កម្ពុជា ស្នើថៃដកលក្ខខណ្ឌតម្រូវថ្មី​លើការនាំចូលគ្រាប់ពោត

ថៃ បានដាក់លក្ខខណ្ឌតម្រូវថ្មី មុននាំចូលគ្រាប់ពោតពីកម្ពុជា។ លក្ខខណ្ឌថ្មីនេះ តម្រូវឱ្យស្នើលិខិតអនុញ្ញាត​នាំចូលជាមុន និងគ្រាប់ពោតត្រូវធ្វើធូបនកម្ម នៅមុនពេលនាំចេញ ដោយប្រើថ្នាំ Methyl bromide ដែលថ្នាំនេះ ជាប្រភេទថ្នាំមានតម្លៃថ្លៃ និងស្ថិតក្នុងបញ្ជីថ្នាំកសិកម្ម  ដែលអាចអនុញ្ញាតឱ្យប្រើប្រាស់​ដោយមានលក្ខខណ្ឌជាក់លាក់​ណាមួយតែប៉ុណ្ណោះ ក្រោមការត្រួតពិនិត្យពីសមត្ថកិច្ចរបស់ក្រសួងកសិកម្ម ព្រោះប្រភេទថ្នាំនេះ ធ្វើឱ្យប៉ះពាល់ដល់​ស្រទាប់អូហ្សូន។ នេះបើតាមសេចក្តីប្រកាសព័ត៌មានរបស់ក្រសួងកសិកម្ម។

ក្រសួងកសិកម្ម បានឱ្យដឹងថា កន្លងមកក្រសួងបានចរចាជាមួយភាគីថៃជាច្រើនលើកច្រើនសា ដោយស្នើសុំភាគីថៃដក​លក្ខខណ្ឌប្រើប្រាស់ថ្នាំ Methyl bromide ចេញ និងជំនួសដោយថ្នាំ Phosphine វិញ។ ប៉ុន្តែភាគីថៃ មិនយល់​ស្រប​តាមការស្នើសុំរបស់កម្ពុជាឡើយ ដោយបញ្ជាក់ថា លក្ខខណ្ឌត្រូវបានដាក់ចំពោះគ្រប់ប្រទេសនាំចេញគ្រាប់ពោត ចូលប្រទេសថៃ ពោលគឺមិនចំពោះតែកម្ពុជាទេ។

បច្ចុប្បន្នកម្ពុជា ក៏មានក្រុមហ៊ុនដែលបានចុះបញ្ជីនៅក្រសួងមានលទ្ធភាពផ្តល់សេវាធូបនកម្ម លើថ្នាំប្រភេទ Methyl bromide ផងដែរ ប៉ុន្តែដោយសារថ្នាំនេះ មានតម្លៃថ្លៃ ធ្វើឱ្យតម្លៃគ្រាប់ពោតកើនឡើងមួយកម្រិតទៀត នាំឱ្យប៉ះពាល់​ដល់ការនាំចេញពោត។ ប៉ុន្តែទោះយ៉ាងណា ក៏មានការនាំចេញ ជាផ្លូវការទៅកាន់ប្រទេសថៃ ដោយគោរពតាមលក្ខខណ្ឌ​តម្រូវថ្មី របស់ប្រទេសថៃ បានចំនួន ៣៧ ៥០០តោនផងដែរ គិតត្រឹម ថ្ងៃទី ២១ ខែកក្កដា ឆ្នាំ ២០២២។

ដោយឡែកពោត ដែលបានដាំដុះសម្រាប់នាំចេញធ្វើចំណីសត្វ គឺមិនតម្រូវឱ្យមានការចុះបញ្ជីចម្ការអនុវត្តកសិកម្មល្អ (GAP) ឡើយ។

កម្ពុជា​នាំចេញ​គ្រាប់ពោត​ប្រមាណ​ជាង ៨៤ ​ពាន់​តោន​ក្នុង​ឆមាស​ទី ​១ ឆ្នាំ​ ២០២២ ថយចុះ​ជាង ៣៩ ​ភាគរយ បើ​ធៀប​រយៈពេល​ដូចគ្នា​ឆ្នាំ​ ២០២១ ខណៈ​បច្ចុប្បន្ន​ការនាំចេញ​តាម​ច្រក​ក្នុង​ខេត្ត​បាត់ដំបង​កំពុង​មាន​ការរាំងស្ទះ​។ នេហបើយោងតាមរបាយការណ៍របស់ក្រសួងកសិកម្ម។ បើតាម​របាយការណ៍ដដែល បានឱ្យដឹងទៀតថា នៅក្នុង​ឆ្នាំ ​២០២១ កម្ពុជា នាំចេញ​គ្រាប់​ពោត​សម្រេច​បាន ២០១ ៥៨៩,៣៤ ​តោន។

ដំណាំពោត ត្រូវបានចាត់ថ្នាក់ជាដំណាំគោលទី៣ បន្ទាប់ពីដំណាំស្រូវ និងដំណាំដំឡូងមី ដែលមានសក្តានុពល សម្រាប់នាំចេញ និងផ្គត់ផ្គង់ឱ្យតម្រូវការ ក្នុងស្រុកសម្រាប់បម្រើវិស័យផលិតកម្មចំណីសត្វ អាហារមនុស្ស និងផលិតផលផ្សេងៗ ។

កម្ពុជា មានផ្ទៃដីដាំដុះពោត សរុបចំនួន ១៥៤ ៥៩៨ហិកតា និងទទួលបានបរិមាណផល សរុបចំនួន ៧៣៥ ៥៥១ តោន ក្នុងមួយឆ្នាំ។ នេះបើតាមរបាយការណ៍របស់ក្រសួងកសិកម្ម ផ្សព្វផ្សាយនៅចុងខែធ្នូ ឆ្នាំ ២០២០៕