តម្លៃប្រេងអន្តរជាតិបន្តធ្លាក់ចុះ ខណៈវិនិយោគិន​រង​ចាំមើលជំនួប OPEC+

តម្លៃប្រេងអន្តរជាតិ​បន្តធ្លាក់ចុះ ៣ ថ្ងៃជាប់ៗគ្នាលើទីផ្សារអាស៊ីនាព្រឹកថ្ងៃសុក្រនេះ ដែលជាថ្ងៃបញ្ចប់ការជួញដូរប្រចាំសប្ដាហ៍ ចំពេលដែល​វិនិយោគិន​រងចាំមើលជំនួបរបស់អង្គការនៃប្រទេសនាំចេញប្រេងកាត និងសម្ព័ន្ធមិត្ត (OPEC+) ជុំវិញលទ្ធភាពដែលប្លុកនេះបង្កើនផលិតកម្មប្រេងថ្មី។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

តម្លៃប្រេងឆៅនាពេលអនាគត ម៉ាក​ Brent បានធ្លាក់ចុះ ២៣ សេន ឬ ០,៣ ភាគរយ ​មកនៅត្រឹម ៦៦,៧៧ ដុល្លារ/បារ៉ែល ខណៈ​ប្រេងឆៅអាមេរិក ម៉ាក​ West Texas Intermediate (WTI) វិញ បានធ្លាក់ចុះ ១៩ សេន ឬ ០,៣ ភាគរយ មកត្រឹម ៦៣,២៩ ដុល្លារ/បារ៉ែល។

ក្នុងរយៈពេល ២ ថ្ងៃកន្លងទៅ តម្លៃប្រេងម៉ាក Brent បាន​ធ្លាក់ចុះជាង ៣ ភាគរយ រួចស្រាប់ទៅហើយ ខណៈគេរំពឹងថា វានឹង​ធ្លាក់ចុះក្នុងអត្រាប្រចាំសប្ដាហ៍។

អ្នកជំនាញពន្យល់ថា ការសម្រេចចិត្តណាមួយ​លើការដំឡើងផលិតកម្មប្រេងរបស់ OPEC+ ក្រោយ​ជំនួប​នៅថ្ងៃអាទិត្យនេះ​ នឹង​ធ្វើឱ្យ​ការផ្គត់ផ្គង់កាន់តែច្រើន ដែល​ជាហេតុឱ្យតម្លៃប្រេងធ្លាក់ចុះ ខណៈស្តុកប្រេងនៅអាមេរិក​ក៏បាន​កត់ត្រាពីកំណើនប្រេង។

យ៉ាងណាមិញ វិនិយោគិន​ក៏បន្តឃ្លាំមើលចំណាត់ការរបស់ប្រធានាធិបតីអាមេរិក លោក ដូណាល់ ត្រាំ​ លើប្រេងរុស្ស៊ីផងដែរ ខណៈលោក​បាន​ដាក់គំនាបឱ្យរុស្ស៊ីបញ្ចប់សង្រ្គាមឈ្លានពានអ៊ុយក្រែន៕