សេដ្ឋកិច្ច

PATA៖ ការផ្គូផ្គងអាជីវកម្មទេសចរណ៍ តភ្ជាប់កម្ពុជាទៅកាន់ទីផ្សារពិភពលោក

បានផុស

១ ខែ មុន

នៅ

ថ្ងៃពុធ ២០ ឧសភា ២០២៦

ដោយ

សមាគមទេសចរណ៍អាស៊ីប៉ាស៊ីហ្វិកកម្ពុជា (PATA) នឹងបន្តបើកដំណើរការកម្មវិធីផ្គូផ្គងអាជីវកម្មទេសចរណ៍ឆ្នាំ២០២៦ ដើម្បីផ្វផ្សាយគោលដៅទេសចរណ៍កម្ពុជាទៅកាន់ពិភពលោកចាប់ពីថ្ងៃទី ២៣ ខែឧសភានេះ ក្នុងគោលបំណងដើម្បីទាក់ទាញភ្ញៀវទេចរមកទស្សនាកម្ពុជានារដូវបៃតង (Green Season) ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា មានប្រសាសាសន៍មកកាន់ «កម្ពុជាថ្មី»ថា នេះជាការរៀបចំលើកទី ៣ នៃយុទ្ធនាការយុទ្ធនាការទីផ្សារគោលដៅយុទ្ធសាស្ត្រពេញមួយឆ្នាំ ក្រោមប្រធានបទកម្ពុជាទៅកាន់ពិភពលោក។

លោកបានបញ្ជាក់ថា៖ «ខែនេះ ជាខែទី ៣ យើងអញ្ជើញភ្ញៀវចិនសុទ្ធ ដោយសារតែយើងចូលរួមជាមួយរាជរដ្ឋាភិបាល ដើម្បីផ្សព្វផ្សាយគោលនយោបាយដោយលើកលែងលើកលែងទិដ្ឋាការ (Visa) សម្រាប់ពលរដ្ឋចិន»។

កម្មវិធីផ្គូផ្គងអាជីវកម្មទេសចរណ៍ឆ្នាំ២០២៦ ត្រូវបានរចនាឡើងដើម្បីពង្រឹងជំហរប្រកួតប្រជែងរបស់កម្ពុជានៅអាស៊ាន, ធ្វើពិពិធកម្មទីផ្សារអន្តរជាតិ, ផ្តល់អំណាចដល់សហគ្រាសធុនតូចនិងមធ្យម និងប្រតិបត្តិករទេសចរណ៍ក្នុងតំបន់ និងប្រែក្លាយការចូលរួមអាជីវកម្មទៅជាភាពជាដៃគូរយៈពេលវែង។

យុទ្ធនាការលើកទី៣នេះ នឹងចាប់ផ្តើមរយៈពេល ៧ ថ្ងៃ ចាប់ពីថ្ងៃទី ២៣ ដល់ថ្ងៃទី ២៩ ខែឧសភា ២០២៦ ដោយស្វាគមន៍ដៃគូទេសចរណ៍ និងអ្នកទិញអន្តរជាតិបន្ថែមទៀត ដើម្បីស្វែងរកឱកាស សហការថ្មីៗនៅទូទាំងប្រទេសកម្ពុជា។

បើតាមលោក ធួន ស៊ីណាន បន្ថែមថា ការៀបចំ ២ លើកកន្លងមក ការចូលរួមនៅមានកម្រិត ខណៈសមាគមបានអញ្ជើញភ្នាក់ងារទេសចរណ៍ ដែលជាអ្នកបញ្ជាទិញមកពីប្រទេឥណ្ឌូនេស៊ី ម៉ាឡេស៊ី សិង្ហបុរី នេប៉ាល់ វៀតណាម ចិន ភូមា។ ទីផ្សារនៅភូមា និងវៀតណាម ចាប់ផ្ដើមដាក់លក់ផលិតផលយើងពីខែ ៧ នេះទៅ ហើយឥណ្ឌូនេស៊ីចាប់ផ្ដើមបញ្ជូនភ្ញៀវបណ្ដើរៗ ចាប់ផ្ដើមពីក្រុងព្រះសីហនុ និងបន្តមកខេត្តសៀមរាប។

បើតាមលោក ធួន ស៊ីណាន ការខិតខំប្រឹងប្រែងរបស់យើងវាបានរួមចំណែកតូចមួយក្នុងការទាក់ទាញភ្ញៀវទេសចរ ដោយអំពាវនាវឱ្យមានការចូលរួមបន្ថែមទៀតពីអ្នកប្រកបអាជីវកម្មក្នុងការផ្សព្វផ្សាយវិស័យទេសចរណ៍កម្ពុជា៕

Related Topics:ទេសចរ