​កម្ពុជា​ កំពុង​ស៊ើប​អង្កេត​ បន្ទាប់​ពីការចុះផ្សាយថា មន្ត្រី​ពាណិជ្ជកម្ម​ ទទួល​សំណូក​ពី​ក្រុមហ៊ុន​ជប៉ុន​ ១០០០ ដុល្លារ​ ជាថ្នូរនឹងការពន្លឿនឯកសារ

ក្រសួងពាណិជ្ជកម្ម​កម្ពុជា ​កំពុង​ស៊ើបអង្កេត ​បន្ទាប់ពីសារព័ត៌មានជប៉ុន The Japanese Times បាន​ចុះផ្សាយ​ពាក់ព័ន្ធនឹងក្រុមហ៊ុនជប៉ុន Fujipassc និង​បុគ្គលិក ៣ នាក់ សូកប៉ាន់មន្ត្រី​រដ្ឋាភិបាល​កម្ពុជា​ម្នាក់​ក្នុងទឹកប្រាក់​ ១០០០ ដុល្លារ ​ជាថ្នូរនឹងការពន្លឿន​នីតិវិធីចុះ​បញ្ជីកែប្រែ ក្រុមហ៊ុន​នៅ​កម្ពុជា​កាលពីឆ្នាំ ២០២១។

សារព័ត៌មានជប៉ុន The Japanese Times ​រាយការណ៍ថា ក្រុមហ៊ុនសាងសង់ជប៉ុន Fujipassc បានបង្កើតសាខានៅកម្ពុជា ដោយមានភារកិច្ចបញ្ជូនបុគ្គលិកបច្ចេកទេសសាងសង់​ពីកម្ពុជាឲ្យទៅបណ្តុះបណ្តាលនៅជប៉ុន។

នៅអំឡុងពេលមានវិបត្តិកូវីដ១៩ សាខារបស់ក្រុមហ៊ុន​ Fujipassc នៅកម្ពុជា ចាប់ផ្តើមជួប​ផលលំបាកខាង​ហិរញ្ញវត្ថុ ពេលនោះក្រុមហ៊ុនក៏រកវិធីស្រោចស្រង់ការខាតបង់ ដោយការប្តូរឯកសារផ្សេងៗ ពាក់ព័ន្ធនឹងការចុះបញ្ជីសាខារបស់ខ្លួននៅកម្ពុជា ដើម្បីដាក់លក់​​​​។

ប្រធានផ្នែកប្រតិបត្តិក្រុមហ៊ុន Fujipassc ២នាក់ បានណែនាំឲ្យអតីតទីប្រឹក្សារបស់ក្រុមហ៊ុន Fujipassc សាខានៅកម្ពុជា សូកប៉ាន់មន្ត្រីកម្ពុជាម្នាក់នៅក្រសួងពាណិជ្ជកម្ម ដើម្បីពន្លឿននីតិវិធីកែប្រែឯកសារ។

ក្រសួងពាណិជ្ជកម្ម​បានបញ្ជាក់ថា៖ «ករណីនេះ កំពុងស្ថិតក្នុងដំណើរការ ​នីតិវិធីស៊ើបអង្កេត​របស់អាជ្ញាធរ​មានសមត្ថកិច្ចជប៉ុន ខណៈកម្ពុជាក៏បានបើកការស៊ើប​អង្កេត​ផ្ទៃក្នុង កំណត់មុខសញ្ញាបុគ្គលប្រព្រឹត្តអំពើល្មើស ដើម្បីចាត់នីតិវិធីតាមផ្លូវច្បាប់ និងសហការជាមួយអង្គភាពប្រឆាំងអំពើពុករលួយតាមការចាំបាច់»។​

​ក្រសួងពាណិជ្ជកម្ម បញ្ជាក់ថា ​ការចុះបញ្ជីពាណិជ្ជកម្ម ​និងសេវាពាក់ព័ន្ធផ្សេងៗទៀត ត្រូវបានធ្វើឡើងតាមប្រព័ន្ធ​បច្ចេកវិទ្យា​ព័ត៌មាន​ ដើម្បីបង្កើនប្រសិទ្ធភាព ​សម្រួល នីតិវិធីចុះបញ្ជី​ពាណិជ្ជកម្ម​ និង​សេវាសាធារណៈពាក់ព័ន្ធ​ឱ្យបានឆាប់រហ័ស ​លើកកម្ពស់តម្លាភាព និង​លុបបំបាត់​ចំណាយក្រៅផ្លូវការ។ ​

​ក្រុមហ៊ុន សហគ្រាស ​ត្រូវបានលើកទឹកចិត្តឱ្យធ្វើការចុះបញ្ជី ​ពាណិជ្ជកម្ម និងចុះបញ្ជីរាល់​ការកែប្រែ​ផ្សេងៗ ​តាមប្រព័ន្ធបច្ចេកវិទ្យាព័ត៌មាន ​និង​អាចស្វែងរកការពិគ្រោះយោបល់​ និងជំនួយផ្នែក​បច្ចេក​ទេស-នីតិវិធីពីសេវាកម្មឯកជន ដែលទទួលបានការបណ្តុះបណ្តាល និងទទួលស្គាល់ដោយក្រសួង ដូចមានក្នុងបញ្ជីជូនភ្ជាប់៕

អត្ថបទ៖ ឡេង ដេត