អ្វីទៅជាទុនបម្រុងអន្តរជាតិ?

ទុនបម្រុងអន្តរជាតិ (Foreign Exchange Reserve) គឺជាទ្រព្យសម្បតិ្តរបស់ប្រទេសមួយដែលទទួល ស្គាល់ជាលក្ខណៈអន្តរជាតិ និងគ្រប់គ្រងដោយអជ្ញាធររូបិយវត្ថុ ទុកប្រើប្រាស់ក្នុងករណីចាំបាច់ណាមួយ របស់ប្រទេសជាតិ។

មាស​ គឺជាទុនបម្រុងដ៏សំខាន់បំផុតសម្រាប់ប្រទេសនីមួយៗ។ ក្រៅពីមាស ទុនបម្រុងអន្តរជាតិ អាចមាន ទម្រង់រូបិយបណ្ណនានា ដែលមូលនិធិរូបិយវត្ថុអន្តរជាតិ (International Monetary Fund)ទទួលស្គាល់ ជាអន្តរជាតិដែលមានដូចជា ប្រាក់ដុល្លារអាមេរិក ប្រាក់អឺរ៉ូ ប្រាក់ផោនរបស់អង់គ្លេស ប្រាក់យ៉េនរបស់ ជប៉ុន​ និងប្រាក់យ័នរបស់ចិនជាដើម។

ក្នុងនោះដែរ ឧបករណ៍ហិរញ្ញវត្ថុផ្សេងៗ ដូចជា ក្រដាសប្រាក់ មូលបត្របំណុល ប្រាក់បញ្ញើ វិក័យបត្ររតនាគារ និងមូលបត្ររដ្ឋាភិបាលផ្សេងទៀត ក៏ត្រូវចាត់ទុកជាទុនបម្រុងអន្តរជាតិដែរ។

តើទុនបម្រុងអន្តរជាតិ គេតម្កល់ទុកនៅទីណា?

ប្រទេសនីមួយៗ មិនអាចតម្កល់ទុនបម្រុងរបស់ខ្លួននៅធនាគារក្រៅប្រទេសទាំងអស់នោះទេ ហើយគ្រប់ ប្រទេសទាំងអស់មិនអាចតម្កល់ទុនបម្រុងរបស់ខ្លួននៅក្នុងប្រទេសជាមួយគ្នាតែមួយនោះឡើយ។ ការតម្កល់ទុនបម្រុង ដោយមួយផ្នែក គឺគេតម្កល់នៅធនាគារកណ្តាលក្នុងប្រទេសរបស់ខ្លួន ហើយមួយ ផ្នែកទៀត គេតម្កល់នៅធនាគារក្រៅប្រទេសដែលមានសុវត្ថិភាពខ្ពស់។

សារៈសំខាន់នៃទុនបម្រុងអន្តរជាតិ

ទុនបម្រុងអន្តរជាតិ ពិតជាមានសារៈសំខាន់ណាស់ក្នុងការរក្សាស្ថេរភាពហិរញ្ញវត្ថុរបស់ប្រទេសនីមួយៗ។ ទុនបម្រុងនេះ ប្រើក្នុងករណីចាំបាច់ ដូចជា ការផ្តល់ហិរញ្ញប្បទានដល់ជញ្ជីងទូទាត់ ប្រសិនបើមានតម្រូវ ការ ការធ្វើអន្តរាគមន៍ប្តូរប្រាក់ ដើម្បីគ្រប់គ្រងការប្រែប្រួលអត្រាប្តូរប្រាក់ និងការរក្សាបានទំនុកចិត្តលើ រូបិយវត្ថុ និងសេដ្ឋកិច្ចជាតិ។ សព្វថ្ងៃនេះ ចិនជាប្រទេសដែលមានទុនបម្រុងអន្តរជាតិច្រើនជាងគេ។

ធនាគារជាតិនៃកម្ពុជាបានឱ្យដឹងថា ទុនបម្រុងជាអន្តរជាតិរបស់កម្ពុជា មានប្រមាណ ២១ ពាន់លានដុល្លារ ដែលចំនួននេះខ្ពស់ជាងកម្រិតអប្បរមារបស់ប្រទេសកំពុងអភិវឌ្ឍន៍ដែលបានកំណត់។ តួលេខនេះគិតត្រឹមខែ វិច្ឆិកា ឆ្នាំ ២០២១។

អត្ថបទ៖​នាង រតនៈ