វៀតណាម ជំរុញកាន់តែខ្លាំងនូវទិន្នផលកាហ្វេរបស់ខ្លួន​ក្នុងទីផ្សារអន្តរជាតិ

ក្រសួងកសិកម្ម និងអភិវឌ្ឍន៍ជនបទវៀតណាម បាននិយាយកាលពីថ្ងៃអង្គារថា វៀតណាមមានបំណងជំរុញឧស្សាហកម្មកាហ្វេរបស់ខ្លួនបន្ថែមទៀតនៅក្នុងទីផ្សារអន្តរជាតិ ដោយផ្តោតលើការអភិវឌ្ឍន៍ប្រកបដោយនិរន្តរភាព និងវិធីសាស្ត្រកែច្នៃកាន់តែខ្ពស់ ។

ឧស្សាហកម្មកាហ្វេរបស់វៀតណាម គឺបានឈានទៅមុខជាលំដាប់ក្នុងចំណាត់ថ្នាក់ប្រកួតប្រជែងក្នុងទីផ្សារអន្តរជាតិជាមួយនឹងសមត្ថភាពកែច្នៃ ២.៣៦ លានតោនក្នុងមួយឆ្នាំ ។

អនុរដ្ឋមន្ត្រីក្រសួងកសិកម្ម និងអភិវឌ្ឍន៍ជនបទ លោក Phung Duc Tien និយាយថា ឧស្សាហកម្មគួរតែផ្លាស់ប្តូរការផ្តោតអារម្មណ៍ឆ្ពោះទៅកាន់វិធីសាស្ត្រកែច្នៃឲ្យកាន់តែខ្លាំងក្លា ដើម្បីកែលម្អជំហររបស់ខ្លួននៅក្នុងឆាកអន្តរជាតិ និងរួមបញ្ចូលបច្ចេកវិទ្យាឌីជីថលទៅក្នុងផលិតកម្មកាហ្វេ ដើម្បីបង្កើនទំនាក់ទំនងរវាងអ្នកលេងបណ្តាញសង្គមជាមួយអ្នកផ្គត់ផ្គង់សង្វាក់ផលិតកម្ម ។

បើយោងតាមក្រុមហ៊ុន Gro Intelligence ដែលជាអ្នកផ្តល់ទិន្នន័យកសិកម្មពិភពលោក បង្ហាញថា វៀតណាម គឹជាប្រទេស​ដែលផលិតកាហ្វេទទួលបានទិន្នផលខ្ពស់បំផុតនៅទូទាំងពិភពលោក ជាមួយទិន្នផល ២.៤ តោនក្នុងមួយហិកតា។

តួយ៉ាង ក្នុងរយៈពេល ១១ ខែក្នុងឆ្នាំនេះ វៀតណាមប្រមូលផលបានជាង ៣.៥ ពាន់លានដុល្លារអាមេរិកពីការនាំចេញកាហ្វេជាង ១.៥ លានតោន កើនឡើង ៣១.៥ ភាគរយ និង ១០.២ ភាគរយពីមួយឆ្នាំទៅមួយឆ្នាំ ។

ដោយឡែក ក្រុមហ៊ុននាំចូលកាហ្វេដ៏ធំបំផុតពីវៀតណាម រួមមានសហភាពអឺរ៉ុប បណ្តាប្រទេសក្នុងតំបន់អាស៊ីមួយចំនួន និងសហរដ្ឋអាមេរិក ដោយផលិតផលកាហ្វេ Robusta បង្កើតបាន ៧៥ ភាគរយនៃការនាំចេញ ៕

ប្រែសម្រួលដោយ ៖ រតនៈ

ប្រភព ៖ Xinhua

ចុចអាន ៖​ តាំងពីផ្ទុះជម្លោះជាមួយ អ៊ុយក្រែន, រុស្ស៊ី នាំប្រេងឆៅទៅ ឥណ្ឌា និង ចិន ទ្វេដង