កម្ពុជារកចំណូលបានជិត១ពាន់លានដុល្លារ​ពីការនាំចេញអង្ករ-ស្រូវក្នុងឆមាសទី១នេះ

ក្នុងរយៈពេល ៦ខែ នៃឆ្នាំ២០២៤ កម្ពុជាបាននាំចេញអង្ករបានចំនួន ៣៣៨ ៦៥៤ តោនដែលមានទឹកប្រាក់ប្រមាណ២៤៧,៦០លានដុល្លារទៅកាន់គោលដៅចំនួន ៦៣ ក្នុងឆមាសទី១ឆ្នាំ២០២៤ និងបាននាំស្រូវជាង២លានតោនឬមានទឹកប្រាក់ជាង៧០០លានដុល្លារ។​ នេះបើយោងតាមរបាយការណ៍ពីសហព័ន្ធស្រូវអង្ករកម្ពុជា(CRF)។

បើយោងតាមរបាយការណ៍របស់​ CRFទទួលបានដោយកម្ពុជាថ្មីនៅរសៀលថ្ងៃទី៩ខែកក្កដារនេះ សម្រាប់ទំហំនៃការនាំចេញនេះគឺត្រូវបានធ្វើឡើងតាមរយៈក្រុមហ៊ុននាំចេញអង្ករចំនួន ៥១ ក្រុមហ៊ុន ទៅកាន់គោលដៅចំនួន ៦៣ ដែលក្នុងនោះទៅកាន់បណ្តាប្រទេសនៅក្នុងតំបន់អឺរ៉ុបចំនួន ​២៦ ​បានបរិមាណអង្ករចំនួន ១៥៦ ៧៨៩ តោន គិតជាទឹកប្រាក់ចំនួន ១២១.៣២ លានដុល្លារសហរដ្ឋអាមេរិក  ទៅកាន់ប្រទេសចិន​រួមទាំងហុងកុង និងម៉ាកាវ ចំនួន ៧៥ ៣៩៨ តោន គិតជាទឹកប្រាក់ចំនួន ៤៧.០១ លានដុល្លារសហរដ្ឋអាមេរិក ទៅកាន់ប្រទេសក្នុងអាស៊ាន រួមទាំងទីម័រខាងកើត ចំនួន ៧ប្រទេសបានបរិមាណ ចំនួន ៧៤ ៥៥៤ តោន​ គិតជាទឹកប្រាក់ចំនួន ៥១.៨៥ លានដុល្លារសហរដ្ឋអាមេរិក និងទៅកាន់គោលដៅ ២៧ប្រទេសផ្សេងទៀតមាន អាហ្វ្រិក មជ្ឈឹមបូព៌ា អាមេរិក កាណាដា អូស្ត្រាលី ញ៉ូហ្សេឡេន ។ល។ បានចំនួន   ៣១ ៩១៣ តោន គិតជាទឹកប្រាក់ចំនួន  ២៧.៤២ លានដុល្លារសហរដ្ឋអាមេរិក។

បើតាមលោក​ លន់ យ៉េង អគ្គលេខាធិការនៃ​ CRF ចំពោះប្រភេទអង្ករ បាននាំចេញអង្ករក្រអូបចំនួន ៧០.៦៣% ប្រភេទអង្ករស ធម្មតា​ ២៥.០៧% អង្ករចំហ៊ុយ ២.៥៧% អង្ករសរីរាង្គចំនួន ១.៤៨%  និងអង្ករផ្សេងៗចំនួន ០.២៥% ។

ជាមួយគ្នានេះដែរ លោកថា​ ប្រទេសកម្ពុជាក៏បាននាំចេញស្រូវចំនួន ២,៥២៨,០១១តោនស្រូវសើម ដែលគិតជាទឹកប្រាក់បានប៉ាន់ប្រមាណជាង ៧២៧.៣៦ លានដុល្លារសហរដ្ឋអាមេរិក ដែលក្នុងនោះ ៧៥% បាននាំចេញដោយឆ្លងកាត់ការស្នើសុំការបញ្ជាក់ឯកសារនាំចេញ ពីអាជ្ញាធរមានសមត្ថកិច្ច៕