ថៃ បញ្ចេញថវិកាជាង ២២៦ លានដុល្លារជួយដល់កសិករដាំអំពៅ

រដ្ឋាភិបាលថៃបានបញ្ចេញថវិកា ៨ ពាន់លានបាត ឬ​ជាង ២២៦ លានដុល្លារ ដើម្បីជួយលើកទឹកចិត្តដល់កសិករដាំអំពៅដែលយល់ព្រមមិនដុតរបស់​សំណល់ បន្ទាប់ពីប្រមូលផលរួច ក្នុងគោលបំណង​កាត់បន្ថយ​កំហាប់ខ្យល់ពុល PM2.5 នៅក្នុងឆ្នាំប្រមូលផល ២០២២ និង ២០២៣ ។

យោងតាមលោកស្រី Rudklao Suwankiri អ្នកនាំពាក្យរងរបស់រដ្ឋាភិបាលឲ្យដឹងថា មូលនិធិសម្រាប់គាំទ្រគម្រោង មួយនេះបានមកពីធនាគាររដ្ឋសម្រាប់កសិកម្ម និងសហករណ៍កសិកម្ម ហើយរដ្ឋាភិបាលនឹងផ្តល់ជូនកសិករ​ដែលយល់ព្រមមិនដុត​កាកសំណល់ចំនួន ១២០ បាតក្នុងមួយតោន បន្ទាប់ពីប្រមូលផលអំពៅរួច ។

សម្រាប់គម្រោងនេះដែរ​ គឺជាផ្នែកមួយក្នុងការដោះស្រាយជាបន្ទាន់នូវបញ្ហាកំហាប់ខ្យល់ពុល PM2.5 ដែលកាន់តែអាក្រក់ទៅៗជារៀងរាល់ឆ្នាំ ជាពិសេសបានប៉ះពាល់ដល់សុខភាពមនុស្សរាប់លាននាក់ ខណៈគម្រោងនេះមិនបានផ្ទុយពីច្បាប់អង្គការពាណិជ្ជកម្មពិភពលោក​ WTO ក៏ដូចជាផលិតកម្ម និងថ្លៃទំនិញឡើយ ។

ទន្ទឹមនោះ ការអនុម័តនេះគឺស្របតាមសេចក្តីសម្រេចរបស់កិច្ចប្រជុំក្រុមប្រឹក្សាអំពៅ និងស្ករ ដែលដឹកនាំដោយលេខាធិការអចិន្ត្រៃយ៍នៃក្រសួងឧស្សាហកម្ម ដែលធ្វើឡើងកាលពីថ្ងៃទី២៨ ខែកញ្ញា ដើម្បីគាំទ្រកសិករដាំអំពៅជាមួយនឹងថវិកាមិនលើសពី ៨ ពាន់លានបាត ។

ពាក់ព័ន្ធ​ជាមួយទិន្នផលវិញ ថៃរំពឹងនឹងប្រមូលផលអំពៅបាន ៨២.៤ លានតោនសម្រាប់ឆ្នាំក្រោយ ហើយការប្រើប្រាស់ស្ករក្នុងស្រុកត្រូវបានព្យាករណ៍ថា មានចំនួន ២៥.៧ លានបាវស្មើនឹង ២.៥៧ លានតោន ស្របពេលដែលកាលពីថ្ងៃទី១៤ ខែវិច្ឆិកា ថៃបានដំឡើងតម្លៃស្ករក្នុងស្រុកចំនួន ២ បាតដើម្បីគាំទ្រដល់ឧស្សាហកម្មស្ករ ស ៕

ប្រែសម្រួល៖ នាង​ រតនៈ

ប្រភព៖ Bangkok Post