ពីជនចំណាកស្រុកក្លាយជាសហគ្រិនដ៏ជោគជ័យម្នាក់

ស្ថិតក្នុងវ័យ៣៣ឆ្នាំ យុវជនដែលមានលំនៅឋាននៅក្នុងស្រុកព្រៃឈរ ខេត្តកំពង់ចាម លោក សុត ផុនបានក្លាយជាសហគ្រិនឆ្នើម​ម្នាក់ដោយបានផ្ដើមការងារដំបូងជាពលកម្មចំណាកស្រុកធ្វើការនៅប្រទេសថៃ ធ្វើការតស៊ូរហូតក្លាយជាម្ចាស់សិប្បកម្មផលិតធ្យូងអនាម័យ ក្រោយត្រឡប់មករស់នៅស្រុកកំណើតវិញ។

លោក សុត​ ផុន ម្ចាស់សិប្បកម្មផលិតធ្យូងអនាម័យស្នាដៃកូនខ្មែរ បានប្រាប់ កម្ពុជាថ្មី ថា ដើមឡើយលោកគ្រាន់តែជាពលករចំណាកស្រុក ទៅធ្វើការជាកម្មករសំណង់នៅប្រទេសថៃ​ អស់រយៈពេលជាង៣ឆ្នាំ គឺកំឡុងឆ្នាំ ២០១២ រហូតដល់ឆ្នាំ ២០១៥។

ក្រោយត្រឡប់មកកាន់ប្រទេសកម្ពុជាវិញ លោក សុត​ ផុន ចាប់ផ្ដើមបើកក្រុមហ៊ុនតូចមួយ ដោយធ្វើការនាំពលករទៅធ្វើការនៅក្រៅប្រទេស តែអ្វីដែលគួរឱ្យសោកស្ដាយ នៅឆ្នាំ ២០១៩ ស្របពេលដែលជំងឺកូវីដ-១៩ បានផ្ទុះឡើង ក្រុមហ៊ុននាំពលករទៅធ្វើការនៅក្រៅប្រទេសត្រូវបិទទ្វារ មិនអាចដំណើរបាន ទើបលោកសម្រេចចិត្តស្វែងរកគំនិតបើកអាជីវកម្មថ្មីជំនួសវិញ។

មានឈាមជ័រ ជាកូនកសិកររស់នៅស្រុកព្រៃឈរ ខេត្តកំពង់ចាម លោក សុត ផុន ជាមនុស្សម្នាក់ដែលមិនចុះចាញ់នឹងព្រហ្មលិខិត បន្ទាប់ពីបរាជ័យក្នុងអាជីវកម្មមួយ លោកក៏បាននឹកឃើញគំនិតថ្មីមួយទៀត ដោយបង្កើតសិប្បកម្មផលិតធ្យូងអនាម័យ និងកំពុងទទួលបានការគាំទ្រយ៉ាងច្រើនពីសំណាក់ប្រជាជនខ្មែរ។

មូលហេតុ ដែលនាំឱ្យលោក សហគ្រិនឆ្នើមមួយនេះ បង្កើតសិប្បកម្មផលិតធ្យូងអនាម័យនេះឡើង ដោយសារលោកបានមើលឃើញពីតម្រូវការរបស់ប្រជាជនខ្មែរនាពេលបច្ចុប្បន្ន តែងតែនិយមប្រើប្រាស់ធ្យូងសម្រាប់ការចម្អិនម្ហូបអាហារប្រចាំថ្ងៃ។ តែអ្វីដែលអ្នកប្រើប្រាស់មិនទាន់ដឹងនោះគឺ ធ្យូងដែលពួកគាត់ប្រើប្រាស់សព្វថ្ងៃខ្លះ មិនទាន់មានអនាម័យ និងស្ដង់ដា ត្រឹមត្រូវនៅឡើយ។ កត្តាទាំងនេះហើយ ទើបនាំឱ្យលោក សុត ផុន បង្កើតសិប្បកម្មផលិតធ្យូងអនាម័យស្នាដៃកូនខ្មែរ នេះឡើង ដែលធ្យូងនេះមានអត្ថប្រយោជន៍យ៉ាងច្រើន ពិសេសទៀតនោះគឺ វាមិនប៉ះពាល់សុខភាព និងការបំផ្លាញបរិស្ថាន សម្រាប់អ្នកប្រើប្រាស់។

សហគ្រិនរូបនេះ បានបញ្ជាក់ទៀតថា សម្រាប់សិប្បកម្មផលិតធ្យូងអនាម័យ នាពេលបច្ចុប្បន្ននេះ បានផលិតធ្យូងអនាម័យសម្រាប់ចែកចាយនៅក្នុងរាជធានីភ្នំពេញ និងបណ្ដាខេត្តមួយចំនួនទៀតក្នុងប្រទេសកម្ពុជា និងបានចូលរួមចំណែក សម្រាប់សង្គមជាតិ ពីព្រោះតែវត្ថុធាតុដើម នៃការផលិតធ្យូងអនាម័យ បានមកពីកាកសំណល់គេបោះបង់ចោល និង​ផលិត​ពី​កម្ទេច​ធ្យូង​ រលាដូង​ផ្កា​ត្នោត​ ដំឡូង​មី​របស់​ប្រជាពលរដ្ឋ​ដាំ​ក្នុង​ស្រុក​ និងដំណាំដំឡូងមីក្រៀមរបស់កសិករ នៅតាមបណ្ដាខេត្តមួយចំនួន ដែលសកម្មភាពនេះ ក៏ជាការជំរុញទឹកចិត្តមួយ នាំឱ្យកសិករខ្មែរដាំដំឡូងមីមានទីផ្សារ ក្រៅពីការនាំចេញទៅក្រៅប្រទេស ផងដែរ៕

អត្ថបទ ៖ សួស សិត