ទំហំពាណិជ្ជកម្មរវាងកម្ពុជា-ចក្រភពអង់គ្លេស សម្រេចបានជាង ៨០០លានដុល្លារ ១១ខែឆ្នាំនេះ

ទំហំពាណិជ្ជកម្មសរុបរវាងកម្ពុជា-ចក្រភពអង់គ្លេស ក្នុងរយៈពេល១១ខែដំបូងនៃឆ្នាំ២០២២ សម្រេចបានប្រមាណ ៨៣៧.៦៦ លានដុល្លារអាមេរិក ជាមួយនឹងកំណើនប្រមាណជិត ៧% បើធៀបទៅនឹងរយៈពេលដូចគ្នាក្នុងឆ្នាំ២០២១។ នេះបើតាមក្រសួងពាណិជ្ជកម្មកម្ពុជា។

ទំនិញ​កម្ពុជា ​នាំចេញទៅ​ចក្រភព​អង់គ្លេស មាន​ដូចជា៖ សម្លៀកបំពាក់ ស្បែកជើង កាបូប កង់ ផលិតផល​កសិកម្ម និង​ផលិតផល​អង់គ្លេស​នាំមក​កម្ពុជា ​មាន​ដូចជា ​រថយន្ត គ្រឿង​ម៉ាស៊ីន គ្រឿងអគ្គិសនី គ្រឿង​អេឡិចត្រូនិក​ជាដើម​។

សូមរំលឹកថា ទំហំ​ទឹកប្រាក់​ពាណិជ្ជកម្ម​ទ្វេភាគី​កម្ពុជា ចក្រភព​អង់គ្លេស​កាលពី​ឆ្នាំ​២០២១ មាន​ចំនួន​ជាង ៧៨៨,៦៥ ​លាន​ដុល្លារ ធ្លាក់ចុះ -១០,៦% ​ធៀប​ឆ្នាំ​២០២០ ដោយ​ការនាំចេញ​របស់​កម្ពុជា ​មាន​ទឹកប្រាក់ ៧៣១,៨៤លាន​ដុល្លារ ធ្លាក់ -១១,៩% និង​ទំនិញ​នាំ​ពី​អង់គ្លេស​មាន​ទឹកប្រាក់ ៥៦,៨១​លាន​ដុល្លារ កើនឡើង ១០,២%​។

សូមបញ្ជាក់ថា ប្រទេសទាំងពីរ គ្រោងនឹងប្រារព្ធខួបអនុស្សាវរីយ៍ទំនាក់ទំនងការទូតរយៈពេល៧០ឆ្នាំ នៅក្នុងឆ្នាំ២០២៣ខាងមុខនេះ៕