​អាល្លឺមង់ផ្តល់ហិរញ្ញប្បទាន ៤២ លានអឺរ៉ូ ដើម្បីអភិវឌ្ឍសង្គម-សេដ្ឋកិច្ចកម្ពុជា

រដ្ឋាភិបាលអាល្លឺមង់បានសម្រេចផ្តល់ហិរញ្ញប្បទានចំនួន ៤២ លានអឺរ៉ូ (ប្រមាណជាង $៤៨ លាន) ទាំងឥណទានសម្បទាន និងហិរញ្ញប្បទានឥតសំណងសម្រាប់ឆ្នាំ ២០២៥-២០២៦ ដើម្បីគាំទ្ររាជរដ្ឋាភិបាលកម្ពុជាក្នុងការលើកកម្ពស់កិច្ចអភិវឌ្ឍសង្គម-សេដ្ឋកិច្ចកម្ពុជា។

ការផ្តល់ផ្តល់ហិរញ្ញប្បទាននេះបានធ្វើឡើងក្នុងឱកាសកិច្ចចរចាស្តីពីកិច្ចសហប្រតិបត្តិការអភិវឌ្ឍន៍ ឆ្នាំ​២០២៥ រវាងរាជរដ្ឋាភិបាលកម្ពុជា និងរដ្ឋាភិបាលសាធារណរដ្ឋសហព័ន្ធ កាលពីថ្ងៃទី ១៨-១៩ ខែវិច្ឆិកា នៅទីស្តីការក្រុមប្រឹក្សាអភិវឌ្ឍន៍កម្ពុជា។

គោលដៅចម្បងនៃកិច្ចចរចារួមមាន ១. ពិភាក្សាលើវឌ្ឍនភាពកិច្ចសហប្រតិបត្តិការអភិវឌ្ឍន៍ទ្វេភាគី ទាំងទិដ្ឋភាពបច្ចេកទេស និងទិដ្ឋភាពនយោបាយ និង២. ពិនិត្យ និងតម្រង់ទិស វិស័យអាទិភាពនៃកិច្ច សហប្រតិបត្តិការអភិវឌ្ឍន៍ រវាងប្រទេសទាំងពីរនាពេលអនាគត។

លោក ឈៀង យ៉ាណារ៉ា ទេសរដ្ឋមន្រ្តីទទួលបន្ទុកបេសកកម្មពិសេស អនុប្រធានទី ២ ក្រុមប្រឹក្សាអភិវឌ្ឍន៍កម្ពុជាបានលើកឡើងថា កិច្ចចរចាឆ្នាំ២០២៥ នេះ ឆ្លុះបញ្ចាំងពីការប្តេជ្ញាចិត្តរួមគ្នាក្នុងការអភិវឌ្ឍសង្គម-សេដ្ឋកិច្ចកម្ពុជា ប្រកបដោយភាពធន់ បរិយាបន្ន និងចីរភាព។

លោកស្រី Christina Laun ប្រធានទទួលបន្ទុកតំបន់អាស៊ីអាគ្នេយ៍ នៃក្រសួងសហប្រតិបត្តិការសេដ្ឋកិច្ច និងការអភិវឌ្ឍ និងជាប្រធានគណៈប្រតិភូអាល្លឺម៉ង់ បានកោតសរសើរចំពោះ វឌ្ឍនភាពដែលរាជរដ្ឋាភិបាលកម្ពុជាសម្រេចបានក្នុងការអនុវត្ត អាទិភាពអភិវឌ្ឍជាតិ ប្រកបដោយប្រសិទ្ធភាព ជាពិសេសក្រោមយុទ្ធសាស្ត្រ បញ្ចកោណ ដំណាក់កាលទី ១។

ភាគីអាល្លឺម៉ង់បានគូសបញ្ជាក់ពីកិច្ចខិតខំរបស់កម្ពុជាក្នុងការកាត់បន្ថយភាពក្រីក្រ និងការធ្វើឱ្យប្រសើរ​ឡើងនូវអភិបាលកិច្ច, ប្រព័ន្ធគាំពារសង្គម និងការគ្រប់គ្រងហិរញ្ញវត្ថុសាធារណៈ។

ជាលទ្ធផលនៃកិច្ចចរចានេះ ភាគីអាល្លឺម៉ង់បានវាយតម្លៃខ្ពស់ និងចាត់ទុកកម្ពុជាជាដៃគូសំខាន់ ក្នុងកិច្ចសហប្រតិបត្តិការអភិវឌ្ឍន៍អាល្លឺម៉ង់។

ភាគីទាំងពីរបានឯកភាពក្នុងការបន្តកិច្ចសហប្រតិបត្តិការអភិវឌ្ឍន៍លើវិស័យអាទិភាពចំនួន ៣ រួមមាន ១. ការអភិវឌ្ឍសេដ្ឋកិច្ចប្រកបដោយចីរភាព ២. សុខាភិបាល និងគាំពារ សង្គម និង៣. ថាមពល និងអាកាសធាតុ និងវិស័យផ្សេងៗ ដូចជា វិមជ្ឈការ និងវិសហមជ្ឈការ និងឌីជីថលូបនីយកម្ម៕

អត្ថបទ៖សំអឿន​