អាល្លឺម៉ង់ សន្យាជួយកម្ពុជាលើគម្រោងថាមពល​អគ្គិសនីជនបទលើកទី២​ ទំហំថវិកាជាង ៣០លានដុល្លារ

អាល្លឺម៉ង់ បានចុះកិច្ចព្រមព្រៀងហិរញ្ញប្បទានសហប្រតិបតិ្តការជាមួយកម្ពុជា ដោយសន្យាផ្តល់ឥណទាន សម្បទានជាថ្មីចំនួន ៣០លានអឺរ៉ូ សម្រាប់គម្រោងប្រសិទ្ធភាពថាមពលផ្គត់ផ្គង់អគ្គិសនីជនបទ លើកទី២។ ចំពោះកិច្ចព្រមព្រៀងឥណទានសម្បទាននេះ នឹងចុះហេត្ថលេខា ជាមួយធនាគារអភិវឌ្ឍន៍អាល្លឺម៉ង់ (KFW) នៅពេលក្រោយ បន្ទាប់ពីសិក្សាលម្អិតត្រូវបានធ្វើរួចរាល់។

កិច្ចព្រមព្រៀងនេះ ធ្វើឡើងនៅក្នុងជំនួបលោក អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងលោក Christian Berger ឯកអគ្គរដ្ឋទូតវិសមញ្ញ និងពេញភាពរបស់អាល្លឺម៉ង់ ដែលត្រូវជិតចប់អាណត្តិនៅកម្ពុជា ក្រសួងសេដ្ឋកិច្ច និងហិរញ្ញវត្ថុ កាលពីថ្ងៃអង្គារ ដើមសប្តាហ៍ កន្លងទៅ។

លោក អូន ព័ន្ធមុនីរ័ត្ន ថ្លែងអំណរគុណអាល្លឺម៉ង់ និងបានលើកឡើងថា រដ្ឋាភិបាលសាធារណរដ្ឋសហព័ន្ធអាល្លឺម៉ង់ បានបើកច្រកប្រភពហិរញ្ញប្បទានថ្មីសម្រាប់កម្ពុជា គឺជាការផ្តល់ឥណទានតាមរយៈធនាគារអភិវឌ្ឍអាល្លឺម៉ង់។

អាល្លឺម៉ង់ ក៏ធ្លាប់បានផ្តល់ឥណទានសម្បទានប្រមាណ ៣០លានអឺរ៉ូម្តងរួចមក ហើយតាមរយៈធនាគារអភិវឌ្ឃន៍អាល្លឺម៉ង (KFW) សម្រាប់ប្រសិទ្ធភាពផ្គត់ផ្គង់អគ្គិសនីជនបទលើកទី១ នៅក្នុងឆ្នាំ ២០១៩ បន្ទាប់មកក្នុងឆ្នាំ ២០២០ ក៏បានផ្តល់ ៣០លានអឺរ៉ូដូចគ្នា សម្រាប់កម្មវិធីអភិវឌ្ឍន៍ ហេដ្ឋារចនាសម្ព័ន្ធជនបទសម្រាប់កម្ពុជា។

សូមបញ្ជាក់ថា ក្នុងរយៈពេលប្រមាណ ៣០ឆ្នាំមកនេះ ដោយគិតចាប់ពីឆ្នាំ ១៩៩២ ដល់ដំណាច់ឆ្នាំ ២០២១ អាល្លឺម៉ង់ បានផ្តល់ហិរញប្បទានសហប្រតិបត្តិការដល់កម្ពុជា សរុបប្រមាណ ៧២០លានដុល្លារ ដោយក្នុងនោះ ហិរញប្បទានឥតសំណងប្រមាណ ៦៥០លានដុល្លារ និងឥណទានសម្បទានប្រមាណ ៧០លានដុល្លារ ៕ នាង រតនៈ