របរចិញ្ចឹមពពែ និងចៀម នៅតែមានទីផ្សារ និងតម្លៃល្អ

កសិករដែលជាអ្នកចិញ្ចឹមពពែ និងចៀម នៅខេត្តកំពង់ឆ្នាំងម្នាក់​ បានឱ្យដឹងថា មុខរបរចិញ្ចឹមពពែ និងចៀម​ សព្វថ្ងៃនៅតែរក្សាបានទីផ្សារយ៉ាងល្អ គ្រាន់តែថាត្រូវរយៈពេលយូរបន្ដិច ទើបទម្រាំបានប្រមូលផលផ្គត់ផ្គង់ទៅកាន់ទីផ្សារ។

ថ្លែងប្រាប់​ កម្ពុជាថ្មី លោក យ៉ាង រ៉ាដា ជាម្ចាស់កសិដ្ឋាន វិមានសួគ៌ បានឱ្យដឹងថា សម្រាប់ពេលបច្ចុប្បន្នមុខរបរចិញ្ចឹមពពែ និងចៀម របស់លោកនៅតែអាចចាត់ទុកថាកាក់កបខ្លាំង ខណៈទីផ្សារនៅតែមានតម្រូវការច្រើន ចំណែកការចិញ្ចឹមរបស់កសិករទូទៅក៏ពុំសូវមានច្រើននៅឡើយ​។

ស្របជាមួយទីផ្សារល្អ លោក រ៉ាដា ក៏បានបញ្ជាក់ច្បាស់ដែរថា ពពែ និងចៀម វាក៏មិនងាយស្រួលចិញ្ចឹម ដូចទៅនឹងសត្វមាន់ ឬទា ត្រង់ថាត្រូវប្រើរយៈពេលចិញ្ចឹមយូរ រហូតដល់ ៦ខែ ទៅ ៨ខែ ឬអាចដល់១២ខែទើបទម្រាំអាចចាប់លក់បាន ឬអាចថាពេញខ្នាតស្ដង់ដា។

គួរឱ្យដឹងថា ទីផ្សារសាច់ពពែ និងចៀម ​នៅលើទីផ្សារក្នុងប្រទេសកម្ពុជានាពេលបច្ចុប្បន្ន សាច់ទាំង២ប្រភេទនេះ អាចលក់ចេញទៅបណ្ដាហាង និងភោគជនីយដ្ឋាន ចន្លោះពី ១២ដុល្លារ ទៅ ១៣ដុល្លារ ក្នុង១គីឡូក្រាមក៏អាស្រ័យទៅលើតម្រូវការជាក់ស្ដែងផងដែរ។ ក្រៅពីនេះ ការចិញ្ចឹមពពែ និងចៀម កសិករគ្រប់រូបក៏ត្រូវមានដីយ៉ាងហោចណាស់ ១ហិកតាឡើង ដើម្បីងាយស្រួលដល់ការចិញ្ចឹមជៀសផុតអំពីជំងឺផ្សេងៗ។ មួយវិញទៀត ការចិញ្ចឹមទៀតសោត ម្ចាស់កសិដ្ឋានក៏ត្រូវចេះផលិតចំណី​ដោយខ្លួនឯង ដូចជា៖ ការដាំស្មៅ និងការផលិតចំណីសម្រាប់ពួកវា ផងដែរ។

យ៉ាងណាមិញ ក្រៅតែអំពីការចិញ្ចឹមសត្វ លោក យ៉ាង រ៉ាដា ក៏មានមុខរបរដាំស្មៅសម្រាប់ផ្គត់ផ្គង់កសិដ្ឋានរបស់ខ្លួនផ្ទាល់ និងលក់ទៅឱ្យកសិដ្ឋានដទៃទៀតដែលត្រូវការស្មៅយកទៅឱ្យសត្វចិញ្ចឹមស៊ីផងដែរ។

កសិដ្ឋាន វិមានសួគ៌ របស់លោក យ៉ាង រ៉ាដា បានបើកដំណើរការឡើងមកតាំងពីឆ្នាំ ២០២១។ បច្ចុប្បន្នកសិដ្ឋានចិញ្ចឹមពពែ និងចៀមមួយនេះ មានទីតាំងស្ថិតនៅស្រុកកំពង់ត្រឡាច ខេត្តកំពង់ឆ្នាំង៕

អត្ថបទ ៖​ សួស​ សិត