កិច្ចប្រជុំកំពូលផ្គូផ្គងធុរកិច្ចសហរដ្ឋអាមេរិក-កម្ពុជានឹងរៀបចំឡើងនាខែកញ្ញា​​ខាងមុខនេះ

ស្ថានអគ្គកុងស៊ុលកម្ពុជាប្រចាំទីក្រុងឡុងប៊ិច រដ្ឋកាលីហ្វរ័ញ៉ា សហរដ្ឋអាមេរិកនឹងរៀបចំកិច្ចប្រជុំកំពូលផ្គូផ្គងធុរកិច្ចសហរដ្ឋអាមេរិក-កម្ពុជា ​នៅថ្ងៃទី ១៩ ខែកញ្ញា ឆ្នាំ ២០២៤ ដើម្បីឪកាសដល់ក្រុមហ៊ុននាំចេញរបស់កម្ពុជាមាន​ឪកាសជួបដោយផ្ទាល់ជាមួយក្រុមហ៊ុននាំចូលរបស់អាមេរិកសំដៅពង្រឹងការនាំចេញរបស់កម្ពុជាឱ្យកាន់តែមានកំណើនបន្ថែមទៀត។

យោងតាមសេចក្តីប្រកាសព័ត៌មានរបស់ស្ថានអគ្គកុងស៊ុលកម្ពុជា ប្រចាំទីក្រុងឡុងប៊ិចកាលពីថ្ងៃទី១៩ខែសីហា ព្រឹត្តិការណ៍​នេះគឺដើម្បីណែនាំផលិតផលម្ហូបអាហារកម្ពុជាដែលត្រៀមរួចជាស្រេចដែលមានគុណភាពខ្ពស់ និងនាំចេញទៅកាន់អ្នកទិញ និងអ្នកចែកចាយអនាគតរបស់សហរដ្ឋអាមេរិក។

សេចក្តីប្រកាសដដែលបានគូសបញ្ជាក់ថា៖«ដោយសារផលិតផលពីប្រទេសកម្ពុជាបច្ចុប្បន្នមិនត្រូវបានតំណាងឱ្យបានល្អនៅក្នុងទីផ្សារសហរដ្ឋអាមេរិក ព្រឹត្តិការណ៍នេះនឹងបម្រើជាវេទិកាដ៏សំខាន់មួយដើម្បីកសាងការទទួលស្គាល់ និងតម្រូវការសម្រាប់ផលិតផលដែលមានគុណភាពខ្ពស់របស់អ្នកដាំដុះ និងអ្នកនាំចេញកម្ពុជាទៅកាន់ទីផ្សារសហរដ្ឋអាមេរិក»។

អ្នកឧកញ៉ាលឹម ហេង អនុប្រធាសភាពាណិជ្ជកម្មកម្ពុជាបានថ្លែងប្រាប់កម្ពុជាថ្មីថា សម្រាប់អគ្គកុងស៊ុល​ប្រចាំនៅទីក្រុងឡុងប៊ិច ​ក៏ជាតំណាងសភាពាណិជ្ជកម្មកម្ពុជា​នៅទីនោះដែរ ដូច្នេះរាល់ការធ្វើការទូតសេដ្ឋកិច្ច និងការរៀបចំជនួបពាណិជ្ជកម្មនេះយើងបានរៀបចំមួយចំនួនរួចមកហើយ។

លោកបានថ្លែងថា៖«សម្រាប់ការរៀបចំនៅខែកញ្ញាខាងមុខនេះគឺជាការផ្តល់ឪកាសដល់អ្នកផលិតនិងអ្នកនាំចេញរបស់យើងអាចធ្វើការដាក់តាំងបង្ហាញនូវផលិតផលនិងអាចជួបផ្ទាល់ជាមួយអ្នកទិញនិងក្រុមហ៊ុននាំចូលរបស់អាមេរិកនានា ជាពិសេសគឺយើងអាចទាក់ទងគ្នាដើម្បីចាប់ដៃគូរផងដែរ»។​

លោក សុង សារ៉ន ប្រធានអគ្គនាយកក្រុមហ៊ុន Amru Rice (Cambodia) សម្រាប់ការរៀបចំជំនួបធុរកិច្ចនេះគឺបានដើរតួនាទីយ៉ាងសំខាន់សម្រាប់ក្រុមហ៊ុនាំចេញក្នុងស្រុកមានឪកាសដើម្បីធ្វើការនាំផលិតផលរបស់ខ្លួនដើម្បីដាក់តាំងបង្ហាញក្នុងការស្វែងរកដៃគូរក៏ដូចជាពង្រីកការនាំចេញបន្ថែម។

លោកបានថ្លែងថា៖«សម្រាប់ក្រុមហ៊ុនខ្ញុំក៏នឹងនាំយកអង្ករក្រអូបប្រណិតដើម្បីយកទៅតាំងបង្ហាញនិងស្វែងរកដៃគូរក្នុងការពង្រីកការនាំចេញប្រភេទអង្ករក្រអូបប្រណិតរបស់យើងទៅកាន់សហរដ្ឋអាមេរិកកាន់ច្រើនបន្ថែមទៀត»។

យោងតាមរបាយការណ៍ពីអគ្គនាយកដ្ឋានគយ ការដោះដូរពាណិជ្ជកម្មទ្វេរភាគីរវាងកម្ពុជា និងអាមេរិកសម្រេចបានទឹកប្រាក់ប្រមាណ​ ៤,៥២៩ពាន់លានដុល្លារ ក្នុងឆមាសទី១ឆ្នាំ២០២៤កើនឡើង៤ភាគរយធៀបនឹងរយៈពេលដូចគ្នាកាលពីឆ្នាំមុន។​ ក្នុងនោះការនាំចេញរបស់កម្ពុជាសម្រេចបាន៤,៤០១ពាន់លានដុល្លារកើនឡើង៣,​៩​%ធៀបនឹងរយៈពេលដូចគ្នាក្នុងឆ្នាំ២០២៣ ខណៈការនាំចូលពីអាមេរិកមានទឹកប្រាក់១២៧,៧៨៨លានដុល្លារ កើនឡើង៦,​៩​%៕