សេដ្ឋកិច្ច

តំបន់សេដ្ឋកិច្ចពិសេសកោះកុង ចេជាង ទទួលបានទុនវិនិយោគជាង ៥០០ លានដុល្លារ

បានផុស

២៤ វិនាទី មុន

នៅ

ថ្ងៃចន្ទ ២៩ មិថុនា ២០២៦

ដោយ

តំបន់សេដ្ឋកិច្ចពិសេសកោះកុង ចេជាង បានធ្វើការអភិវឌ្ឍលើផ្ទៃដីប្រមាណ ៤៥% នៃផ្ទៃដីសរុប ដែលមានប្រព័ន្ធហេដ្ឋារចនាសម្ព័ន្ធ និងទទួលបានការវិនិយោគចំនួន ៧៦ គម្រោង ជាមួយទុនវិនិយោគប្រមាណ ៥៦៧ លានដុល្លារ នៅក្នុងអំឡុងពេលជាង២ឆ្នាំ ក្នុងនោះគម្រោងចំនួន ៤១ កំពុងសាងសង់ និងគម្រោងចំនួន ៣៥ កំពុងដំណើរការសកម្មភាព និងបានស្រូបទាញកម្លាំងពលកម្មក្នុងស្រុកសរុបជាង ៥០០០ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តំបន់សេដ្ឋកិច្ចពិសេសកោះកុង ចេជាង ជាតំបន់សេដ្ឋកិច្ចពិសេសមួយដែលមានទំហំផ្ទៃដីធំ និងមានសន្ទុះលឿនក្នុងការអភិវឌ្ឍបន្ទាប់ពីបានបង្កើតឡើងនៅឆ្នាំ២០២៤។

លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជានៅថ្ងៃទី ២៧ មិថុនា ២០២៦ បានដឹកនាំគណៈប្រតិភូបំពេញទស្សនកិច្ចនៅតំបន់សេដ្ឋកិច្ចពិសេសកោះកុង ចេជាង ក្នុងគោលបំណងដើម្បីពិនិត្យមើលពីវឌ្ឍនភាពនៃការអភិវឌ្ឍ និងការវិនិយោគនៅក្នុងតំបន់នេះ។

ដំណើរទស្សនកិច្ចនេះត្រូវបានទទួលស្វាគមន៍យ៉ាងកក់ក្តៅ និងរីករាយក្រៃលែងពីសំណាក់អ្នកអភិវឌ្ឍន៍តំបន់ វិនិយោគិន រួមទាំងមន្ត្រីដែលជាតំណាងក្រសួង-ស្ថាប័ននានា ប្រចាំនៅរដ្ឋបាលតំបន់សេដ្ឋកិច្ចពិសេសកោះកុង ចេជាង។

សកម្មភាពវិនិយោគទាំងនេះកំពុងចូលរួមចំណែកក្នុងការអភិវឌ្ឍសង្គម-សេដ្ឋកិច្ចជាតិ ដែលបាននាំមកនូវចង្កោមឧស្សាហកម្មថ្មីៗ ជាពិសេសឧស្សាហកម្មផលិតគ្រឿងបង្គំសង្ហារឹម និងផលិតផលគ្រឿងសង្ហារឹម ដែលផ្តល់ការងារ និងប្រាក់បៀវត្សសមរម្យ (មិនក្រោម៣៥០ដុល្លារក្នុងមួយខែ) ជូនប្រជាពលរដ្ឋ។

ការរីកចម្រើនលូតលាស់នៃតំបន់សេដ្ឋកិច្ចពិសេសនេះ បង្ហាញពីជំនឿទុកចិត្តលើរាជរដ្ឋាភិបាល ទោះបីក្នុងបរិការណ៍នៃភាពមិនប្រាកដប្រជានៃសេដ្ឋកិច្ចសកលក៏ការអភិវឌ្ឍតំបន់សេដ្ឋកិច្ចពិសេស និងការបណ្តាក់ទុនវិនិយោគនៅក្នុងតំបន់សេដ្ឋកិច្ចពិសេសនៅតែបោះជំហានទៅមុខឥតឈប់ឈរ៕