កសិករបារម្ភទីផ្សារមៀនប៉ៃលិន ខណៈការបញ្ជាទិញធ្លាក់ចុះ

កសិករដាំមៀននៅខេត្តប៉ៃលិន បានបង្ហាញការព្រួយបារម្ភពីទីផ្សារផ្លែមៀនធ្លាក់ចុះ ខណៈការ​បញ្ជា​ទិញមានកំណត់នៅឆ្នាំនេះ ពោលគឺការបញ្ជាទិញមានការធ្លាក់ចុះ បើប្រៀបធៀបនឹងឆ្នាំមុនៗ។

លោក ជាប វិចិត្រ កសិករដាំមៀនប៉ៃលិន នៅក្រុងប៉ៃលិន បានប្រាប់ថា ស្ថានភាពទិន្នផលផ្លែមៀននៅឆ្នាំនេះ មាន​ភាពល្អប្រសើរ ដោយរំពឹងថា នឹងទទួលបានផលច្រើនជាងឆ្នាំមុន ប៉ុន្តែលោកបារម្ភពី​ទីផ្សារ​នៅ​ពេលខាងមុខ ដោយសារការបញ្ជាទិញពីក្រុមហ៊ុនធ្លាក់ចុះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជាប វិចិត្រ បញ្ជាក់ថា៖ «ឆ្នាំនេះហាងឆេងពិបាកដែរ រាល់ឆ្នាំពេលមៀនចេញក្ដឹប យើង​ទៅ​ចុះកុងត្រាជាមួយសៃឡូចិន យើងអាចបានលុយកក់ ១០ លាន ហើយដល់ឥឡូវមៀន​យើង​ចេញ​ផ្កាហើយអោយគេមើលកក់លុយ គេថា មៀនគេគ្រប់តោននាំចេញទៅចិនហើយ​ផ្អាក​ទទួល​​​​ទិញសិន»។

លោក ជាប វិចិត្រ បញ្ជាក់ថា ការមិនទទួលបានប្រាក់កក់ នៅពេលនេះ ប្រឈមនឹងការធ្លាក់​ចុះ​តម្លៃ​មៀនដោយបង្ខំលក់​ឱ្យឈ្មូញកណ្ដាលក្នុងតម្លៃទាប ឬក៏ចាល់លក់មិនចេញក៏អាចថាបាន។

អ្នកស្រី អ៊ុង សុផល កសិករដាំមៀន ១០ ហិកតា នៅភូមិតាង៉ែនលើ សង្កាត់ប៉ៃលិន ខេត្តប៉ៃលិន បាន​ប្រាប់ថា ការប្រមូលផល​មៀន​ប៉ៃលិនបានចាប់ផ្ដើមបណ្ដើៗ នៅចម្ការជិតចម្ការមៀន​អ្នកស្រី។

ចម្ការមៀនអ្នកស្រី បានចុះកុងត្រាជាមួយក្រុមហ៊ុនចិនក្នុងតម្លៃ ៣០០០ ពាន់រៀល​ក្នុងមួយគីឡូក្រាម ទាបជាងឆ្នាំមុន ៥០០ រៀល។

ក្រុមហ៊ុន ឆាយណា ជីនវ័រយាន និងតំណាងសហគមន៍ផ្លែមៀនប៉ៃលិនកាលពីថ្ងៃទី ២០ ខែសីហា ឆ្នាំ ២០២៤ បានចុះកិច្ចសន្យាទិញផ្លែមៀនប៉ៃលិនក្នុងតម្លៃ ៣០០០ រៀល ក្នុងមួយគីឡូក្រាម សម្រាប់​រដូវ​កាលថ្មី ឆ្នាំ ២០២៤ ពោលគឺមានតម្លៃទាបជាងឆ្នាំមុនបន្តិច។

លោក សាយ សុផាត ប្រធានមន្ទីរកសិកម្មរុក្ខាប្រមាញ់ និងនេសាទខេត្តប៉ៃលិនប្រាប់កម្ពុជាថ្មីថា ក្រុមហ៊ុន ឆាយណា​ជីនវ័រយាន បាន​ចុះ​កិច្ច​សន្យា​ទិញផ្លែមៀនប៉ៃលិនរដូវកាលថ្មី ដោយធ្វើកិច្ចសន្យាពីរដំណាក់កាល ពោលគឺដំ​ណាក់​កាល​​​​​ទី១ ចាប់ពីខែសីហា ដល់ខែវិច្ឆិកា ក្រុមហ៊ុនទិញក្នុងតម្លៃ ៣០០០ រៀល ក្នុង​មួយ​គីឡូ​ក្រាម​ ដំណាក់កាលទី២ ចាប់ពីខែធ្នូ រហូតដល់ខែមិថុនា ឆ្នាំ ២០២៥ ក្រុមហ៊ុនទិញ​ក្នុងតម្លៃ ៣៥០០ រៀល ក្នុងមួយគីឡូក្រាម។

យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ គិតត្រឹមឆមាសទី១ ឆ្នាំ ២០២៤ ការនាំចេញផ្លែមៀនស្រស់របស់កម្ពុជាទៅទីផ្សារអន្តរជាតិ សម្រេចបានជាង ១ ម៉ឺន ៤ ពាន់តោន កើនឡើងជាង ១២០ ភាគរយ បើធៀបនឹងរយៈ​ពេលដូច​គ្នា​កាល​​ពីឆ្នាំមុន។

ការនាំ​ចេញ​ផ្លែមៀនប៉ៃលិនក្នុងទំហំទឹកប្រាក់ប្រមាណ ២២ លានដុល្លារ ការកើនឡើង ១២៩ ​ភាគរយ ​នៅក្នុងឆមាសទី១ឆ្នាំនេះ។

នៅក្នុងឆ្នាំ២០២៣ កម្ពុជាបាននាំចេញផ្លែមៀន​ស្រស់​មានបរិមាណ ១ ម៉ឺន ៧ ពាន់តោន គិតជា​ទឹកប្រាក់សរុបចំនួន ២៤,៧៥ ​លានដុល្លារ៕

អត្ថបទ៖ ឡេង ដេត