សេដ្ឋកិច្ច

ចិនសន្យាផ្គត់ផ្គង់ប្រេង និងជីកសិកម្មដល់កម្ពុជា

បានផុស

៣៨ វិនាទី មុន

នៅ

ថ្ងៃសៅរ៍ ២៧ មិថុនា ២០២៦

ដោយ

លោក លី ឈាង នាយករដ្ឋមន្ត្រី នៃសាធារណរដ្ឋប្រជាមានិតចិន បានលើកទឹកចិត្តឱ្យអ្នកវិនិយោគចិនមកកាន់កម្ពុជា និងសន្យាជួយគាំទ្រដល់ការផ្គត់ផ្គង់ប្រេងឥន្ធនៈ និងជីកសិកម្ម ដល់កម្ពុជា។ នេះបើតាមលោក ជា ធីរិទ្ធ អ្នកនាំពាក្យ ថ្លែងក្នុងសន្និសីទសារព័ត៌មាន នៅរសៀលថ្ងៃសៅរ៍នេះ ក្រោយដំណើរទស្សនកិច្ចរបស់សម្ដេច ហ៊ុន សែន នៅចិនបានបញ្ចប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមអ្នកនាំពាក្យរូបនេះ ថ្នាក់ដឹកនាំកម្ពុជា-ចិន ជំរុញឱ្យអនុវត្តកិច្ចព្រមព្រៀងពាណិជ្ជកម្មសេរី ដែលភាគីទាំងពីរមានជាមួយគ្នាឱ្យកាន់តែសកម្ម ក្នុងគោលដៅដើម្បីលើកកម្ពស់ទំហំពាណិជ្ជកម្ម ឬទំនាក់ទំនងផ្នែកសេដ្ឋកិច្ចរវាងប្រទេសទាំងពីរឱ្យកាន់តែរីកចម្រើន។

ទំហំពាណិជ្ជកម្មទ្វេភាគីកម្ពុជា-ចិន សម្រេចបាននូវទឹកប្រាក់ជាង ៩ ពាន់លានដុល្លារ នៅក្នុងរយៈពេល ៥ ខែ ២០២៦ កើនឡើងជិត ២៣% ធៀបនឹងរយៈពេលដូចគ្នា នៅឆ្នាំ ២០២៥ ក្នុងនោះកម្ពុជានាំចេញទៅចិន មានតម្លៃជាង ៧៥៣ លានដុល្លារ កើនឡើង ១៨,៨% ចំណែកឯចិន នាំចូលមកវិញមានតម្លៃ ៨,៦៣ ពាន់លានដុល្លារ កើន ២៣,៣%។

ប្រភេទទំនិញកម្ពុជានាំចេញទៅប្រទេសចិនភាគច្រើន គឺជាផលិតផលកសិកម្ម គ្រឿងសង្ហារឹម គ្រឿងអលង្ការ និងផលិតផលវាយនភណ្ឌ។

ចំណែកទំនិញនាំចូលមកវិញដូចជា វត្ថុធាតុដើមសម្រាប់រោងចក្រ សហគ្រាស ផលិតផលប្រើប្រាស់ប្រចាំថ្ងៃ អាហារ ភេសជ្ជៈ រថយន្ត គ្រឿងម៉ាស៊ីន គ្រឿងសំណង់ គ្រឿងអគ្គិសនី អេឡិចត្រូនិក។

នៅក្នុងឆ្នាំ ២០២៥ ពាណិជ្ជកម្មទ្វេភាគីកម្ពុជា-ចិន សម្រេចបាននូវទំហំទឹកប្រាក់ ១៩,៧៣ ពាន់លានដុល្លារ ក្នុងនោះកម្ពុជានាំចេញទៅចិនមានតម្លៃ ១,៦៨ ពាន់លានដុល្លារ ធ្លាក់ចុះ ៣,៦៤% ចំណែកឯចិននាំចូលមកវិញ មានតម្លៃ ១៨ ពាន់លានដុល្លារ កើនឡើង ៣៤,២៩%៕

អត្ថបទ៖ ឡេង ដេត

Related Topics:ពាណិជ្ជកម្មកម្ពុជា-ចិន