ភាគហ៊ុនក្រុមហ៊ុនអចលនទ្រព្យចិន Evergrande ស្ទុះងើបឡើងវិញដល់ ៧០ ភាគរយ

ភាគហ៊ុ​នរបស់ក្រុមហ៊ុនអចលនទ្រព្យចិន Evergrande បានកើនតម្លៃដល់ ៧០ ភាគរយ ដែលនាំមុខគេនៅលើសន្ទស្សន៍​ Hang Seng លើផ្សារហ៊ុនរបស់ហុងកុង ខណៈវាជាសញ្ញាមួយបង្ហាញថា វិស័យអចលនទ្រព្យរបស់ចិនស្ទុះងើបឡើងវិញយ៉ាងខ្លាំង ។

ក្នុងនោះដែរ ភាគហ៊ុនផ្សេងទៀតដូចជា ក្រុមហ៊ុន Country Garden Holdings កើនឡើង ២៦ ភាគរយ ហើយក្រុមហ៊ុន Logan Group ក៏បានកើនឡើងដូចគ្នាចំនួន ២៨ ភាគរយ ខណៈដែលសន្ទស្សន៍អចលនទ្រព្យ Hang Seng បានកើនឡើងប្រហែល ៤ ភាគរយ ។

ទន្ទឹមនោះ ការកើនឡើងតម្លៃភាគហ៊ុននេះ គឺបន្ទាប់ពីក្រុមហ៊ុន Country Garden ត្រូវបានគេរាយការណ៍ថា អាចមានលទ្ធភាពបង់ប្រាក់ចំនួន ២២.៥ លានដុល្លារក្នុងការទូទាត់ប័ណ្ណបំណុលកាលពីថ្ងៃអង្គារ ដែលធ្វើឲ្យក្រុមហ៊ុននេះចៀសផុតពីបញ្ហាគ្មានលទ្ធភាពសងបំណុល និងចៀសផុតពីវិបត្តិហិរញ្ញវត្ថុ ។

គួរបញ្ជាក់ថា ក្រុមហ៊ុនអភិវឌ្ឍអចលនទ្រព្យដ៏ធំរបស់ប្រទេសចិន Evergrande បានជួបប្រទះ​វិបត្តិបំណុល​នៅក្នុងឆ្នាំ ២០២១ និងបានដាក់ពាក្យសុំការការពារក្ស័យធននៅអាមេរិកថែមទៀតផង ៕

ប្រែសម្រួល៖ នាង​ រតនៈ

ប្រភព៖ CNBC