ព័ត៌មានជាតិ

មកដល់ម៉ោងនេះ ហាងអាជីវកម្មណាខ្លះបានបិទទ្វារ ក្រោយផ្ទុះកូវីដ ១៩?

បានផុស

៤ years មុន

នៅ

ថ្ងៃសុក្រ ១១ ធ្នូ ២០២០

ដោយ

អាជ្ញាធរបានចុះផ្អាកទីតាំងអាជីវកម្មជាច្រើន ក្រោយមានករណីឆ្លងកូវីដ ១៩ ពាក់ព័ន្ធព្រឹត្តិការណ៍ ២៨ វិច្ឆិកា។ មជ្ឈមណ្ឌលពាណិជ្ជកម្ម ផ្សារ សាលារៀន វត្តអារាម ធនាគារ ហាងលក់ទំនិញ ហាងលក់ប័រហ្គឺ ហាងកាត់សក់ ឱសថស្ថាន បានរងផលប៉ះពាល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី២៨ ខែវិច្ឆិកា ផ្សារទំនើបអ៊ីអន១ ត្រូវបានបិទជាបណ្ដោះអាសន្នរយៈពេលខ្លី ក្រោយរកឃើញវិជ្ជមានមេរោគកូវីដ-១៩ លើស្ត្រីម្នាក់ ដែលចូលទៅហូបអាហារ និងទិញទំនិញ។ នាថ្ងៃទី២ ខែធ្នូ ឆ្នាំ ២០២០ ផ្សារទំនើបរបស់ជប៉ុននេះ ក្រោយមក បានប្រកាសឲ្យបើកឡើងវិញក្រោយពិនិត្យសំណាកមនុស្ស ៣ ២០១ នាក់ អវិជ្ជមាន COVID-19។

សណ្ឋាគារភ្នំពេញ នាថ្ងៃទី ២៩ ខែវិច្ឆិកា ឆ្នាំ ២០២០ បានបិទរយៈពេល២ថ្ងៃ ក្រោយពេលស្រាវជ្រាវរកឃើញថា អ្នកជំងឺកូវីដ-១៩ បានទៅហាត់ប្រាណ និងងូតទឹក នៅទីនោះ។

ក្រសួងមហាផ្ទៃ ត្រូវបានផ្អាកចេញ-ចូល បំពេញការងារជាបណ្ដោះអាសន្ន ចាប់ពីថ្ងៃទី០៧ ខែធ្នូ ឆ្នាំ២០២០ រហូតដល់មានការជូនដំណឹងជាថ្មី។

ហាង Pedro នៅលើផ្លូវព្រះសីហនុ បានបិទទ្វារ ក្រោយបុរសអាយុ២២ឆ្នាំម្នាក់ ជាបុគ្គលិកឆ្លងកូវីដ១៩ ដោយសារបានប៉ះពាល់ស្រ្តីម្នាក់ដែលមានឆ្លងកូវីដ បានចូលទៅហាងនោះ។

នៅហាង Zendo ក៏បានបិទទ្វារដែរមកដល់ថ្ងៃនេះ។ ភ្ញៀវ ០៦ នាក់បានតេស្តឆ្លងកូវីដ ១៩ ហើយក្រសួងសុខាភិបាលណែនាំឲ្យអ្នកប៉ះពាល់ត្រូវធ្វើចត្តាឡីស័ក និងទៅពិនិត្យសំណាកជាបន្ទាន់។

អគារកាណាឌីយ៉ានៅផ្លូវភ្លោះវត្តភ្នំ និងធនាគារកាថេយូណៃធីតនៅផ្លូវសម្តេចប៉ាន ត្រូវបានរដ្ឋាភិបាលបញ្ជាឲ្យបិទបណ្តោះអាសន្ន និងយកបុគ្គលិកទាំងអស់ទៅធ្វើតេស្តសំណាក ក្រោយមានបុគ្គលិកឆ្លងកូវីដ ១៩។ មកដល់ពេលនេះ មានតែធនាគារកាណាឌីយ៉ា បានបើកដំណើរការឡើងវិញ។ ចំណែកធនាគារកាថៃ យូណាធីតនៅផ្លូវសម្តេចប៉ាន នៅមិនទាន់ដំណើរការឡើងវិញនៅឡើយទេ។

នៅហាងប័រហ្គឺ Cars’ JR burguger សាខាងទួលទំពូង អាជ្ញាធរសុខាភិបាលចុះផ្អាកអាជីវកម្ម ក្រោយមានបុគ្គលិកម្នាក់ដែលមានទំនាក់ទំនងជាមួយបុគ្គលិកម្នាក់នៅ Pedro ឆ្លងកូវីដ ១៩ ។

នៅខេត្តមណ្ឌលគិរី រីសតមួយឈ្មោះរីលែក្ស ហ៉ីល និងផ្ទះសំណាក់ចម្ប៉ា ពេជ្រ នៅទីរួមស្រុកឈ្នួលខេត្តក្រចេះ ក៏ត្រូវអាជ្ញាធរចុះទៅបិទបណ្តោះអាសន្ន បន្ទាប់មានភ្ញៀវម្នាក់មានកូវីដ ១៩ បានចូលទៅស្នាក់នៅនិងកម្សាន្តនៅទីនោះ។

នៅខេត្តកណ្តាល អាជ្ញាធរខេត្តបានចុះទៅបិទផ្សារបឹងខ្យាង និងវត្តវិហារត្រាញ់ ក្នុងស្រុកកណ្តាលស្ទឹង ក្រោយស្ត្រីឈ្មោះ អៀម ធីតាមានឆ្លងកូវីដ១៩ បានទៅលេងម្តាយឪពុកម្តាយនិងប៉ះពាល់មនុស្សជាច្រើន។ អាជ្ញាធរបានស្វែងរកមានអ្នកជាបពាក់ព័ន្ធបានកើនឡើងដល់៥៧នាក់។

ចំណែកហាងលក់ថ្នាំពេទ្យដ៏ធំមួយក្បែរផ្សារអូឡាំពិក ឈ្មោះច័ន្ទពេញវង់ ក៏ត្រូវអាជ្ញាធរចុះបិទបណ្តោះអាសន្ន ក្រោយសង្ស័យមានភ្ញៀវឆ្លងកូវីដបានចូលទៅទិញថ្នាំនៅទីនោះ។ ចំណែកហាងកាត់សក់មួយកន្លែង នៅក្រោយវិទ្យាល័យជាស៊ីមសន្ធរម៉ុក ក៏បានផ្អាកដែរដោយសារមានអ្នកឆ្លងកូវីដពាក់ព័ន្ធ បានចូលទៅកាត់សក់៕

Related Topics: