អភិបាលខេត្តកំពង់ចាម ក្រើនរំលឹកឲ្យពលរដ្ឋបង្កើនការប្រុងប្រយ័ត្ន ខណៈទឹកទន្លេមេគង្គបន្ត​ហក់​ឡើងជិតដល់កម្ពស់ប្រកាសអាសន្ន

លោក អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានក្រើនរំលឹកដល់ប្រជាពលរដ្ឋដែលរស់នៅតាមដងទន្លេ ស្ទឹង បឹង ព្រែក ឲ្យបង្កើនការប្រុងប្រយ័ត្ន ខណៈទឹកទន្លេមេគង្គកំពង់ចាម បានបន្តហក់ឡើងជិតដល់កម្ពស់ប្រកាសអាសន្ន។ លោកអភិបាលខេត្ត បានណែនាំឲ្យពលរដ្ឋត្រូវមើលថែកូនចៅ ក្មេងតូចៗកុំអោយលេងទឹក ហើយត្រូវទាក់ទងទៅអាជ្ញាធរ ឬសមត្ថកិច្ចក្នុងករណីត្រូវការអន្តរាគមន៍។

លោក អ៊ុម វិបុល ប្រធានមន្ទីរធនធានទឹក និងឧតុនិយមខេត្តកំពង់ចាម បានបញ្ជាក់ថា ចំពោះស្ថានភាពទឹកទន្លេមេគង្គខេត្តកំពង់ចាម នៅថ្ងៃទី០៣ ខែតុលា ឆ្នាំ២០២៥នេះ ទឹកទន្លេបានហក់ឡើងដល់កម្ពស់ ១៤.៤៨ម៉ែត្រ ធៀបថ្ងៃម្សិលមិញ ទឹកទន្លេឡើងកម្ពស់ ០,០៨ម៉ែត្រ។ ដោយឡែកកម្ពស់ទឹកនាពេលនេះ បើធៀបទៅឆ្នាំ២០២៤ ទឹកទន្លេមានកម្ពស់ ១២,៨០ម៉ែត្រ ខណៈដែលចំណុចប្រកាសប្រុងប្រយ័ត្នមានកម្ពស់១៥,២០ម៉ែត្រ។

តាមការប្រកាសរបស់ក្រសួងធនធានទឹក និងឧតុនិយម នៅព្រឹកថ្ងៃទី៣​ ខែតុលា ឆ្នាំ២០២៥នេះ ខេត្តកំពង់ចាម ក៏ជាខេត្តមួយក្នុអចំណោមខេត្តដទៃទៀតរបស់កម្ពុជា ក៏នឹងត្រូវរងនូវឥទ្ធិពលព្យុះទី២១ ឈ្មោះ ម៉ាតម៉ូ(Matmo) ដែលកំពុងមានឥទ្ធិពលលើរបបខ្យល់មូសុងនិរតីដែលបក់លើសមុទ្រអាដាមមែន ឈូងសមុទ្រថៃ អាងទន្លេមេគង្គ សមុទ្រចិនខាងត្បូង និងលើព្រះរាជាណាចក្រកម្ពុជា។ តែទោះយ៉ាងណា​គន្លងផ្លូវដើររបស់ព្យុះនេះ ពុំមានឥទ្ធិពលខ្លាំងមកលើព្រះរាជានាចក្រកម្ពុជានោះទេ៕