រដ្ឋាភិបាលអនុម័តគម្រោង៤៤ដែលមាន​ទុន​វិនិយោគជិត៤០០លានដុល្លារក្នុងខែកក្កដា

ការវិនិយោគដោយផ្ទាល់(FDI) មកពីប្រទេសចិនស្ថិតនៅលំដាប់លេខរៀងទី ១ ដោយបានរួមចំណែក ៦៨,០៦% នៃទុនវិនិយោគសរុបដែលមានទឹកប្រាក់ប្រមាណជាង ៣៩៦លានដុល្លារក្នុងខែកក្កដាកន្លងមកនេះ​​​​ ខណៈពេលដែលការវិនិយោគក្នុងស្រុកគ្របមានចំនួន១៤,២៤% នៃទុនវិនិយោគសរុប។

យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជានៅថ្ងៃទី៧ខែសីហា ក្នុងខែកក្កដា ឆ្នាំ២០២៤ ខ្លួនបានអនុម័តគម្រោងថ្មីចំនួន ៤១គម្រោង និងគម្រោង ពង្រីកផលិតកម្មចំនួន ៣គម្រោង ដែលមានទុនវិនិយោគសរុបប្រមាណជាង ៣៩៦លានដុល្លារអាម៉េរិក និងអាច បង្កើតការងារបានប្រមាណ ២៥ពាន់កន្លែង។

ក្នុងចំណោមគម្រោងវិនិយោគសរុប គម្រោងវិនិយោគដែលមាន ទីតាំងស្ថិតនៅក្រៅតំបន់សេដ្ឋកិច្ចពិសេសមានចំនួន ៣១គម្រោង និងគម្រោងវិនិយោគដែលមានទីតាំងស្ថិត នៅក្នុងតំបន់សេដ្ឋកិច្ចពិសេសមានចំនួន ១៣គម្រោង។

សម្រាប់ គម្រោងវិនិយោគ​នៅក្រៅតំបន់សេដ្ឋកិច្ចពិសេសរួមមានគម្រោងពង្រីកផលិតកម្មរបស់គម្រោងវិនិយោគបង្កើតរោងចក្របោកគក់ ជ្រលក់ពណ៌ និងបោះនៅក្នុងស្រុកគងពិសី ខេត្តកំពង់ស្ពឺ ដែលមានទុនវិនិយោគ បន្ថែមប្រមាណជាង ២១លានដុល្លារអាម៉េរិក និងអាចបង្កើតការងារបន្ថែមបានចំនួន ៧៤កន្លែង។

រីឯគម្រោងវិនិយោគក្នុងតំបន់សេដ្ឋកិច្ចពិសេសរួមានគម្រោងបង្កើតតំបន់សេដ្ឋកិច្ចពិសេស កោះកុង ចេជាង ​ស្ថិតនៅក្នុងស្រុកស្រែអំបិល ខេត្តកោះកុង ដែលមានទុន វិនិយោគចំនួន ១០០លានដុល្លារអាម៉េរិក និងអាចបង្កើតការងារបានចំនួន ៣៣១កន្លែង; គម្រោងវិនិយោគបង្កើតរោងចក្រផលិតសារធាតុកែច្នៃចំណីអាហារ (Galatin)  ស្ថិតនៅក្នុងតំបន់សេដ្ឋកិច្ចពិសេស កោះកុង ចេជាង ក្នុងទុនវិនិយោគប្រមាណជាង ២៦លាន ដុល្លារអាម៉េរិក និងអាចបង្កើតការងារបានចំនួន ១៩៤កន្លែង៕