ចំនួនអ្នកស្លាប់ក្នុងគ្រោះរញ្ជួយដីកម្រិត ៦.៩ រ៉ីចទ័រនៅប្រទេសហ្វីលីពីនកើនដល់៦០នាក់

យោងតាមការចេញផ្សាយរបស់សារព័ត៌មាន BBC នៅថ្ងៃទី០១ខែតុលា មនុស្សរហូតដល់ ៦០ នាក់បានបាត់បង់ជីវិតនៅក្នុងគ្រោះរញ្ជួយដីដ៏ខ្លាំងក្លាកម្រិត ៦.៩ រ៉ីចទ័រនៅភាគកណ្តាលប្រទេសហ្វីលីពីន ខណៈអាជ្ញាធរព្រមានចំនួនអ្នកស្លាប់អាចនឹងកើនឡើងថែមទៀត។

ចំនួនអ្នកស្លាប់ជាផ្លូវការពីគ្រោះរញ្ជួយដីកាលពីយប់មិញនៅខេត្ត Cebu ប្រទេសហ្វីលីពីន មានចំនួន២៦ នាក់ ប៉ុន្តែបើតាមនាយករងនៃការិយាល័យការពារជនស៊ីវិល (OCD) បានទទួលរបាយការណ៍អ្នកស្លាប់នៅថ្ងៃនេះរហូតដល់ ៦០ នាក់ឯណោះ ខណៈមនុស្សជាច្រើនទៀតនៅតែជាប់គ្រោមគំនបាក់បែក។ ប្រតិបត្តិការជួយសង្គ្រោះកំពុងបន្ត ខណៈដែលអាជ្ញាធរហ្វីលីពីនក៏កំពុងវាយតម្លៃទំហំការខូចខាត និងឆ្លើយតបទៅនឹងតម្រូវការរបស់អ្នករស់រានមានជីវិត។

គួរបញ្ជាក់ថាគ្រោះរញ្ជួយដីដ៏ខ្លាំងក្លាដីកម្រិត ៦,៩​រ៉ិចទ័រនេះ​ បានវាយប្រហារភាគកណ្តាលប្រទេសហ្វីលីពីន កាលពី​​យប់​ថ្ងៃអង្គារ​ទី​៣០​ខែ​កញ្ញា ដោយបានផ្ដួល​រលំផ្ទះ អគារនានា និងដាច់ចរន្តអគ្គិសនីក្នុងខេត្ត Cebu ដែលមានប្រជាជនជិតមួយលាននាក់។ ចំណុចកណ្តាលរបស់ការរញ្ជួយស្ថិតនៅចម្ងាយប្រហែល ១៩ គីឡូម៉ែត្រភាគឦសាននៃទីក្រុង Bogo ដែលជាទីក្រុងឆ្នេរសមុទ្រមួយដែលមានអ្នកស្រុកចំនួន ៩០ ០០០​នាក់។

ប្រទេសហ្វីលីពីនស្ថិតនៅលើតំបន់ប៉ាស៊ីហ្វិក «Ring of Fire» ដែលមានសកម្មភាពរញ្ជួយ​ដី និង​ការផ្ទុះភ្នំភ្លើង​ជា​ញឹកញាប់ ព្រម​ទាំង​​ខ្យល់​ព្យុះ និងព្យុះទីហ្វុងចំនួន២០​ជាមធ្យម​ជា​រៀងរាល់​​ឆ្នាំ៕

អត្ថបទ៖ ប៊ុន សុភាព