សេដ្ឋកិច្ច

សម្ដេច ហ៊ុន ម៉ាណែត៖ «ក្រុមហ៊ុន សហគ្រាស បំពេញកាតព្វកិច្ចបង់ពន្ធទៅ លែងបាបហើយ»

បានផុស

១ ខែ មុន

នៅ

ថ្ងៃព្រហស្បតិ៍ ២១ ឧសភា ២០២៦

ដោយ

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅថ្ងៃទី ២១ ឧសភា ២០២៦ បានអំពាវនាវឱ្យវិស័យឯកជនចូលរួមបំពេញកាតព្វកិច្ចបង់ពន្ធជូនរដ្ឋ ដោយត្រូវធ្វើយ៉ាងណាឱ្យមានទំនុកទុកចិត្តរវាងគ្នា ទៅវិញទៅមក រវាងពន្ធដារ និងអ្នកជាប់ពន្ធ ដើម្បីប្រសិទ្ធភាពនៃការងារប្រមូលពន្ធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេច ហ៊ុន ម៉ាណែត លើកឡើងបែបនេះ បន្ទាប់ពីអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា បានលើកឡើងនៅឯវេទិកាពន្ធដារកម្ពុជា កាលពីដើមខែកុម្ភៈ ២០២៦ ដោយបានប្រើពាក្យលាងបាប ក្នុងន័យស្នើសុំឱ្យរដ្ឋពិចារណាអនុគ្រោះលើបំណុលពន្ធជំពាក់រដ្ឋកន្លងមក ដែលត្រូវបានពន្ធដាររកឃើញជាបំណុល ពន្ធរ៉ាំរ៉ៃ និងបំណុលពន្ធបច្ចុប្បន្ន និងពិចារណាលុបបំណុលពន្ធទាំងនោះចោល។

សម្ដេចធិបតី ហ៊ុន ម៉ាណែត បញ្ជាក់ថា៖ «ថ្ងៃមុនខ្ញុំឃើញអ្នកឧកញ៉ា គិត ម៉េង សុំលាងបាបអី មិនលាងអី យ៉ាងម៉េច ឯកឧត្តម គង់ វិបុលថា ខ្ញុំលាងបាបឱ្យហើយតើ ប៉ុន្តែ អ្នកខ្លះ ដូចលាងអត់អស់ អញ្ចឹងនៅពេលដែលយើងឈប់និយាយពីរឿងបាប យើងនិយាយពីកាតព្វកិច្ចយល់គ្នាទៅវិញទៅមក ពេលហ្នឹងវាស្រួល»។

សម្ដេចធិបតីបន្តថា ការយោគយល់ជាដំណាក់កាលអន្តរកាល ដល់ពេលមួយគឺគ្រប់គ្នា ទាំងអ្នកបង់ពន្ធ ទាំងមន្ត្រីពន្ធដារយល់ដូចគ្នា កាតព្វកិច្ច និងការទទួលខុសត្រូវ ការយោគយល់តិច ទៅតាមគោលការណ៍ស្មើភាពគ្នាច្រើន។

សម្ដេច ហ៊ុន ម៉ាណែត បន្ថែមថា៖ «ដើម្បីប្រសិទ្ធិភាព ពន្ធដារយើងខំប្រឹងហើយ ប៉ុន្តែមិនគ្រប់ទេ ត្រូវមានការចូលរួម ចូលរួមទី១ គឺក្រុមហ៊ុន សហគ្រាស ថ្ងៃក្រោយមិនបាច់ទៅអង្គុយសុំលាងបាប មិនលាងបាបអីទេ បំពេញកាតព្វកិច្ចទៅលែងបាបហើយ»៕

អត្ថបទ៖ ឡេង ដេត

Related Topics:ពន្ធដារ