ក្រសួងអប់ រំយុវជន និងកីឡា និងក្រសួងប្រៃសណីយ៍និងទូរគមនាគមន៍ ចេញសេចក្តីប្រកាសដាក់ឱ្យប្រើប្រាស់វិញ្ញាបនបត្របណ្ដោះអាសន្នមធ្យមសិក្សាទុតិយភូមិ (បាក់ឌុប) សម័យប្រឡង ថ្ងៃទី០៥ ខែធ្នូ ឆ្នាំ២០២២ ដែលមាន QR Code ស្តង់ដារ ដែលអាចផ្ទៀតផ្ទាត់បានតាមរយៈ “ថ្នាលផ្ទៀងផ្ទាត់ឯកសារ verify.gov.kh”។ សេចក្តីប្រកាសនេះចេញថ្ងៃទី០២ ខែកុម្ភៈ ឆ្នាំ២០២៣។

សេចក្តីប្រកាសធ្វើឡើងដោយមានការឯកភាពពីបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងលោក ជា វ៉ាន់ដេត រដ្ឋមន្ត្រក្រសួងប្រៃសណីយ៍ និងទូរគមនាគមន៍​ និងជាប្រធានគណៈកម្មាធិការរដ្ឋាភិបាលឌីជីថល។ សេចក្តីសម្រេចដាក់ឱ្យប្រើ “វិញ្ញាបនបត្របណ្តោះអាសន្នមធ្យមសិក្សាទុតិយភូមិ សម័យប្រឡង ថ្ងៃទី០៥ ខែធ្នូ ឆ្នាំ២០២២ ដែលមាន QR Code ស្តង់ដា” ធ្វើឡើងក្នុងគោលបំណងផ្តល់ភាពងាយស្រួលដល់សិស្សយកទៅប្រើប្រាស់ និងជំរុញការធ្វើបរិវត្តកម្មឌីជីថលសេវាសាធារណៈស្របតាមគោលនយោបាយរដ្ឋាភិបាលឌីជីថលកម្ពុជាឆ្នាំ ២០២២-២០៣៥។

វិញ្ញាបនបត្របណ្តោះអាសន្នដែលមាន QR Code ស្តង់ដានេះ អាចផ្ទៀងផ្ទាត់អំពីយថាភូតភាព បូរណភាព និងសុពលភាពបានតាមរយៈ “ថ្នាលផ្ទៀងផ្ទាត់ឯកសារ verify.gov.kh”។ ចំពោះគ្រប់គ្រឹះស្ថានអប់រំសាធារណៈ និងឯកជន ព្រមទាំងសិស្សានុសិស្សអាចផ្ទៀងផ្ទាត់ និងប្រើប្រាស់វិញ្ញាបនបត្រដែលកំណត់ QR Codeនេះ តាមរយៈថ្នាល់ផ្ទៀងផ្ទាត់ឯកសារ verify.gov.kh ដោយមិនចាំបាច់តម្រូវឱ្យមានការធ្វើនីត្យានុកូលកម្មលើឯកសារថតចម្លងលើវិញ្ញាបនបត្រនេះក្នុងទម្រង់ជាក្រដាសឡើយ។

សូមជម្រាបថា សេចក្តីសម្រេចនេះធ្វើនៅថ្ងៃទី៣០ ខែមករា ឆ្នាំ២០២៣ ដែលមានទាំងអស់ ៦ប្រការ សម្រាប់ដាក់ឱ្យប្រើប្រាស់ចំពោះវិញ្ញាបនបត្របាក់បណ្តោះអាសន្នសម័យប្រឡង ថ្ងៃទី០៥ ខែធ្នូ ឆ្នាំ២០២២នេះ៕

ដោយ៖ អុន ស្រីមាន