គម្រោងវិនិយោគចំនួន ៨ តម្លៃទុនសរុប ៧៤,៣ លានដុល្លារ ត្រូវបានចុះបញ្ជីជាផ្លូវការ

នៅ​ថ្ងៃទី៣០ ខែតុលា ឆ្នាំ២០២៥ នេះ គម្រោង​វិនិយោគ​ចំនួន ៨ ដែល​មាន​តម្លៃ​ទុន​វិនិយោគ​សរុប​ប្រមាណ ៧៤,៣ លាន​ដុល្លារ​​អាមេរិក​ត្រូវ​បាន​គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា​ចុះ​បញ្ជី​ជា​ផ្លូវ​ការ​។

ការ​ចុះ​បញ្ជីគម្រោងវិនិយោគ​ដែល​មាន​លក្ខណៈសម្បត្តិគ្រប់គ្រាន់ទាំង​ ៨ គម្រោង​នេះ ត្រូវ​បាន​ធ្វើ​ឡើង​នៅ​ក្នុង​កិច្ចប្រជុំ​ច្រកចេញ-ចូលតែមួយ” លើកទី១៦ ក្នុងឆ្នាំ២០២៥ ក្រោមអធិបតីភាព លោក​ ជា វុទ្ធី អគ្គលេខាធិការ​គណៈកម្មាធិការ​វិនិយោគ​កម្ពុជា ដោយ​មានការ​អញ្ជើញចូលរួមពីសំណាក់តំណាងក្រសួង-ស្ថាប័ន និងរដ្ឋបាលរាជធានី-ខេត្តពាក់ព័ន្ធ។

គម្រោងវិនិយោគទាំង ៨ នេះ ដែលត្រូវបានចុះបញ្ជីនាពេលនេះមានទុនវិនិយោគសរុបប្រមាណ ៧៤,៣ លានដុល្លារអាម៉េរិក ដែលអាចបង្កើត​ឱកាសសការងារ​ជូនប្រជាពលរដ្ឋបានប្រមាណ ៤,៤ ពាន់កន្លែង។

គម្រោង​ទាំង ៨ នេះ នឹងវិនិយោគ​នៅ​ក្នុងវិស័យកសិ-ឧស្សាហកម្ម ចំនួន ១ គម្រោង គឺ ការ​កែច្នៃកសិផល និងផលិតចំណីអាហារពីកសិផល និង វិស័យឧស្សាហកម្មចំនួន ៧ គម្រោង ដូច​ជា​ ផលិតឧបករណ៍តេស្ត (អគ្គិសនី និងសីតុណ្ហភាព) និងឧបករណ៍រង្វាស់, ផលិតសម្ភារៈសត្វចិញ្ចឹម (ពីប្លាស្ទិក), ផលិត​សម្ភារៈ​បរិក្ខារ​ប្រើប្រាស់​ក្នុង​ផ្ទះ​បាយ​គ្រប់​ប្រភេទ, ផលិត​សម្ភារៈ​បន្ទាប់​បន្សំ​រថយន្ត និង​កប៉ាល់, ផលិតប្រដាប់ប្រដារក្មេងលេង, និងផលិតសម្ភារៈបន្ទាប់បន្សំសម្រាប់ចង្ក្រាន្ត និងទូចង្ក្រាន្ត (ពីលោហធាតុកែច្នៃ)។

គម្រោងវិនិយោគទាំង ៨ ​ខាងលើនេះ និង​បោះ​ទីតាំងនៅតាមបណ្តារាជធានី-ខេត្តសំខាន់ៗមួយចំនួនដូចជា រាជធានីភ្នំពេញ ខេត្តតាកែវ កំពង់ស្ពឺ និងកំពង់ឆ្នាំង​​៕