អាជ្ញាធរ ៖ខេត្ត​ព្រះសីហនុកំពុងទទួលបាន​កំណើនខ្ពស់នៃការវិនិយោគ ពាណិជ្ជកម្ម និងទេសចរណ៍

លោក ឡុង ឌីម៉ង់ អភិបាលរងខេត្តព្រះសីហនុបានថ្លែងមកកាន់កម្ពុជាថ្មីថា ស្របពេលដែល​ស្ថានភាព​សេដ្ឋកិច្ច​ស​កលហាក់សភាពមិនប្រាកដប្រជា និងបញ្ហានៃការកើតឡើងជាថ្មីនៃ​សង្រ្គាម​ពាណិជ្ជកម្មរវាងប្រទេសមហាអំណាចជាពិសេសអាមេរិក និងចិន បណ្តា​ម្ចាស់​រោងចក្រ​ និងសហគ្រាសនានាកំពុងធ្វើការផ្លាស់ប្តូរទិសដៅវិនិយោគរបស់ខ្លួនដើម្បី​បញ្ជៀស​ហានិភ័យមកកាន់ខេត្តរបស់លោកកាន់តែមានកំណើនខ្ពស់ ។ ការបន្តអនុវត្ត​កម្មវិធីពិសេសជម្រុញវិនិយោគនៅខេត្តព្រះសីហនុសម្រាប់ឆ្នាំ២០២៥នេះទៀតក៏ជាបានកំពុងទាក់ទាញការវិនិយោគផងដែរ។

ភាពតានតឹងនៃសង្រ្គាមពាណិជ្ជកម្ម​បានងើបឡើងវិញជាថ្មី ចាប់តាំងពីលោកប្រធានាធិបតី​សហរដ្ឋអាមេរិក ដូណាល់ ត្រាំ ឡើងកាន់អំណាចជាថ្មីដោយបាន​បាន​ដាក់ពន្ធ​ ២៥ ភាគរយ លើ​កាណាដា​ ម៉ិកស៊ិក និងចិន​ ដែល​បង្កជាការ​សង​សឹក​ពីកាណាដា និងចិន​។

ពន្ធលើ​កាណាដា និងម៉ិកស៊ិក ​ត្រូវបាន​ពន្យាពេល​អនុវត្តរហូតដល់ខែក្រោយ ខណៈ​ពន្ធ ២០ ភាគរយ លើទំនិញ​ចិនត្រូវបាន​បន្ត​។ យ៉ាងណា​មិញ ពន្ធរបស់​លោក​ ត្រាំ លើ​ដែកថែប​ និងអាលុយមីញ៉ូមនាំចូលទាំងអស់ រំពឹង​ថា​នឹង​ចូល​ជាធរមាន​កាលពី​ថ្ងៃពុធ​។

លោកបានមានប្រសាសន៍ថា ​​​ ចាប់តាំងពីរាជរដ្ឋាភិបាលបានដាក់ចេញនូវកម្មវិធីពិសេសជម្រុញវិនិយោគនៅខេត្តព្រះសីហនុនៅក្នុងឆ្នាំ២០២៤។ ហើយពេញ១ឆ្នាំ២០២៤ រដ្ឋាភាលបានអនុម័តគម្រោងវិនិយោគដែលមានស្រាប់ កម្រោងវិនិយោគដែលបង្កើតថ្មី គម្រោងវិនិយោគដែលពង្រីកថ្មី និងគម្រោងវិនិយោគដោយអគារជាប់គាំងមានទាំងអស់ប្រមាណ២១៣គម្រោង។

លោកថា៖«សម្មិទិផលនេះគឺយើងបានលើសការរំពឹងទុក។ ការណ៍នេះគឺលទ្ធផលដ៏ល្អមួយ ហេតុដូច្នេះហើយបានជារាជរដ្ឋាភិបាលបានសម្រេចពន្យាអនុវត្តកម្មវិធីពិសេសនេះរហូតដល់ឆ្នាំ២០២៥នេះបន្តទៀត ដោយបន្ថែម១ឆ្នាំទៀត។ ដូច្នេះសម្រាប់២ខែដើមឆ្នាំ២០២៥នេះ យើងមាន ៥៦គម្រោងបន្ថែមទៀតត្រឹមខែកុម្ភៈ»។

ក្រុមការងារជំរុញការវិនិយោគក្នុងខេត្តព្រះសីហនុ គិតត្រឹមខែ កុម្ភៈ ឆ្នាំ ២០២៥ ក្រុមការងារជំរុញការវិនិយោគក្នុងខេត្តព្រះសីហនុ បានសម្រេចជាគោលការណ៍ផ្តល់ការលើកទឹកចិត្តដល់គម្រោងចំនួន ២៦៩ គម្រោង ដែលមានទុនវិនិយោគប៉ាន់ស្មានសរុប ចំនួន ៦,៦៦៩ លានដុល្លារអាមេរិក។ 

បើយោងតាមលោក ឡុង ឌីម៉ង់ សម្រាប់ស្ថានភាពបរិយាកាសវិនិយោគ និងចរន្តសេដ្ឋកិច្ច​​​របស់ខេត្តព្រះសីហនុចាប់តាំងពីចុងឆ្នាំ២០២៤ រហូតមកដល់ខែមីនានេះ លោកសង្កេតឃើញថាស្ថានភាពសេដ្ឋកិច្ចមានការរើបឡើងវិញផង និងមានការកើនឡើងនូវមុខសញ្ញាអាជីវកម្ម វិនិយោគ ក៏ដូចជាការដើរលេងកម្សាន្តរបស់ប្រជាពលរដ្ឋ និងអន្តរជាតិ ទាំងផ្នែកការងារ និងវិនិយោគ​ ការងារពាណិជ្ជកម្ម និងទេសចរណ៍។

លោកថា៖« យើងឃើញថាការងើបឡើងវិញច្រើនគួរជាទីកត់សម្គាល់។ ទន្ទឹមនឹងនោះលំហូរវិនិយោគដោយផ្ទាល់ពីក្រៅប្រទេស (FDI) ក៏មានការកើនឡើង ជាពិសេសស្របទៅនឹង​និន្នាការ​សេដ្ឋកិច្ច​សកល ក៏ដូចជាសង្រ្គាមពាណិជ្ជកម្មការរើទីតាំងរបស់បណ្តាក្រុមហ៊ុនមួយ​ចំនួនពីខាងក្រៅនោះក៏បានរៀបចំបង្កើតនូវរោងចក្រ សហគ្រាសនានានៅក្នុងខេត្តព្រះសីហនុ​យើងនេះដែរ»៕