ព័ត៌មានជាតិ

ដើមខែក្រោយ ក្រុមហ៊ុនធំៗ ចំនួន ១៥០ នឹងផ្ដល់ឱកាសការងារជាង ៣ ម៉ឺនកន្លែង សម្រាប់យុវជន ក្នុងពិព័រណ៍ការងារនៅកោះពេជ្រ

បានផុស

៧ ខែ មុន

នៅ

ថ្ងៃអង្គារ ៧ តុលា ២០២៥

ដោយ

នៅដើមខែក្រោយ ខាងមុខនេះ ក្រុមហ៊ុន រោងចក្រ និងសហគ្រាសធំៗ ចំនួន ១៥០ នឹងផ្ដល់ឱកាសការងារជាង ៣ ម៉ឺនកន្លែង សម្រាប់យុវជន ក្នុងមហាព្រឹត្តិការណ៍ការងារដ៏ធំប្រចាំឆ្នាំ នៅអគារពិព័រណ៍កោះពេជ្រ។

កម្មវិធីពិព័រណ៍ការងារ និងផលិតភាពជាតិ ឆ្នាំ ២០២៥ នឹងប្រារព្ធឡើងរយៈពេល ២ ថ្ងៃ ចាប់ពីថ្ងៃទី ១-២ ខែវិច្ឆិកា ឆ្នាំ ២០២៥ នៅសាលពាណិជ្ជកម្ម និងពិព័រណ៍កោះពេជ្រ រាជធានីភ្នំពេញ។ ពិព័រណ៍ការងារ និងផលិតភាពជាតិ ឆ្នាំនេះ នឹងប្រារព្ធឡើងក្រោមប្រធានបទ «វិថីឆ្ពោះទៅរកផលិតភាព ៖ ផ្សារភ្ជាប់ជំនាញ បច្ចេកវិទ្យា និងឱកាសការងារ»។

ពិព័រណ៍ការងារ និងផលិតភាពជាតិ ឆ្នាំ ២០២៥ ត្រូវបានសហការរៀបចំឡើងដោយទីភ្នាក់ងារជាតិមុខរបរ និងការងារ នៃក្រសួងការងារ និងបណ្ដុះបណ្ដាលវិជ្ជាជីវៈ សហភាពសហព័ន្ធយុវជនកម្ពុជារាជធានីភ្នំពេញ សមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា និងទទួលបានការគាំទ្រដោយអង្គការអន្តរជាតិខាងការងារ (ILO) ទីភ្នាក់ងារសហប្រតិបត្តិការអន្តរជាតិកូរ៉េ (KOICA) មូលនិធិអភិវឌ្ឍន៍ជំនាញ សមាគមសហគ្រិនវ័យក្មេងកម្ពុជា និងវេសឡាញ អេឌ្យូខេសិន គ្រុប និងដៃគូពាក់ព័ន្ធជាច្រើនទៀត។

គោលបំណងសំខាន់ៗ នៃការរៀបចំពិព័រណ៍ការងារនាពេលនេះរួមមាន ៖ បង្កើតជាវេទិកាជំនួបដ៏ធំរវាងអ្នកស្វែងរកការងារ និយោជក និងអ្នកផ្តល់ការអប់រំបណ្ដុះបណ្ដាល ដើម្បីដាក់ពាក្យស្វែងរកការងារ ជ្រើសរើសបុគ្គលិក ផ្សព្វផ្សាយព័ត៌មានឱកាសការងារ វគ្គអប់រំបណ្ដុះបណ្ដាល និងប្រឹក្សាយោបល់អាជីព ការងារ និងវិជ្ជាជីវៈ។ បង្កើនការយល់ដឹង បណ្ដុះផ្នត់គំនិត និងផ្សព្វផ្សាយពីការបង្កើនផលិតភាពការងារ ក្នុងន័យជំរុញឲ្យអ្នកចូលរួមមើលឃើញខ្លួនឯងជាផ្នែកមួយដ៏សំខាន់ នៃកម្លាំងពលកម្មដែលកំពុងជំរុញផលិតភាព និងកំណើនសេដ្ឋកិច្ចរបស់កម្ពុជា តាមរយៈកិច្ចពិភាក្សាស្ដីពីការចែករំលែកបទពិសោធដោយវាគ្មិនមានបទពិសោធក្នុងវិស័យការងារ និងបច្ចេកវិទ្យា។ បង្កើតជាវេទិកាតភ្ជាប់បណ្ដាញទំនាក់ទំនងក្នុងចំណោម ក្រសួង ស្ថាប័ន និងក្រុមហ៊ុនដែលចូលរួម ពិព័រណ៍ការងារ និងផលិតភាពជាតិ។

ជាមួយគ្នានេះ ពិព័រណ៍ការងារថ្នាក់ជាតិ ឆ្នាំនេះ ក៏នឹងរួមបញ្ចូលនូវកិច្ចពិភាក្សា និងការប្រកួតប្រជែងនិយាយជាសាធារណៈ ដែលត្រូវបានរៀបចំឡើងយ៉ាងពិសេស ដើម្បីឆ្លុះបញ្ចាំងពីប្រធានបទ «វិថីឆ្ពោះទៅរកផលិតភាព ៖ ផ្សារភ្ជាប់ជំនាញ បច្ចេកវិទ្យា និងឱកាសការងារ» បំផុសគំនិតទាក់ទងនឹងផលិតភាពការងារ តាមរយៈការចែករំលែកចំណេះដឹង បទពិសោធល្អៗ និងគន្លឹះសំខាន់ៗ ពីសំណាក់វាគ្មិនជំនាញៗ មានបទពិសោធយូរឆ្នាំនៅក្នុងវិស័យការងារ។

យុវជន សិស្ស/និស្សិត និងអ្នកស្វែងរកការងារ កុំភ្លេចត្រៀម CV ឲ្យបានច្រើន ដើម្បីចូលរួមដាក់ពាក្យ និងសម្ភាសការងារភ្លាមៗ ជាមួយតំណាងក្រុមហ៊ុនធំៗ ជាច្រើន និងអាចចូលរួមក្នុងសិក្ខាសាលាផលិតភាពដែលមានការចែករំលែកចំណេះដឹង និងបទពិសោធល្អៗ ពីសំណាក់វាគ្មិនជំនាញជាច្រើនផងដែរ។ ព័ត៌មានបន្ថែម សូមទាក់ទងមក Call Center ១២៩៧ ឬ ០១៧ ៤៦៧ ៤២៣ / ០១៧ ៨៧១ ៨០៧៕