សេដ្ឋកិច្ច

ពន្ធដារប្រមូលចំណូលបានជាង២ពាន់លានដុល្លារក្នុង៥ខែ សម្រេចបានជាង៥៣% នៃផែនការ

បានផុស

១ ខែ មុន

នៅ

ថ្ងៃអង្គារ ២ មិថុនា ២០២៦

ដោយ

អគ្គនាយកដ្ឋានពន្ធដារ ប្រមូលចំណូលបានប្រមាណ ២ ពាន់លានដុល្លារ នៅក្នុងរយៈពេល ៥ ខែ ឆ្នាំ ២០២៦ សម្រេចបាន ៥៣,២២% នៃផែនការ។ នេះបើយោងតាមរបាយការណ៍របស់អគ្គនាយកដ្ឋានពន្ធដារចេញផ្សាយនៅថ្ងៃទី ០២ ខែមិថុនា ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គនាយកដ្ឋានពន្ធដារដើរតួនាទីសំខាន់ក្នុងការប្រមូលចំណូលជូនរដ្ឋ និងរួមចំណែកជំរុញការអភិវឌ្ឍគ្រប់វិស័យ ក្នុងការគាំទ្រដល់វិស័យឯកជន ដែលជាក្បាលម៉ាស៊ីននៃកំណើនសេដ្ឋកិច្ច និងជាឆ្អឹងខ្នងនៃការអភិវឌ្ឍសង្គមជាតិ។

សម្ដេចតេជោ ហ៊ុន សែន ប្រមុខរដ្ឋស្តីទីកម្ពុជា មានប្រសាសន៍ក្នុងពេល អញ្ជើញធ្វើទស្សនកិច្ច និងពិនិត្យមើលអគារទីស្នាក់ការកណ្តាល នៃអគ្គនាយកដ្ឋានពន្ធដារនៅព្រឹកថ្ងៃទី ០២ ខែមិថុនា ២០២៦ថា៖ «អ្វីដែលយើងត្រូវការគឺចំណាយចរន្ត ហើយចំណាយចរន្តរបស់យើគឺមិនឱ្យខ្វះទេ ពីដើមបើកប្រាក់ខែវេទនាណាស់លោកព្រះ វេទនានៅត្រង់ថា អត់មានលុយហើយ អាប្រាក់ខែតិចហើយ វាអត់មានលុយបើកឱ្យគេទៀត បានជាមន្ត្រីយើងនិយាយថា ស្រុកខ្មែរ មានមួយខែ ៦០ ថ្ងៃ ៧០ ថ្ងៃ ៨០ ថ្ងៃ ៩០ ថ្ងៃ ប៉ុន្តែស្រុកខ្មែរឥឡូវ ១ ខែ មានតែ ១៥ ថ្ងៃ ព្រោះអី ១៥ ថ្ងៃបើកប្រាក់ខែម្ដង»។

សម្ដេចតេជោ ហ៊ុន សែន បានរំលឹកថា ប្រសិនបើគ្មានជំងឺកូវីដ១៩ កម្ពុជាមានលទ្ធភាពសាងសង់ហេដ្ឋារចនាសម្ព័ន្ធនានា ដោយមិនពឹងពាក់បរទេស ប៉ុន្តែកូវីដធ្វើបាបយើង ពេលនោះយើងសន្សំប្រាក់បាន ៤ ពាន់លានដុល្លារ។

សម្ដេចតេជោ ហ៊ុន សែន បន្ថែមថា៖ «បន្ទាប់ពីកូវីដធ្វើឱ្យយើងងើបឡើងវិញ មកដល់ពេលនេះ បើតាមខ្ញុំគិត យើងចំណេញប្រាក់មិនតិចជាង ១ ពាន់លានដុល្លារ តាមរយៈការយកសេះដូសេះ យើងអត់មានលុយទេ ដើម្បីកសាងអគារចាស់ៗរបស់យើង កន្លែងខ្លះយកផ្ទះប្រជាជនធ្វើក្រសួង ប៉ុន្តែដោយសារដីកន្លែងហ្នឹងត្រូវប៉ាន់ ក៏ដោះដូរកន្លែងហ្នឹងជាមួយដី ៣ ឬ៤ហិកតា»។

អ្នកជំនាញផ្នែកសេដ្ឋកិច្ចនៅរាជ្យបណ្ឌិត្យសភាកម្ពុជាយល់ឃើញថា ការប្រមូលពន្ធដើរតួនាទីសំខាន់ក្នុងការរីកចម្រើនសេដ្ឋកិច្ចជាតិ និងធានាភាពធន់នៃសេដ្ឋកិច្ច ខណៈកម្ពុជាពឹងផ្អែកសំខាន់លើការប្រមូលពន្ធ។

លោកបណ្ឌិត ហុង វណ្ណៈ អ្នកជំនាញផ្នែកសេដ្ឋកិច្ចនៅរាជ្យបណ្ឌិត្យសភា បន្ថែមថា សារពើពន្ធគឺជាគ្រឹះសេដ្ឋកិច្ចដ៏សំខាន់ ដើម្បីយកទៅប្រើប្រាស់ធានាក្នុងការចំណាយសាធារណៈ ជាពិសេសទៅលើការវិនិយោគសារធារណៈ ប្រាក់បៀវត្សរ៍ និងសេវាសង្គមផ្សេងៗ រួមទាំងការបង់ការប្រាក់ និងថ្លៃដើមកម្ចីបរទេស។

យោងតាមច្បាប់ថវិកា ឆ្នាំ២០២៦ រាជរដ្ឋាភិបាលកម្ពុជា គ្រោងប្រមូលចំណូលសារពើពន្ធឱ្យបាន ៦,៨ ពាន់លានដុល្លារ ក្នុងនោះចំណូលពន្ធដារ ៣,៨ ពាន់លានដុល្លារ និងចំណូលពន្ធគយ ៣ ពាន់លានដុល្លារ៕

អត្ថបទ៖ ឡេង ដេត