប្រក្រតីកម្មនៃទំនាក់ទំនងការទូត រៀបចំយន្តការដើម្បីលើកកំពស់ទំនាក់ទំនង និងអ្វីដែលសំខាន់ជាងគេនោះគឺរៀបចំការបោះបង្គោលព្រំដែនរវាងប្រទេសទាំងពីរដោយផ្អែកលើកិច្ចព្រមព្រៀងឱ្យបានរួចរាល់។

លោកបណ្ឌិត គិន ភា៖ «រឿងដែលសំខាន់បំផុតនោះដើម្បីបញ្ជៀសនូវជម្លោះទៅអនាគតគឺការរៀបចំខ័ណ្ឌសីម៉ាឱ្យបានច្បាស់លាស់ត្រឹមត្រូវផ្អែកលើលិខិតតូបករណ៍អន្តរជាតិដែលយើងបានចុះហត្ថលេខាជាមួយគ្នាជាពិសេសគឺអនុសញ្ញាបារាំងសៀមឆ្នាំ១៩០៤-១៩០៧ MOUឆ្នាំ២០០០ MOU ឆ្នាំ២០០១។ នៅពេលដែលយើងមានព្រំដែនច្បាស់លាស់ជាមួយគ្នាខ្ញុំគិតថាអរិភាពដែលនៅសេសសល់ជាមួយគ្នាទាក់ទងប្រពៃណី ទំនៀមទម្លាប់ក្ដីខ្ញុំគិតថា វាជាការប៉ះទង្គិចស្មារតីរវាងប្រជាជន និងប្រជាជនទេតែកម្រិតរដ្ឋគឺអត់ទេ»។

ជម្លោះប្រដាប់អាវុធលើកចុងក្រោយរវាងកម្ពុជានិងថៃកើតឡើងនៅឆ្នាំ២០០៨ ដល់២០១១ បន្ទាប់ពីមានការឈ្លានពានចូលមកកាន់កាប់ប្រាសាទព្រះវិហារដោយកងទ័ពថៃ។ ទោះជាយ៉ាងណាជម្លោះព្រំដែននៅពេលនោះមិនបានធ្វើឱ្យប៉ះពាល់ដល់ការទូត និងពាណិជ្ជកម្មប្រទេសទាំងពីរនោះទេ ពោលគឺប្រទេសទាំងពីររក្សាមន្ត្រីការទូត និងបើកព្រំដែន ដោះដូរទំនិញជាមួយគ្នាជាធម្មតា។

ជាការកត់សម្គាល់បន្ទាប់ពីមានការប៉ះទង្គិចប្រដាប់អាវុធនៅពេលនោះនិងមានការសម្របសម្រួលការទូត មេដឹកនាំប្រទេសទាំងពីរពេលនោះក៏បានជួបគ្នាទាត់បាល់មិត្តភាពមួយនៅពហុកីឡដ្ឋានជាតិអូឡាំពិកថ្ងៃទី២៤ ខែកញ្ញា ឆ្នាំ២០១១ ជាសញ្ញាប្រាប់ថារឿងអាក្រក់កន្លងមករវាងប្រទេសទាំងពីរបានបញ្ចប់ហើយ។ ហើយនៅខែវិច្ឆិកា ឆ្នាំ២០១៣ ក្រោយពីតុលាការយុត្តិធម៌អន្តរជាតិបានកាត់ក្ដីឱ្យកម្ពុជាឈ្នះលើជម្លោះនោះ ស្ថានភាពទំនាក់ទំនងនិងទំនុកចិត្តរវាងប្រទេសទាំងពីរបានស្ដារទៅរកភាពប្រក្រតីវិញផងដែរ៕

អត្ថបទដោយ ហ៊ុន សិរីវឌ្ឍន៍

Related Topics:ជម្លោះព្រំដែនកម្ពុជា-ថៃ

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា