ព័ត៌មានអន្ដរជាតិ

ជម្លោះមជ្ឈិមបូព៌ាបង្កការរំខានខ្លាំងដល់វិស័យអាកាសចរណ៍សកល ដោយជើងហោះហើររាប់ពាន់ត្រូវលុបចោល

បានផុស

៤ ខែ មុន

នៅ

ថ្ងៃចន្ទ ២ មីនា ២០២៦

ដោយ

ជម្លោះមជ្ឈិមបូព៌ា ដែលផ្ទុះឡើងក្រោយអ៊ីស្រាអែល និងសហរដ្ឋអាមេរិកបើកការវាយប្រហារអ៊ីរ៉់ង់ កំពុងបង្កផលប៉ះពាល់ដល់អាកាសចរណ៍អន្តរជាតិ ដោយជើងហោះហើររាប់ពាន់តភ្ជាប់តំបន់ពីអាស៊ី និងអឺរ៉ុប ត្រូវបានលុបចោលក្រោមកង្វល់សុវត្ថិភាព និងការបិទដែនអាកាសទូទាំងតំបន់។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតត្រឹមថ្ងៃអាទិត្យ ជម្លោះនៅតែបង្កការរំខានធ្ងន់ធ្ងរ ដែលធ្វើឱ្យអាកាសយានដ្ឋានអន្តរជាតិសំខាន់ៗនៅមជ្ឈិមបូព៌ាត្រូវបិទប្រតិបត្តិការ រួមទាំងអាកាសយានដ្ឋាននៃទីក្រុង ដូបៃ របស់អារ៉ាប់រួម ដែលជាមជ្ឈមណ្ឌលអាកាសចរណ៍ដ៏មមាញឹកបំផុតលើពិភពលោក។

ចូលដល់ថ្ងៃទី៣នៃជម្លោះ គិតត្រឹមព្រឹកថ្ងៃចន្ទ (២ មីនា) នេះ ក៏មិនទាន់មានសេចក្ដីរាយការណ៍អំពីការបើកប្រតិបត្តិការវិញដែរ ដែលវាបង្ហាញពីផលរំខាន់ដ៏ធ្ងន់ធ្ងរក្នុងវិស័យអាកាសចរណ៍អន្តរជាតិ។ ផលប៉ះពាល់នៃបញ្ហានេះ កំពុងរាលដាលឆ្ងាយហួសពីមជ្ឈិមបូព៌ា ដោយអ្នកដំណើររាប់ម៉ឺននាក់បានជាប់គាំងរហូតដល់កោះបាលី (ឥណ្ឌូណេស៊ី) កាត់ម៉ាន់ឌូ (នេប៉ាល់) ហ្វ្រែងហ្វត (អាល្លឺម៉ង់) និងហូជីមិញ (វៀតណាម)ជាដើម។

ដើម្បីជាផ្នែកមួយនៃការវាយប្រហារសងសឹករបស់ខ្លួន អ៊ីរ៉ង់បានកំណត់គោលដៅលើអាកាសយានដ្ឋានអន្តរជាតិឌូបៃ អាកាសយានដ្ឋាននៅអាប៊ូដាប៊ី និងគុយវ៉ែតជាដើម។

ទិន្នន័យនៅលើវេទិកាតាមដានជើងហោះហើរ FlightAware បង្ហាញថា ជើងហោះហើររាប់ពាន់ជើងត្រូវបានរងផលប៉ះពាល់នៅទូទាំងមជ្ឈិមបូព៌ា ខណៈទិន្នន័យរបស់ Flightradar24 បានបង្ហាញនៅថ្ងៃអាទិត្យ និងបន្តដល់ព្រឹកថ្ងៃចន្ទថា ដែនអាកាសរបស់អ៊ីរ៉ង់ អ៊ីរ៉ាក់ គុយវ៉ែត អ៊ីស្រាអែល បារ៉ែន អារ៉ាប់រួម និងកាតា នៅទទេស្អាត គ្មានយន្តហោះហើរកាត់។

Emirates ដែលជាក្រុមហ៊ុនអាកាសចរណ៍អន្តរជាតិធំជាងគេបំផុតរបស់ពិភពលោក បានប្រកាសពីការផ្អាកប្រតិបត្តិការទាំងអស់ទៅ និងមកពីទីក្រុងឌូបៃ រហូតដល់ថ្ងៃចន្ទ។ ក្រុមហ៊ុនអាកាសចរណ៍ Qatar Airways ឯណោះវិញ ដែលបានផ្អាកប្រតិបត្តិការទាំងអស់ដូចគ្នា ដោយនិយាយថា ខ្លួននឹងផ្តល់ព័ត៌មានថ្មីៗបន្ថែមទៀតនៅថ្ងៃចន្ទ។ ក្រុមហ៊ុន Lufthansa របស់អាល្លឺម៉ង់ បានបន្តផ្អាកជើងហោះហើរទៅកាន់តំបន់មជ្ឈិមបូព៌ាដល់ថ្ងៃទី ៨ ខែមីនា។

ក្រុមហ៊ុនវិភាគ Cirium បាននិយាយថា ជើងហោះហើរប្រហែល ៤ ០០០ ជើង គ្រោងចុះក្នុងតំបន់នៅថ្ងៃអាទិត្យ ប៉ុន្តែត្រូវជាប់គាំង។

ទីក្រុងឌូបៃ និងទីក្រុងដូហា គឺជាចំណុចប្រសព្វនៃការធ្វើដំណើរតាមផ្លូវអាកាសកើត-លិច ដោយតភ្ជាប់រវាងអឺរ៉ុប និងអាស៊ីក្រោយកាលវិភាគដ៏ទៀតទាត់។ ក្រោយជម្លោះផ្ទុះឡើងនៅថ្ងៃសៅរ៍ ក្រុមហ៊ុនអាកាសចរណ៍នៅទូទាំងអឺរ៉ុប អាស៊ី និងមជ្ឈិមបូព៌ាបានលុបចោល ឬប្តូរផ្លូវហោះហើរ ដើម្បីជៀសវាងដែនអាកាសបិទ ឬរឹតត្បិត ដែលធ្វើឱ្យការធ្វើដំណើរកាន់តែវែង និងបង្កើនថ្លៃប្រេងឥន្ធនៈ។

អ្នកវិភាគវិស័យអាកាសចរណ៍បានឱ្យដឹងថា តំបន់មជ្ឈិមបូព៌ា និងក្រុមហ៊ុនអាកាសចរណ៍ក្នុងតំបន់ធ្លាប់រងការរំខានដល់ការធ្វើដំណើរក្នុងរយៈពេលប៉ុន្មានឆ្នាំចុងក្រោយ ប៉ុន្តែការបិទផ្លូវអាកាសរយៈពេលយូរបែបនេះ ពោលគឺលើសពី ២៤ ម៉ោង និងការបិទមជ្ឈមណ្ឌលអាកាសចរណ៍សំខាន់ៗទាំង៣របស់តំបន់ឈូងសមុទ្រពែរ្ស គឺមិនធ្លាប់មានពីមុនមកទេ។

តំបន់ឈូងសមុទ្រពែរ្សក៏ជាចំណុចប្រសព្វដ៏សំខាន់សម្រាប់ការដឹកជញ្ជូនទំនិញតាមផ្លូវអាកាសផងដែរ ដែលដាក់សម្ពាធបន្ថែមទៀតលើផ្លូវពាណិជ្ជកម្ម បន្ថែមពីលើការរំខាននៅលើសមុទ្រ។

នាយកប្រតិបត្តិក្រុមហ៊ុនអាកាសចរណ៍នានាបាននិយាយថា ក្រុមនាវិក និងអ្នកបើកយន្តហោះឥឡូវនេះត្រូវបានជាប់គាំងខ្ចាត់ខ្ចាយពាសពេញពិភពលោក ដែលធ្វើឱ្យដំណើរការបន្តជើងហោះហើរឡើងវិញ ប្រឈមនឹងភាពស្មុគស្មាញនៅពេលដែលដែនអាកាសបើកឡើងវិញ។

លើសពីនោះ ក្រុមហ៊ុនអាកាសចរណ៍នៅជុំវិញពិភពលោក ក៏ប្រឈមមុខនឹងតម្លៃប្រេងខ្ពស់ បន្ទាប់ពីប្រេងប្រេងឆៅម៉ាក Brent បានកើនឡើងលើស ៨០ ដុល្លារ/បារ៉ែល ពេលបើកការជួញដូរនៅថ្ងៃសុក្រ ខណៈវិភាគខ្លះរំពឹងថា វាអាចកើនដល់ ១០០ ដុល្លារ/បារ៉ែល៕