តម្លៃប្រេងឥន្ធនៈនៅអង់គ្លេស ឡើងដល់កម្រិតខ្ពស់បំផុតបំបែកកំណត់ត្រា (មានវីដេអូ)

តម្លៃប្រេងឥន្ធនៈ បានឡើងដល់កម្រិតខ្ពស់បំផុតនៅទូទាំងចក្រភពអង់គ្លេស នៅក្នុងអ្វីដែលក្រុមហ៊ុន RAC ពណ៌នាថា ជា “ថ្ងៃដ៏ខ្មៅងងឹតសម្រាប់អ្នកបើកបរ”។

នៅក្នុងទិន្នន័យដែលរាយការណ៍កាលពីព្រឹកថ្ងៃចន្ទដោយ RAC/Experian Catalist តម្លៃប្រេងឥន្ធនៈជាមធ្យមប្រចាំថ្ងៃក្នុងមួយលីត្របានឡើងដល់ ១.៩៧ ដុល្លារកាលពីថ្ងៃអាទិត្យ។

តម្លៃនេះបានកើនឡើង ០.៣៩ ដុល្លារក្នុងមួយលីត្រ បើធៀបនឹងខែតុលាឆ្នាំមុន ដែលកាលនោះប្រេងឥន្ធនៈមានតម្លៃ១.៥៨ដុល្លារ ក្នុងមួយលីត្រ។

រឿងនេះបានកើតឡើងស្របពេលដែលតម្លៃប្រេងនៅទូទាំងពិភពលោក បន្តកើនឡើង ដោយតម្លៃប្រេងឆៅម៉ាក Brent បានឡើង៥៦សេន ឬ ០,៧% ដល់ ៨៦.០៩ដុល្លារក្នុងមួយបារ៉ែល។

អ្នកនាំពាក្យ RAC លោក Simon Williams បាននិយាយថា “នេះពិតជាថ្ងៃដ៏ខ្មៅងងឹតមួយសម្រាប់អ្នកបើកបរ ហើយជាថ្ងៃមួយដែលយើងសង្ឃឹមថា យើងនឹងមិនឃើញម្តងទៀតទេដូចតម្លៃខ្ពស់កាលខែមេសាឆ្នាំ២០១២”។

សំណួរដ៏សំខាន់នាពេលឥឡូវនេះគឺថា “តើវាឈប់នៅទីណា ហើយតម្លៃសាំងនឹងឡើងដល់កម្រិតណា? ប្រសិនបើប្រេងឡើងដល់ ១០០ដុល្លារក្នុងមួយបារ៉ែល យើងអាចឃើញតម្លៃជាមធ្យមឡើងដល់ ២.០៧ដុល្លារក្នុងមួយលីត្រយ៉ាងងាយស្រួល”។

គួរបញ្ជាក់ថា កំណត់ត្រាចាស់នៃតម្លៃប្រេងខ្ពស់បំផុតគឺ ១.៩៦ ដុល្លារក្នុងមួយលីត្រកាលពីខែមេសា ឆ្នាំ២០១២៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Sky

ចុចអាន៖ តម្លៃប្រេងពិភពលោក កើនឡើងទៀតហើយ!