ឆ្នាំ២០២២ រដ្ឋាភិបាលត្រៀមជិត១ពាន់លានដុល្លារសម្រាប់ទប់ទល់ជំងឺកូវីដ-១៩

ភ្នំពេញ៖ សម្រាប់ឆ្នាំ២០២២ខាងមុខនេះ រាជរដ្ឋាភិបាលបានត្រៀមកញ្ចប់ថវិកាប្រមាណជិត១ពាន់លានដុល្លារ ដើម្បីទប់ទល់នឹងការរីករាលដាលជំងឺកូវីដ-១៩។

ថ្លែងក្នុងសិក្ខាសាលាស្តីពីការកសាងក្របខណ្ឌគោលនយោបាយម៉ាក្រូសេដ្ឋកិច្ច និងគោលនយោបាយហិរញ្ញវត្ថុសាធារណៈ សម្រាប់ការរៀបចំសេចក្តីព្រាងច្បាប់ ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ២០២២ កាលពីថ្ងៃទី១៧ ខែសីហា លោកឧបនាយករដ្ឋមន្រ្តី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា សម្រាប់ឆ្នាំក្រោយនេះ រាជរដ្ឋាភិបាលបានត្រៀមកញ្ចប់ថវិកាទប់ទល់នឹងការរីករាលដាលជំងឺកូវីដ-១៩ ប្រមាណជិត១ពាន់លានដុល្លារ ខណៈក្នុងឆ្នាំ២០២១នេះ ទំហំចំណាយអាចឈានដល់១ពាន់៤រយលានដុល្លារ ក្រោយពីផ្ទះព្រឹត្តិការណ៍២០កុម្ភៈ បន្ទាប់ពីកាលដើមគ្រាត្រូវបានប៉ាន់ប្រមានតែ៧១៩លានដុល្លារប៉ុណ្ណោះ។

យោងតាម របាយការណ៍ស្តីពីក្របខណ្ឌគោលនយោបាយម៉ាក្រូសេដ្ឋកិច្ច និងគោលនយោបាយហិរញ្ញវត្ថុសាធារណៈ សម្រាប់ការរៀបចំសេចក្តីព្រាងច្បាប់ ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ២០២២ របស់ក្រសួងសេដ្ឋកិច្ច និងហិរញ្ញវត្ថុ បានបញ្ជាក់ថា សម្រាប់ឆ្នាំក្រោយនេះ ថវិកាចំណាយនៅថ្នាក់ជាតិគ្រោងចំនួន២៧,២០ភាគរយ និងថវិកាចំណាយនៅថ្នាក់ក្រោមជាតិគ្រោងចំនួន២,៩១ភាគរយ នៃផលិតផលក្នុងស្រុកសរុប (ផ.ស.ស)។

ក្នុងនោះសម្រាប់វិស័យសង្គមកិច្ច ត្រូវបានបង្កើន ៧,០៤ភាគរយ នៃផ.ស.ស និងវិស័យសេដ្ឋកិច្ចចំនួន ៨,៥៩ នៃផ.ស.ស ដែលជាអត្រាមួយខ្ពស់ជាងគេក្នុងចំណោមវិស័យផ្សេងៗទៀត ដើម្បីគាំទ្រដល់សកម្មភាពលើកកម្ពស់សុខភាពសាធារណៈ និងឆ្លើយតបទៅនឹងការប្រយុទ្ធប្រឆាំងនឹងការរីករាលដាលនៃជំងឺកូវីដ-១៩ ព្រមទាំងជំរុញ និងលើកស្ទុយដល់ផលិតភាពនៃផ្នែកដែលជាមុខព្រួញសេដ្ឋកិច្ចមានដូចជាឧស្សាហកម្មកែច្នៃកសិកម្ម ទេសចរណ៍ការដឹកជញ្ជូន ជាដើម។

គួរបញ្ជាក់ថា ថវិកាជាតិសម្រាប់ឆ្នាំ២០២១នេះ ត្រូវបានរាជរដ្ឋាភិបាល ដាក់ក្នុងគម្រោងចំណាយសរុបជាង ៧,៩០០លានដុល្លារអាមេរិក ត្រូវជា ៤៥,៨៥ភាគរយ នៃ ផ.ស.ស សំដៅឆ្លើយតបទៅនឹងបញ្ហាប្រឈមនឹងសង្គម សេដ្ឋកិច្ច និងការពារអាយុជីវិតប្រជាជនពីការរាតត្បាតនៃជំងឺកូវីដ-១៩៕

អត្ថបទ៖ សំអឿន