សេដ្ឋកិច្ច
៣ ឆ្នាំទៀត ឥណ្ឌា នឹងទាញទម្លាក់ អាល្លឺម៉ង់ ជាមហាអំណាចសេដ្ឋកិច្ចលំដាប់ទី ៣ លើលោក
ប្រទេសឥណ្ឌាបានរាយការណ៍ពីកំណើនសេដ្ឋកិច្ចដ៏រឹងមាំគួរឲ្យភ្ញាក់ផ្អើលនៅចុងឆ្នាំ ២០២៣ ដែលនេះគឺជាកត្តាជំរុញដ៏សំខាន់សម្រាប់លោកនាយករដ្ឋមន្ត្រី Narendra Modi ក្នុងរយៈពេលប៉ុន្មានសប្តាហ៍មុនការបោះឆ្នោតសកល ហើយអ្នកវិភាគលើកឡើងថា ប្រទេសនេះនឹងក្លាយទៅជាមហាអំណាចសេដ្ឋកិច្ចទី ៣ របស់ពិភពលោកនៅឆ្នាំ ២០២៧ ខណៈបច្ចុប្បន្នស្ថិតនៅលំដាប់ទី ៥ ។ នេះបើយោងតាមការចេញផ្សាយរបស់សារពត៌មាន CNN នៅថ្ងៃទី០១ ខែមីនា ។
ការិយាល័យស្ថិតិរបស់ឥណ្ឌាបាននិយាយកាលពីថ្ងៃព្រហស្បតិ៍ថា ផលិតផលក្នុងស្រុកសរុប (GDP) បានកើនឡើង ៨.៤ ភាគរយក្នុងរយៈពេល ៣ ខែចុងក្រោយនៃឆ្នាំ ២០២៣ បើធៀបនឹងឆ្នាំមុន ពោលគឺកើនឡើងពីកំណើន ៧.៦ ភាគរយនៅក្នុងអំឡុងខែមិថុនាដល់ខែកញ្ញា ឆ្នាំ ២០២៣ ខណៈការកើនឡើងចុងក្រោយនេះ គឺខ្ពស់ជាងអ្នកវិភាគបានរំពឹងទុកទៅទៀត ហើយល្បឿននៃកំណើននេះ គឺខ្លាំងបំផុតក្នុងចំណោមប្រទេសសេដ្ឋកិច្ចធំៗកាលពីត្រីមាសមុន ។
ទិន្នន័យនេះនឹងជំរុញឲ្យមានសុទិដ្ឋិនិយមបន្ថែមទៀតលើសេដ្ឋកិច្ចរបស់ប្រទេសដែលមានប្រជាជនច្រើនជាងគេលើពិភពលោកមួយនេះ ។ យោងតាមរបាយការណ៍ដាច់ដោយឡែកពីគ្នាពីក្រុមហ៊ុនប្រឹក្សាអចលនទ្រព្យ Knight Frank បានឲ្យដឹងថា ចំនួនប្រជាជនឥណ្ឌាដែលមានទ្រព្យសម្បត្តិសរុបយ៉ាងហោចណាស់ ៣០ លានដុល្លារនឹងកើនឡើង ៥០ ភាគរយក្នុងរយៈពេល ៥ ឆ្នាំពោលដល់ឆ្នាំ ២០២៨ ដែលជាការកើនឡើងដ៏ធំបំផុតនៅទូទាំងពិភពលោក ។
ស្របពេលជាមួយគ្នានេះ មូលនិធិរូបិយវត្ថុអន្តរជាតិ (IMF) រំពឹងថា សេដ្ឋកិច្ចរបស់ប្រទេសឥណ្ឌានឹងកើនឡើង ៦.៥ ភាគរយក្នុងឆ្នាំ ២០២៤ ប៉ុន្តែរដ្ឋាភិបាលលោក Modi មានការប៉ាន់ប្រមាណខ្ពស់ជាងនេះរហូតដល់ ៧.៦ ភាគរយឯណោះ ។
ការរីកចម្រើនប្រកបដោយនិរន្តរភាពនេះ នឹងជំរុញឲ្យប្រទេសឥណ្ឌាឡើងចំណាត់ថ្នាក់នៃប្រទេសដែលមានសេដ្ឋកិច្ចធំបំផុតរបស់ពិភពលោកយ៉ាងឆាប់រហ័សផងដែរ ខណៈអ្នកវិភាគនៅស្ថាប័ន Jefferies រំពឹងថា ប្រទេសនេះនឹងដណ្ដើមតំណែងអាល្លឺម៉ង់ក្លាយទៅជាមហាអំណាចសេដ្ឋកិច្ចទី ៣ របស់ពិភពលោកនៅឆ្នាំ ២០២៧ ។
ជាក់ស្ដែង រដ្ឋាភិបាល Modi បានអនុម័តការវិនិយោគជាង ១៥ ពាន់លានដុល្លារសម្រាប់ការសាងសង់រោងចក្រផលិតបច្ចេកវិទ្យា semiconductor ចំនួន ៣ ដោយក្នុងនោះមានទាំងក្រុមហ៊ុន Tata Group ផងដែរ ដែលជាការបោះជំហានដ៏សំខាន់ឆ្ពោះទៅរកគោលដៅរបស់ខ្លួនក្នុងការប្រែមុខមាត់ប្រទេសឥណ្ឌាទៅជាមជ្ឈមណ្ឌលផលិតសម្ភារៈអេឡិចត្រូនិក ៕
អត្ថបទ ៖ ប៊ុន សុភាព
-
ជីវិតកម្សាន្ដ៣ ថ្ងៃ ago
ពេជ្រ ចរណៃ រក្សាបានរាង និងសម្រស់ស្អាត មិនចាញ់តារាបរទេស
-
ព័ត៌មានជាតិ៦ ថ្ងៃ ago
គេហទំព័រ Weather៖ សប្តាហ៍នេះ កម្ពុជា នឹងក្តៅខ្លាំង ឈានដល់កម្រិតគ្រោះថ្នាក់ ៤០អង្សាសេ
-
ព័ត៌មានជាតិ៥ ថ្ងៃ ago
កម្ពុជានឹងធ្លាក់ភ្លៀង ៤០% នាដើមរដូវវស្សាឆ្នាំនេះ ខណៈក្រសួងប្រកាសឱ្យប្រុងប្រយ័ត្នបាតុភូត ផ្គរ រន្ទះ និងខ្យល់កន្ត្រាក់
-
ព័ត៌មានជាតិ២ ម៉ោង ago
ស្គាល់អត្តសញ្ញាណយោធិន១៥រូប ចំណោមអ្នកស្លាប់២០រូប ក្នុងហេតុការណ៍ផ្ទុះឃ្លាំងគ្រាប់នៅកំពង់ស្ពឺ
-
ព័ត៌មានជាតិ៥ ថ្ងៃ ago
តុលាការ បញ្ជាឱ្យចាប់ខ្លួនជនត្រូវចោទ ចោម ខ្វាន់ ពីបទរំលោភលើទំនុកចិត្តអ្នកដទៃ
-
ព័ត៌មានជាតិ៣ ម៉ោង ago
សម្ដេចធិបតី ឧបត្ថម្ភជូនគ្រួសារយោធិនដែលស្លាប់មួយគ្រួសារ៨០លានរៀល ឯអ្នករងរបួស២០លានរៀល
-
សេចក្ដីជូនដំណឹង៤ ថ្ងៃ ago
អ្នកឧកញ៉ា ឡេង ណាវ៉ាត្រា បញ្ជាក់ច្បាស់ៗការដោះដូរ ផ្ទះយកដី គឺសម្រាប់តែអតិថិជនស្ម័គ្រចិត្ត ដែលពួកគាត់មានតម្រូវការចាំបាច់ចំណែកគម្រោង បុរី នៅតែប្រកាន់គោលជំហរបញ្ចប់ការដោះស្រាយជូនអតិថិជនទាំងស្រុងដដែល
-
សេចក្ដីជូនដំណឹង៥ ថ្ងៃ ago
ចូលឆ្នាំខ្មែរបានសប្បាយជួបជុំហើយ បានទាំងរង្វាន់ពីគ្រុឌឈ្នះផ្អើលពេញភូមិ