ព័ត៌មានអន្ដរជាតិ

ចិនគ្រោងបង្កើនបេឡាជាតិសន្តិសុខសង្គម ដើម្បីជួយសង្គមមានមនុស្សចាស់ច្រើន

បានផុស

១ ខែ មុន

នៅ

ថ្ងៃពុធ ២១ សីហា ២០២៤

ដោយ

ប្រទេសចិន នឹងបង្កើនបេឡាជាតិសន្តិសុខសង្គមរបស់ខ្លួន ឱ្យវា «ធំ និងរឹងមាំជាងមុន» ដើម្បីជួយទ្រទ្រង់សង្គមប្រជាជនដែលមានមនុស្សចាស់ច្រើន ចំពេលដែលអត្រាកំណើតថ្មី និងកម្លាំងពលកម្មវ័យក្មេងដើម្បីជួយមនុស្សចាស់ធ្លាក់ចុះ។ នេះបើតាមការចុះផ្សាយបន្តរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្រ្តីរបស់មូលនិធិនេះបាននិយាយក្នុងអត្ថបទចុះផ្សាយដោយកាសែតបក្សកុម្មុយនិស្ត Study Times កាលពីថ្ងៃចន្ទថា បេឡាជាតិសន្តិសុខសង្គម ដែលបច្ចុប្បន្នមានទំហំ ៤០៦ ប៊ីលានដុល្លារ គឺជាឧបករណ៍ឆ្លើយតបយ៉ាងមានប្រសិទ្ធិភាពទៅនឹងសង្គមប្រជាជនដែលមានវ័យចំណាស់ច្រើន ក៏ដូចជាកែលម្អយន្តការគោលនយោបាយសម្រាប់ការអភិវឌ្ឍឧស្សាហកម្មថែទាំមនុស្សចាស់។

ក្នុងរយៈពេលមួយទសវត្សរ៍ខាងមុខ ប្រជាជនចិនប្រហែល ៣០០ លាននាក់ រំពឹងថានឹងចូលនិវត្តន៍ ខណៈក្រុមហ៊ុនទិន្នន័យ Euromonitor បានប៉ាន់ប្រមាណថា នៅឆ្នាំ ២០៤០ មនុស្សម្នាក់ក្នុងចំណោម២នាក់ដែលមានអាយុលើសពី ៦៥ ឆ្នាំនៅតំបន់អាស៊ីប៉ាស៊ីហ្វិក គឺរស់នៅក្នុងប្រទេសចិន។

មន្រ្តីនិយាយថា បេឡាជាតិសន្តិសុខសង្គម ដែលបង្កើតឡើងក្នុងឆ្នាំ ២០០០ គឺជាមូលនិធិបម្រុងយុទ្ធសាស្រ្តសម្រាប់តម្រូវការសន្តិសុខសង្គម ក្នុងអំឡុងពេលដែលសង្គមមនុស្សចាស់ឡើងដល់ចំណុចកំពូល ហើយក្លាយជាបន្ទុកដ៏ធ្ងន់សម្រាប់ប្រព័ន្ធសន្តិសុខសង្គមរបស់ប្រទេស។

បើតាមមន្រ្តីដដែល ចិនបានឈានចូលដំណាក់កាលសង្គមមនុស្សចាស់កម្រិតមធ្យមរួចទៅហើយ ដោយបន្ថែមថា ភាពចាស់នៃសង្គមប្រជាជនដ៏ធ្ងន់ធ្ងរនាទសវត្សរ៍ខាងមុខនេះ នឹងធ្វើឱ្យការពង្រីក និងពង្រឹងមូលនិធិបម្រុងយុទ្ធសាស្ត្រ ក្លាយជាបញ្ហាបន្ទាន់ និងលំបាក ដែលមិនធ្លាប់មានពីមុនមក។

តាមការប៉ាន់ស្មានរបស់បណ្ឌិតសភាវិទ្យាសាស្ត្រចិន ប្រព័ន្ធសោធននិវត្តន៍របស់ប្រទេសចិននឹងអស់ប្រាក់នៅឆ្នាំ ២០៣៥ ។ ហេតុដូច្នេះហើយ បេឡាជាតិសន្តិសុខសង្គម នឹងកែលម្អ និងពង្រីកទំហំនៃការវិនិយោគមូលនិធិសោធននិវត្តន៍ និងបង្ហាញយ៉ាងសកម្មនូវព័ត៌មានហិរញ្ញវត្ថុសំខាន់ៗដល់សាធារណៈជន ក៏ដូចជាអនុវត្តការវិនិយោគក្នុងលក្ខណៈបើកចំហ និងប្រកបដោយតម្លាភាព។ វាក៏នឹងបង្កើនការវិនិយោគក្នុងទីផ្សារមូលធនក្នុងស្រុក ដោយបង្កើនការវិនិយោគភាគហ៊ុនរយៈពេលវែងក្នុងវិស័យយុទ្ធសាស្ត្រ ដែលទាក់ទងទៅនឹងសេដ្ឋកិច្ចជាតិ និងជីវភាពរស់នៅរបស់ប្រជាជន៕