ព័ត៌មានជាតិ

ជនពិការភាពនៅខេត្តកោះកុង ទទួលសេវាជួសជុលអវយវៈសិប្បនិម្មិតឥតគិតថ្លៃ

បានផុស

១០ ខែ មុន

នៅ

ថ្ងៃអង្គារ ៩ កញ្ញា ២០២៥

ដោយ

ក្រុមជនមានពិការភាពនៅខេត្តកោះកុង បានមកទទួលសេវាពិនិត្យ និងសេវាជួសជុលអវយវៈសិប្បនិម្មិតដោយឥតគិតថ្លៃពីអង្គការអ៊ិកស៊ីដ វើលវ៉ាយដ៏ ក្រោមកិច្ចសហការជាមួយមន្ទីរពេទ្យបង្អែកខេត្តកោះកុង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាលើកទី ២ ហើយ ដែលមន្ទីរពេទ្យបង្អែកខេត្តកោះកុង សហការជាមួយអង្គការអ៊ិកស៊ីដ វើលវ៉ាយដ៏ លើយុទ្ធនាការត្រួតពិនិត្យ និងផ្តល់សេវាជួសជុលអវយវៈសិប្បនិម្មិត រណប និងឧបករណ៍ជំនួយនានាជូនដល់ពលរដ្ឋមានពិការភាពនៅក្នុងខេត្ត។

លោកវេជ្ជបណ្ឌិត ហៃ ឡៃសុន ប្រធានមន្ទីរពេទ្យខេត្តកោះកុង បានឱ្យដឹងនៅថ្ងៃទី ៩ ខែកញ្ញា ឆ្នាំ ២០២៥ ថា មន្ទីរពេទ្យមានបំណងធំមួយចង់ឃើញក្រុមជនមានពិការភាព អាចស្តារលទ្ធភាពកាយសម្បទា និងចូលរួមគ្រប់សកម្មភាពនានាក្នុងសង្គម ទើបលោកផ្តោតការយកចិត្តទុកដាក់ខ្ពស់ជួយលើកកម្ពស់ តបនឹងគោលនយោបាយរបស់រដ្ឋាភិបាល និងក្រសួងសុខាភិបាល។

លោកវេជ្ជបណ្ឌិត ហៃ ឡៃសុន បានបន្តទៀតថា មន្ទីរពេទ្យសហការយ៉ាងជិតស្និទ្ធជាមួយអង្គការដៃគូនានា ជាពិសេសអង្គការអ៊ិក បានជួយផ្សព្វផ្សាយ ប្រឹក្សាយោបល់ និងជួសជុលអវយវៈសិប្បនិម្មិតដល់ជនពិការភាពឥតគិតថ្លៃដូចថ្ងៃនេះ។

លោកវេជ្ជបណ្ឌិត ជឿជាក់ថា ភាពលំបាករបស់ជនមានពិការភាពនឹងល្អប្រសើរតាមរយៈទទួលបាននូវសម្ភារៈសិប្បនិម្មិត រណប និងឧបករណ៍ជំនួយនានាដល់ជនពិការនៅថ្ងៃនេះ សម្រាប់ជីវភាពរស់នៅប្រចាំថ្ងៃ។

លោកស្រី នេត សាមិត្ត មន្ត្រីសម្របសម្រួលអង្គការអ៊ិកស៊ីដ វើលវ៉ាយដ៏ ថ្លែងថា ឧបករណ៍ដៃជើងសិប្បនិម្មិត រទេះ និងអវយវៈសិប្បនិម្មិតផ្សេងៗ ទៀត ឈរលើបេសកកម្មភាពលើកកម្ពស់ជីវភាពជនមានពិការកាន់តែល្អប្រសើរ និងមានធ្វើសកម្មភាពក្នុងសង្គមតាមតែលទ្ធភាពអាចធ្វើទៅបាន ដោយគ្មានការរើសអើងនោះទេ។

លោកស្រី នេត សាមិត្ត បន្ថែមថា ការពិនិត្យ និងផ្តល់សេវាអវយវៈសិប្បនិម្មិតផ្សេងៗ ទៀត ធ្វើឡើងដោយឥតគិតថ្លៃ ករណីរកឃើញថា ជនមានពិការមានតម្រូវការឧបករណ៍ថ្មីនឹងស្រង់ព័ត៌មានផ្តល់ជូនតាមក្រោយនៅទីតាំងរបស់អង្គការដែលមានមូលដ្ឋាននៅខេត្តព្រះសីហនុ។

អ្នកស្រី សោម ចន្ថា ពលរដ្ឋសង្កាត់ស្មាច់មានជ័យ និងលោក ឡឹក ជួន ពលរដ្ឋនៅសង្កាត់ស្ទឹងវែង ក្រុងខេមរភូមិន្ទ លើកឡើងថា ពួកគាត់ពិការជើងពីកំណើត និងឈឺជើងដើរលែងរួច ៦ ខែ ដោយខ្វះខាតសម្ភារៈរណបទើបសុំជាឈើច្រត់ និងរទេះ ដើម្បីអាចធ្វើចលនាទៅណាមកណាបានល្អប្រសើរជាងមុន។

ពលរដ្ឋមានពិការភាពដែលមកទទួលសេវាជួសជុលអវយវៈសិប្បនិម្មិត សូមអរគុណចំពោះការយកចិត្តទុកដាក់របស់ក្រុមគ្រូពេទ្យមន្ទីរពេទ្យបង្អែកខេត្តកោះកុង និងមន្ត្រីអង្គការអ៊ិកស៊ីដ វើលវ៉ាយដ៏ ដែលសេវាប្រឹក្សាពិនិត្យ និងសេវាជួសជុលអវយវៈសិប្បនិម្មិតដល់ពួកគាត់៕

អត្ថបទ ៖ សិរីវឌ្ឍនៈ