ពីអ្នកលក់អីវ៉ាន់តាមផ្សារ ក្លាយម្ចាស់សិប្បកម្មផលិតកេសក្រដាសដ៏ធំមួយក្នុងរាជធានីភ្នំពេញ

សហគ្រិនស្រ្ដីវ័យក្មេងម្នាក់ ផ្ដើមការងារដំបូងពីអ្ន​កលក់អីវ៉ាន់តាមផ្សារ មកក្លាយជាម្ចាស់សិប្បកម្មផលិតកេសក្រដាសដ៏ធំមួយក្នុងរាជធានីភ្នំពេញ ស្របពេលដែលតម្រូវកេសក្រដាសនៅក្នុងស្រុកកំពុងតែមានតម្រូវការខ្ពស់ពីម្ចាស់សហគ្រាស និងរោងចក្រនានា។

ស្ថិតក្នុងវ័យត្រឹមតែ ២៩ឆ្នាំ កញ្ញា វង្ស វត្តី ជាសហគ្រិនឆ្នើមម្នាក់ ដែលហ៊ានចាយដើមទុនជាង ២លានដុល្លារ បើកដំណើរការសិប្បកម្មផលិតកេសក្រដាស ដើម្បីផ្គត់ផ្គង់ទីផ្សារក្នុងស្រុក កាន់បន្ថយការនាំចូលពីក្រៅប្រទេស។

ជាម្ចាស់សិប្បកម្មផលិតកេសក្រដាសមេគង្គ ស្ថិតនៅខណ្ឌពោធិ៍សែនជ័យ រាជធានីភ្នំពេញ កញ្ញា វង្ស វត្តី បានប្រាប់ កម្ពុជាថ្មី ថា សិប្បកម្មផលិតកេសក្រដាសនេះ បានបើកដំណើរការតាំងពីដើមឆ្នាំ ២០១៨ មកម្ល៉េះ។ កញ្ញា បន្តថា ដំបូងឡើយការបើកដំណើរការសិប្បកម្មមួយនេះ ក៏បានជួបឧបសគ្គ​បន្ដិចបន្ដួចផងដែរ ពោលគឺស្ថិតនៅត្រង់ថា ការចំណាយដើមទុនច្រើនក្នុងការទិញម៉ាស៊ីនមកពីបរទេស និងការប្រើប្រាស់ម៉ាស៊ីន ហាក់មិនទាន់ស្ទាត់ជំនាញនៅឡើយ។

កញ្ញា វង្ស វត្ដី បានប្រាប់ឱ្យដឹងថា ទាក់ទងនឹងបច្ចេកទេសផលិតជារឿងមួយ ចំណែកឯការស្វែងរកទីផ្សារសម្រាប់លក់ចេញជារឿងមួយទៀតដោយឡែកដាច់ពីគ្នា។ ជាក់ស្ដែង ដំបូងឡើយការស្វែងទីផ្សារក៏មានការលំបាកបន្ដិចបន្ដួចផងដែរ ខណៈដែលអតិថិជន ម្ចាស់សហគ្រាស និងរោងចក្រខ្លះ ក៏នៅពុំទាន់ដឹង និងបានស្គាល់ច្បាស់ថា ខ្មែរក៏អាចផលិតកេសក្រដាសបាន ដោយគិតថាក្រដាសកេសទាំងនេះ សុទ្ធតែបាននាំចូលមកពីក្រៅប្រទេស។

កញ្ញា វង្ស វត្ដី បានបន្ថែមទៀតថា សម្រាប់ពេលបច្ចុប្បន្ននេះ សិប្បកម្មផលិតកេសឡាំងក្រដាសរបស់កញ្ញា កំពុងទទួលបានការគាំទ្រយ៉ាងខ្លាំងពីអតិថជនក្នុងស្រុក ជាពិសេសម្ចាស់រោងចក្រ និងសហគ្រាស ដែលមានតម្រូវការទិញកេសក្រដាសរបស់សិប្បកម្មកញ្ញា ដើម្បីយកទៅរៀបចំដាក់ផលិតផ្សេងៗ ក្នុងនោះមានដូចជា៖ ឡាំងដាក់ខោអាវនាំចេញទៅក្រៅប្រទេស​ ឡាំងដាក់ផលិតផលសាប៊ូ ឡេ និងម្សៅ ឡាំងដាក់សាច់ជ្រូកខ្វៃ និងកេសឡាំងក្រដាសសម្រាប់ដាក់ស្បែកជើង ជាដើម។

សហគ្រិនវ័យក្មេងរូបនេះ បានបន្តទៀតថា ដោយមានការជំរុញពីក្រុមគ្រួសារ រួមផ្សំនឹងជំនាញផ្នែកទីផ្សាររបស់ខ្លួនដែលមានស្រាប់  ទើបជំរុញទឹកចិត្តកញ្ញា ពីបុគ្គលិកផ្នែកទីផ្សារមកជាម្ចាស់សិប្បកម្មដ៏ធំមួយនាពេលបច្ចុប្បន្ននេះ និងកំពុងទទួលបានភាពជោគជ័យយ៉ាងឆាប់រហ័ស ផងដែរ។

កញ្ញា បានប្រាប់ឱ្យដឹងទៀតថា សម្រាប់សង្វាក់ផលិតកម្មក្នុងសិប្បកម្មផ្ទាល់ជាមធ្យម សិប្បកម្មអាចផលិតប្រភេទក្រដាសកេស បានជាង ៥០០កេស ដោយចំណាយពេលត្រឹមតែ៣ម៉ោង នៃចំនួនម៉ាស៊ីនផលិតចំនួន៤ធំៗ តែអ្វីដែលកាន់តែពិសេសនោះ បើគិតជារយៈពេលក្នុងមួយខែវិញ សិប្បកម្មដែលមានបុគ្គលិកបម្រើការត្រឹមតែ ២០នាក់នេះ អាចផលិតកេសក្រដាសសម្រាប់ផ្គត់ផ្គង់ទីផ្សារក្នុងស្រុក បានចំនួនរាប់ម៉ឺនកេស ផងដែរ។

កញ្ញា វង្ស វត្ដី​ ក៏បានបញ្ជាក់ទៀតដែរថា សម្រាប់ចក្ខុវិស័យទៅថ្ងៃអនាគតវិញ សិប្បកម្មរបស់កញ្ញា ក៏គ្រោងនឹងពង្រីកខ្លួនឱ្យកាន់តែធំជាងនេះ ឬអាចបានត្រឹមជាសហគ្រាសខ្នាតធំមួយ ទោះបីមិនមានលទ្ធភាពវិវត្តខ្លួនទៅជារោងចក្រដែលមានស្ដង់ដាក៏ដោយ ការធ្វើបែបនេះ គឺដើម្បីជួយជំរុញសេដ្ឋកិច្ចក្នុងស្រុកឱ្យកាន់តែរីកចម្រើន និងកាន់សម្បូរបែប កាត់បន្ថយការនាំចូលផលិតផលមួយចំនួនពីក្រៅប្រទេស ផងដែរ៕

---

អត្ថបទ ៖ សួស សិត