​ខេត្តកោះកុង ​រកចំណូលចូលរដ្ឋបាន​ ៤១​ លានរៀល ​ពីវិស័យធនធានរ៉ែ​

នៅក្នុង​ឆ្នាំ២០២៥ ​ខេត្តកោះកុងបានរកចំណូលជូនរដ្ឋបានប្រមាណ៤១លានរៀល ​ពីវិស័យ​ធនធានរ៉ែ ដែលជាប្រភេទអាជីវកម្មខ្សាច់ក្នុងស្រុក​ ប៉ុន្តែ​ទោះយ៉ាងណាឆមាសទី១ ​ឆ្នាំ២០២៦នេះ ប្រភព​ចំណូល​បាន​ធ្លាក់ចុះ​ដោយជម្លោះព្រំដែនកម្ពុជា-ថៃ។​

លោកស្រី ឈី វ៉ា អភិបាលខេត្តកោះកុង បានឱ្យដឹងថា យ៉ាងហោចណាស់​ ខេត្តកោះកុងបានចូលរួមចំណែកយ៉ាងសំខាន់នៅក្នុងចំណូលជាតិ ​សម្រាប់ឆ្នាំ​២០២៥ ដោយប្រមូលថវិកាជូនរដ្ឋបានចំនួន៤១លានរៀល​ដែលជាប្រភេទអាជីវកម្មខ្សាច់ក្នុងស្រុក។

លោកស្រី ឈី វ៉ា បានលើកឡើងនៅក្នុងកិច្ចប្រជុំផ្សព្វផ្សាយ ដើម្បី​លើក​កម្ពស់ការយល់ដឹង​ ស្តីពីបទដ្ឋាន​គតិយុត្ត យន្តការគ្រប់គ្រង និងបទដ្ឋានបច្ចេកទេស​សម្រាប់​ការធ្វើ​អាជីវកម្មខ្សាច់ ​ព្រោះតែបញ្ហាជម្លោះព្រំដែនកម្ពុជា-ថៃ និងជម្លោះនៅមជ្ឈឹមបូព៌ា (អាមេរិក-អ៊ីស្រាអែល និងអ៊ឺរ៉ង់) ក្នុងឆមាសទី១ ឆ្នាំនេះ ខេត្តកោះកុងទទួលចំណូលពីធនធានរ៉ែ ធ្លាក់ចុះ។

​ដោយក្រុមហ៊ុន​ និងម្ចាស់អាជីវកម្មមួយចំនួនបានផ្អាកសកម្មភាពបណ្តោះអាសន្ន និងស្នើសុំបញ្ឈប់​ការ​ធ្វើអាជីវកម្មតែម្តង ​ដោយសារប្រេងឡើងថ្លៃ ​និង​តម្រូវការផ្គត់ផ្គង់ខ្សាច់មានការថយចុះខ្លាំង និង​មួយ​ផ្នែកទៀតដោយសារកត្តាភូមិសាស្ត្រខេត្តកោះកុងហ៊ុព័ទ្ធទៅដោយតំបន់ការពារ​ និង​តំបន់​អភិ​រក្ស​អភិរក្សធនធានធម្មជាតិ ​​ដែល​មិនអាចអនុញ្ញាតឱ្យធ្វើអាជីវកម្មធនធានរ៉ែខ្សាច់បានឡើយ។​

លោកស្រី ឈី វ៉ា ​បានបន្ថែមថា ​ខេត្តកោះកុង ជាខេត្តមួយដែល​ត្រូវបាន​រាជ​រដ្ឋា​ភិបាល​ និងក្រសួងជំនាញ យកចិត្តទុកដាក់ខ្លាំងក្នុងចំណោមរាជធានីខេត្តផ្សេងទៀត ដែលបាន​រៀប​ចំនូវ​កម្មវិធីផ្សព្វផ្សាយអំពីបទដ្ឋាន​គតិយុត្ត យន្តការគ្រប់គ្រង និងបទដ្ឋានបច្ចេកទេស សម្រាប់ការ​ធ្វើ​អា​ជីវកម្មខ្សាច់​ប្រកបដោយការទទួលខុសត្រូវ និងបញ្ចៀសបានផលអវិជ្ជមានផ្សេងៗ។​

គួរកត់​សម្គាល់ថា ការគ្រប់គ្រងអាជីវកម្មខ្សាច់ឱ្យមានប្រសិទ្ធភាព មិនមែនជាកាតព្វកិច្ចរបស់រដ្ឋ តែ​ម្នាក់​ឯងនោះទេ ប៉ុន្តែជាការទទួលខុសត្រូវរួមរបស់យើងទាំងអស់គ្នា។

ការអភិវឌ្ឍត្រូវដើរទន្ទឹមគ្នា​ជាមួយ​ការអភិរក្ស ដើម្បីធានាថា ធនធានធម្មជាតិរបស់យើងនៅតែមានសម្រាប់​កូនចៅជំនាន់​ក្រោយៗ​ទៀត។

ដោយឡែក លោក អាន ពេជ្រ ហត្ថដា រដ្ឋលេខាធិការក្រសួងធនធានទឹក និងឧតុនិយម បាន​រំលេច​ថា យន្តការគ្រប់​គ្រងនិងបទដ្ឋានបច្ចេក​ទេស ​សម្រាប់ធ្វើអាជីវកម្មខ្សាច់ ចាំបាច់ប្រព្រឹត្ត​ទៅ​ប្រកប​ដោយតម្លាភាព និងគណនេយ្យស្របតាមច្បាប់កំណត់ សំដៅធានាថាការបូម និងដកហូត​ខ្សាច់ត្រូវអនុវត្ត ទៅតាមបទដ្ឋានបច្ចេក​ទេសត្រឹមត្រូវ ដើម្បីជៀសវាងការបាក់ច្រាំង និងផលប៉ះ​ពាល់​អវិជ្ជមានដល់បរិស្ថាន ព្រមទាំងចរន្តទឹក។​

បើតាមរដ្ឋលេខា​ធិការ​ក្រសួង​ធនធានទឹកដដែល អាជីវកម្មខ្សាច់គឺជាផ្នែកមួយ​នៃការអភិវឌ្ឍផ្នែក​ហេដ្ឋា​រចនាសម្ព័ន្ធ ប៉ុន្តែវាក៏ទាមទារឱ្យមានការគ្រប់គ្រងយ៉ាងម៉ត់ចត់បំផុត។

រាល់ការធ្វើអាជីវកម្ម​ទាំងអស់​ ត្រូវតែធ្វើឡើងដោយស្មារតីទទួលខុសត្រូវខ្ពស់ ការពារផលប្រយោជន៍សាធារណៈ​ និង​ធានា​បាននូវចីរភាពបរិស្ថាន ស្របតាមគោលនយោបាយរបស់រាជរដ្ឋាភិបាល ពិសេសទប់​ស្កាត់​​ការ​បូមខ្សាច់ខុសច្បាប់ ឬខុសបច្ចេកទេសផងដែរ៕​

​អត្តបទៈសិរីវឌ្ឍនៈ​​