ការ​ដេញ​ថ្លៃ​គម្រោង​២ នៅ​ឃុំអូរ​កណ្ដៀរ​សែនជ័យ មាន​ភាព​មិន​ប្រក្រតី ដោយតម្លៃ​ប៉ាន់ស្មាន​ជួសជុល​រក្សា​តម្លៃ​បាន​ខ្ពស់

ដំណើរ​ការ​ដាក់​ដេញថ្លៃ​គម្រោង​ជួសជុល​ផ្លូវ​ក្រាល​គ្រួស​ធម្មជាតិ ១ខ្សែ ប្រវែង ៥ ៥០០ម៉ែត្រ និងជួសជុលស្ពានឈើ ប្រវែង ៣០ម៉ែត្រ ទទឹង មានប្រវែង ៤ម៉ែត្រ នៅ​សាលាឃុំអូរកណ្ដៀរសែនជ័យ ស្រុក​អូគ្រៀងសែនជ័យ ខេត្តក្រចេះ ហាក់​បី​ដូច​ជា​មាន​ភាព​មិន​ប្រក្រតី ខណៈ​ដែល​តម្លៃប៉ាន់ស្មានសរុប ចំនួន ៣៤៦.៣៩៩.២៣៤ រៀល (បីរយសែសិបប្រាំមួយលាន បីសែនប្រាំបួនម៉ឺនប្រាំបួនពាន់ ពីររយសាមសិបបួនរៀល) រីឯតម្លៃដេញថ្លៃធ្លាក់ចុះមកនៅត្រឹម ៣៤០.០០០.០០០ រៀលគត់។

ការដាក់ដេញថ្លៃគម្រោងទាំងពីរខាងលើ គឺធ្វើឡើងនាព្រឹកថ្ងៃទី៥ ខែកញ្ញា ឆ្នាំ២០២៥នេះ នៅរដ្ឋបាលឃុំអូរកណ្ដៀរសែនជ័យ ស្រុកអូគ្រៀងសែនជ័យ ខេត្តក្រចេះ ដែលមានក្រុមហ៊ុនជាច្រើនចូលរួមដេញថ្លៃ ប៉ុន្តែការចូលរួមដេញថ្លៃជាក់ស្ដែងមានតែ ៣ក្រុមហ៊ុនតែប៉ុណ្ណោះ។

គម្រោងដាក់ឱ្យដេញថ្លៃនាព្រឹកនោះរួមមាន គម្រោងជួសជុលផ្លូវក្រាលគ្រួសធម្មជាតិ ១ខ្សែប្រវែង ៥ ៥០០ម៉ែត្រ ទទឹង​ខ្នង​លើ ៥ម៉ែត្រ  និងជួសជុលស្ពានឈើ ប្រវែង ៣០ម៉ែត្រ ទទឹង មានប្រវែង ៤ម៉ែត្រ ដែលតម្លៃប៉ាន់ស្មានសរុប ចំនួន ៣៤៦.៣៩៩.២៣៤ រៀល (បីរយសែសិបប្រាំមួយលាន បីសែនប្រាំបួនម៉ឺនប្រាំបួនពាន់ ពីររយសាមសិបបួនរៀល) ជាកញ្ចប់ថវិកាមូលនិធិឃុំសង្កាត់។

ក្នុង​ដំណើរ​ការ​ដេញថ្លៃ គឺមានក្រុមហ៊ុន ៣ ដែលបានចូលដាក់ក្រដាសដេញថ្លៃ ខណៈ​ដែរ​ក្រុម​ហ៊ុន​ជា​ច្រើន​ទៀត គ្រាន់តែទៅចូលរួមប៉ុណ្ណោះ មិនបានដាក់ក្រដាសដេញថ្លៃចូលក្នុងប្រអប់ ហាក់បីដូចជាមានចេតនា ដើម្បី​រក្សា​តម្លៃ​នៅ​ឱ្យ​នៅខ្ពស់ដែលប្រហាក់ប្រហែល​ទៅនឹង​តម្លៃប៉ាន់ស្មាន​ដែល​គណៈកម្មការបានដាក់។

ក្រុមហ៊ុន​ដែល​ដាក់​ក្រាស់​ដេញ​ថ្លៃទាំងបីខាងលើ ត្រូវ​បានគេដាក់ការសង្ស័យថា ជា​បក្ខពួកតែមួយ​ដោយក្រុមហ៊ុនទី១ មានឈ្មោះ ទួន សុផល បានដាក់សំណើដេញថ្លៃចំនួនទឹកប្រាក់ ៣៤៥,៨៥០,០០០រៀល និងក្រុមហ៊ុនទី ២ មានឈ្មោះ ម៉ៅ សារ៉េត បានដាក់សំណើ​ដេញថ្លៃចំនួនទឹកប្រាក់ ៣៤៥,៥០០,០០០រៀល និងក្រុមហ៊ុនទី ៣ ដែលឈ្នះក្នុងការដេញថ្លៃ មានឈ្មោះ កេត សុខគាង បានដាក់សំណើដេញថ្លៃចំនួនទឹកប្រាក់ ៣៤០,០០០,០០០រៀល ក្រុមហ៊ុនទាំង ៣ គេសង្ស័យជាក្រុមហ៊ុនតែមួយ ដើម្បី​ចូល​រួម​បំពេញ​ឱ្យ​គ្រប់​ចំនួន​ទៅ​តាម​គោលការណ៍នៅនីតិវិធីក្នុងការដេញថ្លៃតែប៉ុណ្ណោះ។

នៅក្នុងការដេញថ្លៃនិងក្រៅសាលាឃុំក្រុមហ៊ុនជាច្រើនទៀត ដែលបានចូលរួមពុំបានចូលដាក់ក្រដាសដេញថ្លៃទៅក្នុងប្រអប់នោះទេ ដោយគេសង្ស័យមានការឃុបឃិតគ្នាជាមួយនឹងក្រុមហ៊ុនដែលឈ្នះការដេញថ្លៃ ដើម្បីទទួលបានថ្លៃទឹកតែ ដើម្បីរក្សាតម្លៃខ្ពស់កៀកជិតទៅនឹងតម្លៃប៉ាន់ស្មាន និងដើម្បីរក្សាប្រាក់របស់រដ្ឋយកមកចែកគ្នាចាយទៅតាមក្រុមហ៊ុននីមួយៗដែលបាននិយាយគ្នាមុនដោយក្រុមហ៊ុនខ្លះយកចំនួន ៥លានទៅ ១០លានរៀល ក្នុងការជាថ្នូរមិនចូលរួមនេះ ផងដែរ។

ជុំវិញ​នឹង​ករណី​ខាង​លើ​នេះ កម្ពុជាថ្មី បានធ្វើការទំនាក់ទំនងទៅលោក កេត សុគាង ជាម្ចាស់ក្រុមហ៊ុនឈ្នះការដេញថ្លៃ តាមរយៈលេខទូរសព្ទ៌ +855976247236 ដើម្បីសុំការបកស្រាយផងដែរ ប៉ុន្តែទូរសព្ទ៌ហៅចូលតែគ្មានអ្នកទទួល។

ទោះជាយ៉ាងណាគេសង្កេតឃើញថា មុន​ពេល​ដល់​ម៉ោង​កំណត់ក្នុងការដេញថ្លៃ​ក្រុមហ៊ុន​ទាំងនេះ​ក្រុមហ៊ុន​ទាំងអស់​នាំគ្នា​ចរចាគ្នា ដើម្បី​ឱ្យ​ដឹង​ថា ក្រុមហ៊ុននីមួយៗ​ត្រូវ​ទទួលបានទឹកប្រាក់​ចំនួន​ប៉ុន្មាន​ដើម្បី​ការ​មិនដាក់ក្រដាសដេញថ្លៃនៃការរក្សាតម្លៃឱ្យនៅខ្ពស់នេះផងដែរ។

ប្រភពពីក្រុមហ៊ុនមួយចំនួន ដែល​បាន​ចូលរួម​ទទួល​ទឹក​តែ​នោះ​បាន​លើក​ឡើង​ថា ក្រុមហ៊ុន​ដែល​មិន​មាន​សមត្ថភាពក្នុងការចូលរួមដេញថ្លៃគឺទទួលបានទឹកតែចំនួន ១លានរៀល​ រីឯក្រុមហ៊ុន ដែលអាចមានសមត្ថភាពក្នុងការដេញថ្លៃ អាចទទួលបានទទួលបានតែចំនួន ៣ ទៅ ៦លានរៀល ដើម្បីមិនឱ្យចូលរួមដាក់ក្រដាសដេញថ្លៃនោះ៕

អត្ថបទ ៖ ប្រុញ វិធិន