ព័ត៌មានអន្ដរជាតិ

ម៉ាឡេស៊ីបើកមជ្ឈមណ្ឌលរចនាបន្ទះឈីប ដើម្បីជំរុញឧស្សាហកម្មឈីប

បានផុស

២ years មុន

នៅ

ថ្ងៃពុធ ៧ សីហា ២០២៤

ដោយ

ម៉ាឡេស៊ីកាលពីថ្ងៃអង្គារ បានបើកមជ្ឈមណ្ឌលរចនាបន្ទះឈីបនៅក្នុងរដ្ឋ Selangor ដើម្បីជំរុញឧស្សាហកម្មឈីបរបស់ប្រទេស និងទាក់ទាញការវិនិយោគបន្ថែមពីបរទេស។ នេះបើតាមសេចក្ដីរាយការណ៍របស់សារព័ត៌មាន Bloomberg ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបើកមជ្ឈមណ្ឌល ដែលមានឈ្មោះថា «Malaysia Semiconductor IC Design Park» ធ្វើឡើងចំពេលដែលម៉ាឡេស៊ីស្វែងរកការកែលម្អសមត្ថភាពរចនាបន្ទះឈីបរបស់ខ្លួន ហើយបង្កើនសមត្ថភាពលើសពីការធ្វើតេស្ត និងការវេចខ្ចប់ ដែលជាសកម្មភាពត្រូវបានគេចាត់ទុកតាមទម្លាប់ថាមិនសូវស្មុគស្មាញ និងមានតម្លៃទាប។

រដ្ឋមន្ត្រីក្រសួងសេដ្ឋកិច្ចម៉ាឡេស៊ី លោក Rafizi Ramli បាននិយាយកាលពីថ្ងៃអង្គារក្នុងពិធីបើកមជ្ឈមណ្ឌលថា៖ «ចំណាប់អារម្មណ៍លើមជ្ឈមណ្ឌលទិន្នន័យ នឹងបន្តជំរុញឱ្យមានតម្រូវការសម្រាប់បន្ទះឈីប។ នៅចំណុចខ្លះ យើងចង់ងាកចេញឆ្ងាយពីការប្រើប្រាស់បន្ទះឈីប ដែលរចនាឡើងនៅប្រទេសផ្សេងទៀត។ យើងចង់ឃើញមជ្ឈមណ្ឌលទិន្នន័យក្នុងប្រទេសម៉ាឡេស៊ី ប្រើបន្ទះឈីបដែលរចនាដោយប្រជាជនម៉ាឡេស៊ី»។

គួរបញ្ជាក់ថា ម៉ាឡេស៊ីមានរោងចក្រវេចខ្ចប់បន្ទះឈីបជាច្រើនសម្រាប់ក្រុមហ៊ុនអន្តរជាតិធំៗដូចជា Intel ក្រុមហ៊ុន GlobalFoundries និងក្រុមហ៊ុន Infineon Technologies ជាដើម ដែលធ្វើឱ្យប្រទេសនេះក្លាយជាមជ្ឈមណ្ឌលក្នុងតំបន់ដ៏សំខាន់សម្រាប់ខ្សែសង្វាក់ផ្គត់ផ្គង់បន្ទះឈីបសកល។ ម៉ាឡេស៊ី ក៏បានទាក់ទាញក្រុមហ៊ុនបន្ទះឈីបរបស់ចិនផងដែរ។

កាលពីដើមឆ្នាំ ប្រទេសនេះបានសន្យាដាក់ប្រាក់វិនិយោគយ៉ាងហោចណាស់ ២៥ រីងហ្គីតម៉ាឡេស៊ី ដើម្បីគាំទ្រដល់ឧស្សាហកម្មបន្ទះឈីបរបស់ខ្លួន ដោយស្វែងរកការបង្កើនតួនាទីលើវិស័យដដែល ខណៈភាពតានតឹងរវាងសហរដ្ឋអាមេរិក និងចិន បង្កហានិភ័យលើខ្សែសង្វាក់ផ្គត់ផ្គង់ពិភពលោក៕

Related Topics:ម៉ាឡេស៊ី បន្ទះឈីប

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា