ផ្លូវលេខ ៥០C ពីកំពង់ឆ្នាំង-កំពង់ធំសាងសង់ផុតពីទឹកអាចធ្វើដំណើរបាននៅខែវស្សា

សមិទ្ធិផលថ្មីមួយទៀតដែលប្រជាពលរដ្ឋបានអបអរសាទរនោះគឺផ្លូវជាតិលេខ៥០សេ ពីឃុំច្រណូក ស្រុកកំពង់លែង ទៅកាន់ក្រុងស្ទឹងសែន ខេត្ត កំពង់ធំដែលមានប្រវែង ១៧ គីឡូម៉ែត្រក្នុងពេលនេះ អាចធ្វើចរាចរណ៍បានទាំងខែវស្សា និងខែប្រាំង ព្រោះលែងលិចទឹកទន្លេក្នុងខែវស្សាដូចឆ្នាំមុនៗទៀតហើយដោយសារក្រុមហ៊ុនលោកឧកញ៉ា​ទ្រីភាពអ្នក​ទទួលសិទ្ធិកសាងកំពង់ផែភ័ស្តុភារកម្មពហុបំណងភ្នំទេពីបានជួយកសាងផ្លូវចាក់ដីឲ្យខ្ពស់ផុតទឹកទន្លេឡើង។ នេះបើយោងតា មការឲ្យដឹងពីរដ្ឋបាលស្រុកកំពង់លែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក យ៉ែម លក្ខិណា អភិបាលស្រុកកំពង់លែងនៅរសៀលថ្ងៃទី១៤ ខែកញ្ញាឆ្នាំ២០២៣ នេះបានឱ្យដឹងថា ផ្លូវលេខ ៥០សេ មានប្រវែង ៥៥ គីឡូម៉ែត្រគិតពីសាលាស្រុកកំពង់លែងទៅកាន់ក្រុងស្ទឹងសែន ខេត្តកំពង់ធំ។

ដោយឡែកផ្លូវមួយខ្សែនេះគិតពីចំណុចភ្នំកង្កែប ឃុំច្រណូក ស្រុកកំពង់លែង ទៅដល់ក្រុងស្ទឹងសែន ខេត្តកំពង់ធំជាផ្លូវគ្រោះក្រហមដែលមានប្រវែង ១៧ គីឡូម៉ែត្រ ដែលជារៀងរាល់ឆ្នាំនៅខែវស្សាកំណាត់ផ្លូវមួយនេះត្រូវទឹកទន្លេលិចមិនអាចធ្វើចរាចរណ៍បាន។

លោកអភិបាលស្រុកកំពង់លែងបានបញ្ជាក់ថា ជាង១ខែចុងក្រោយនេះដោយ មានការគិតគូររបស់ប្រមុខរាជរដ្ឋាភិបាលកម្ពុជា កំណាត់ផ្លូវគ្រោះក្រហមប្រវែង១៧ គីឡូម៉ែត្រនេះ ដែលមានទទឹងបាតក្រោមប្រវែង ៣០ ម៉ែត្រ ទទឹងបាតលើ ១៥ ម៉ែ ត្រ និងមានកម្ពស់ចាប់ពី១ ម៉ែត្រទៅដល់ ២និង៣ម៉ែត្រ ក្រសួងសាធារណៈការបានអនុញ្ញាតឲ្យក្រុមហ៊ុន លោកឧកញ៉ា ទ្រីភាព (អ្នកកសាងកំពង់ផែភ័ស្តុភារកម្មពហុបំណងភ្នំទេពីក្នុងស្រុកកំពង់លែង) ជាអ្នកជួយក សាងកំណាត់ផ្លូវខាងលើនេះដោយចាក់ដីសឲ្យខ្ពស់ផុតទឹកទន្លេឡើងក្នុងរដូវវស្សា។ ដូច្នេះហើយទើបនៅរដូវវស្សាឆ្នាំ២០២៣ នេះកំណាត់ផ្លូវគ្រោះក្រហមនេះអាចធ្វើចរាចរណ៍បានមិនលិចទឹកទៀតឡើយ។

ដោយឡែកនៅរដូវប្រាំងឆ្នាំ២០២៣ និង ២០២៤ ខាងមុខនេះ កំណាត់ផ្លូវខាងលើនេះប្រមុខរាជរដ្ឋាភិបាលកម្ពុជានិងក្រសួង សាធារណការ បានប្រកាសថានិងកសាងជាផ្លូវកៅស៊ូ ជាមួយនឹងការកសាងស្ពានថ្មមានប្រវែងជាង៣០០០ ម៉ែត្រ ដែលជាស្ពា នវែងជាងគេនៅក្នុងប្រទេសកម្ពុជាកសាងឆ្លងកាត់ទន្លេ៣ ក្នុងក្រុងកំពង់ឆ្នាំង និងស្រុកកំពង់លែង នៃខេត្តកំពង់ឆ្នាំងតភ្ជាប់ជាមួយផ្លូវលេខ៥០សេ នេះទៅកាន់ខេត្ត កំពង់ធំ។

តាមគម្រោងផែនការដែលក្រសួងសាធារណការធ្លាប់ប្រកាសឲ្យប្រជាពលរដ្ឋយើងឲ្យដឹងកន្លងមកថា ការកសាងស្ពានដ៏វែងខាងលើនេះ និងផ្លូវលេខ៥០ C  ដោយត្រូវចាប់ផ្ដើមកសាងនៅក្នុងឆ្នាំ២០២៤ ខាងមុខនេះហើយ ដោយប្រើប្រាស់ រយៈពេលកសាងប្រមាណ៥ឆ្នាំ ដែលត្រូវចំណាយថវិកាសរុបប្រមាណ ២៥០ លានដុល្លារ ជាថវិការបស់មិត្តចិន។

គម្រោងផែនការខាងលើនេះរបស់ប្រមុខរាជរដ្ឋាភិបាលកម្ពុជា បានធ្វើឲ្យប្រជាពលរដ្ឋនៅក្នុងខេត្តកំពង់ឆ្នាំងក៏ដូចជានៅក្នុងទូទាំងប្រទេស មានការសាទរសប្បាយ រីករាយយ៉ាងក្រៃលែង ដោយសង្ឃឹមថាប្រមុខរាជរដ្ឋាភិបាលថ្មីដែលដឹកនាំដោយសម្ដេចធិបតី ហ៊ុន ម៉ាណែត ពិតជាអនុវត្តគម្រោងផែនការខាងលើនេះប្រកបដោយជោគជ័យ៕

អត្ថបទ៖ ឈៀង ថារិទ្ធ