ប្រជាជនចិននាំគ្នាលុបចោលសំបុត្រយន្តហោះទៅជប៉ុនជិតកន្លះលាន​​​ ក្នុងបរិបទជម្លោះការទូតដ៏ក្ដៅគគុក

ចាប់តាំងពីថ្ងៃសៅរ៍មក ក្រុមហ៊ុនអាកាសចរណ៍ចិនបានកត់ត្រាពីការលុបចោលសំបុត្រយន្តហោះទៅជប៉ុន រហូតដល់ទៅ ៤៩១ ០០០ សំបុត្រ ​ឬប្រហែល ៣២% នៃការកក់ទៅជប៉ុនទាំងអស់ ​ក្រោយ​ពី​រដ្ឋាភិបាលចិន​​ចេញការ​ណែនាំប្រជាជនខ្លួនកុំឱ្យធ្វើដំណើរទៅទីនោះ ក្នុងបរិបទជម្លោះការទូតដ៏ក្ដៅគគុក។ នេះបើតាមការចុះផ្សាយរបស់កាសែត South China Morning Post ​កាលពីថ្ងៃចន្ទ ដោយស្រង់ព័ត៌មាន​ពី​​អ្នកជំនាញក្នុងវិស័យអាកាសចរណ៍។

ភាគរយនៃជើងហោះហើរដែលរងផលប៉ះពាល់ បានកើនឡើងដល់ ៨២,១៤% ​នៅថ្ងៃអាទិត្យ និង ៧៥,៦% នៅថ្ងៃចន្ទ។ នេះបើតាម​អ្នកវិភាគឯករាជ្យ លោក Li Hanming ដែល​ដកស្រង់ទិន្នន័យស្រាវជ្រាវ​ពីក្រុមហ៊ុនអាកាសចរណ៍ទាំងអស់ដែលមានមូលដ្ឋាននៅចិនដីគោក។

លោក​បាន​ថ្លែងយ៉ាងដូច្នេះថា៖ «ការលុបចោលសំបុត្រយន្តហោះ [នៅថ្ងៃអាទិត្យ] មានច្រើនជាងការកក់សំបុត្រថ្មីដល់ទៅ ២៧ ដង ដែលបង្ហាញថា កត្តាសុវត្ថិភាពក្លាយជាមូលហេតុសំខាន់បំផុតសម្រាប់ការធ្វើដំណើរ»។ លោកបន្ថែមថា ​លោកមិនដែលឃើញការលុបចោលសំបុត្រយន្តហោះក្នុងទ្រង់ទ្រាយធំបែបនេះទេ ចាប់តាំងពីដើមឆ្នាំ ២០២០ មក ពោលគឺនៅពេលវិបត្តិកូវីដ១៩ផ្ទុះឡើង។ ​

កាលពីថ្ងៃសុក្រសប្ដាហ៍មុន ​ក្រោយ​ចិនចេញការព្រមានឱ្យពលរដ្ឋខ្លួនប្រយ័ត្នពេលធ្វើដំណើរទៅជប៉ុន ​ក្រុមហ៊ុនអាកាសចរណ៍នានាបានផ្តល់ការសងប្រាក់វិញ​ទៅកាន់អ្នកដំណើរ ​ចំពោះជើងហោះហើរទៅ​ជប៉ុន។

គួររំឭកថា ភាពតានតឹងការទូតរវាងចិន​ និងជប៉ុន បាន​ផ្ទុះឡើងនៅដើមខែនេះ ក្រោយ​នាយករដ្ឋមន្រ្តីថ្មីរបស់ជប៉ុន លោកស្រី ​Sanae Takaichi ​បាន​និយាយថា ជប៉ុន​អាចដាក់ពង្រាយកងកម្លាំងយោធារបស់ខ្លួនក្នុងករណីមានជម្លោះនៅច្រកសមុទ្រតៃវ៉ាន់។ ភាពតានតឹងកើនឡើងជាបន្តបន្ទាប់ ដោយ​ប្រទេសទាំង២ បាន​ចេញការព្រមានស្ដីពីការធ្វើដំណើរដាក់គ្នាទៅវិញទៅមក។

កាលពីថ្ងៃអាទិត្យ កាសែត PLA Daily ​ដែលជាសារព័ត៌មាន​ផ្លូវការរបស់កងទ័ពរំដោះប្រជាជនចិន (PLA) បានព្រមាននៅថ្ងៃអាទិត្យថា ប្រទេសជប៉ុនប្រថុយនឹងការប្រែក្លាយប្រទេសទាំងមូលទៅជាទីលាន​សមរភូមិ ប្រសិនបើ​ហ៊៊ាន​ធ្វើអន្តរាគមន៍យោធា​ក្នុងច្រកសមុទ្រតៃវ៉ាន់។

ពាក់់ព័ន្ធនឹងបញ្ហាខាងអាកាសចរណ៍ លោក Li បាននិយាយថា ជើងហោះហើររវាងសៀងហៃ-តូក្យូ និងសៀងហៃ-អូសាកា កំពុង​រងផលប៉ះពាល់ច្រើនបំផុតដោយការលុបចោល​សំបុត្រ។ លោកបានប៉ាន់ប្រមាណថា ការខាតបង់សរុប​មាន​ចំនួនរាប់ពាន់លានយន់ ខណៈសំបុត្រដែលត្រូវបាន​លុបចោល មាន​ ៧០% ជាសំបុត្រសម្រាប់ការធ្វើដំណើរទៅមក។

អ្នកវិភាគជាន់ខ្ពស់ម្នាក់ មកពីក្រុមហ៊ុនស៊ើបការណ៍សម្ងាត់អាកាសចរណ៍អង់គ្លេស OAG លោក John Grant បាននិយាយថា ក្រុមហ៊ុនអាកាសចរណ៍ចិនទំនងជារងផលប៉ះពាល់ខ្លាំងជាងក្រុមហ៊ុនជប៉ុន​ ដោយព្រោះថា ការហោះហើរជប៉ុន-ចិន គ្របដណ្ដប់ដោយប្រតិបត្តិការរបស់ក្រុមហ៊ុនអាកាសចរណ៍ចិន។

គួរគូសបញ្ជាក់ផងដែរថា ចិនគឺជាប្រភពភ្ញៀវទេសចរកំពូលសម្រាប់ជប៉ុនក្នុងរយៈពេល ៩ ខែដើមឆ្នាំ ក្នុងចំនួនសរុបប្រមាណ ៧,៤៩ លាន​នាក់។ ​នេះបើតាមទិន្នន័យ​ពីរដ្ឋាភិបាលជប៉ុន។ អ្នកវិភាគទេសចរណ៍​បាននិយាយថា ជនជាតិចិនតែងតែទៅទស្សនាប្រទេសជប៉ុនដោយសារតែជើងហោះហើរ​ជិត ភាព​ទាក់ទាញវប្បធម៌ និង​ផលចំណេញពីការធ្លាក់ចុះនៃប្រាក់យ៉េនជប៉ុន៕