អ្នកជំនាញអះអាងថា ទីផ្សារអចលទ្រព្យចាប់ផ្ដើមកម្រើកឡើងវិញ ខណៈតម្លៃធ្លាក់ចុះ

អ្នកជំនាញវិស័យអចលនទ្រព្យបានលើកឡើងថា ស្ថានភាព​ទីផ្សារទិញ-លក់អចលនទ្រព្យ​បាន​ចាប់​​​​ផ្ដើម ​កម្រើកឡើងវិញនៅក្នុងឆ្នាំ ២០២៤ បន្ទាប់ពីបានឆ្លងកាត់ដោយសារជំងឺកូវីដ១៩ និង​សង្គ្រាម​។

លោកបណ្ឌិត គីម ហ៊ាង អគ្គនាយកបុរី វិមានសំណាង បានលើកឡើងថា វិបត្តិដែលបានកើត​ឡើង​​​​នៅចុងឆ្នាំ ២០១៩ បានបញ្ចប់នៅក្នុងឆ្នាំ ២០២៤ នេះ ដែលលោកចាត់ទុកថា ជាឆ្នាំចុង​ក្រោយនៃវិបត្តិ។

លោកបណ្ឌិត គីម ហ៊ាងបញ្ជាក់ថា៖ «រឿងអាក្រក់បានកើតឡើងរួចហើយ បើនិយាយពី​ក្រុម​ហ៊ុន ឬបុគ្គលដែលពាក់ព័ន្ធនឹងវិស័យដីធ្លី អ្នកណា​ ដែលត្រូវក្ស័យធន គឺគាត់ក្ស័យរួចហើយ អ្នកណា​ដែលលំបាកគឺលំបាកហើយ អញ្ចឹងវាដល់ពេលមួយដែល​ញែក​ដាច់ថាតើនរណា ជាមនុស្ស​ដែលអាចឈរជើងបាន ហើយនរណាដែលត្រូវក្ស័យធន អញ្ចឹងន​រណាដែលអាច​ឈរជើងដល់បច្ចុប្បន្ន អ្នកនោះគឺគាត់ឆ្លងផុតវិបត្តិរួចហើយ»។

គម្រោង បុរី ខុនដូ ដែលដំណើរការដល់បច្ចុប្បន្ន មានន័យថា គម្រោងហ្នឹងគាត់ដើរទៅមុខហើយ ពីព្រោះគម្រោង ដែលប្រឈមបំផុតគាត់បានបិទហើយហ្នឹង។

លោកបណ្ឌិត គីម ហ៊ាង មើលឃើញថា ក្នុងឆ្នាំ ២០២៤ ការទិញ លក់ អចលនទ្រព្យ ចាប់ផ្ដើមកម្រើកឡើងវិញ ប៉ុន្តែមិនច្រើនដូចមុនពេលកូវីដ១៩ នោះទេ។

លោកបណ្ឌិត គីម ហ៊ាងថ្លែងថា៖ «បើយើងលក់ដីមួយកន្លែង ១ លានដុល្លារ ចង់ មិនចង់ គឺមានគេសួរ ហើយគេតថ្លៃ លក់តម្លៃប៉ុណ្ណា គឺអាស្រ័យលើតម្រូវការរៀងៗខ្លួន ខ្ញុំមើលឃើញថា ក្នុងរយៈពេល ១០ ខែ ឆ្នាំ ២០២៤ ការលក់ដូរដីធ្លី មានសកម្មភាពឡើងវិញក្នុងកម្រិតមួយដែលថា អាចលក់​បាន​អាស្រ័យ​លើតម្លៃ»។

លោកបណ្ឌិត គីម ហ៊ាង បានបញ្ជាក់ថា តម្លៃបុរីនីមួយៗ មានស្ថានភាពខុសគ្នា និយាយ​ពីម្ចាស់​បុរី ប្រសិនបើចរន្តសាច់ប្រាក់របស់គាត់អាចទប់បាន គឺគាត់មិនចុះថ្លៃទេ ប៉ុន្តែបុរី​មួយ​ចំនួន ចរន្ត​សាច់​ប្រាក់មានបញ្ហា ដូច្នេះចង់មិនចង់ គាត់អាចនឹងចុះថ្លៃក្នុង​កម្រិត​មួយច្រើន ហើយ​ក៏មាន​បុរីខ្លះ​ក៏ដំណើរការតាមដំណើរ។

លោក ង៉ែត ជូ អ្នកវិភាគសេដ្ឋកិច្ចឯករាជ្យ បានលើកឡើងថា ការទិញ លក់ ចាប់ផ្ដើម​មាន​សញ្ញាកម្រើកឡើងវិញ ប៉ុន្តែមិនច្រើនទេ។ ជាទូទៅ​នៅពេលដែលមានការផ្គត់ផ្គង់ច្រើន នោះតម្លៃនឹងល្អ ហើយអ្នកដែលមានលទ្ធភាពនៅ​ពេល​បច្ចុប្បន្ន អ្នកខ្លះក៏ចាប់យកឱកាស ហ៊ានវិនិយោគ ប៉ុន្តែក៏មានអ្នកប្រឈមនឹងជាប់គាំង​ក្នុង​ការលក់ចេញច្រើន ដោយសារ​តែទំ​ហំនៃការផ្គត់ផ្គង់នៅលើទីផ្សារ ដូចជា ផ្ទះ ដី និងសំណង់​អាគារ គឺសម្បូរមានអ្នកលក់។

លោក ង៉ែត ជូ ថ្លែងថា៖ «ប្រតិបត្តិការទិញ លក់ ចាប់ផ្ដើមមានដង្ហើមខ្លះ គឺជាការចាប់យក​ឱកាសរបស់អ្នកដែលមានលទ្ធភាពហិរញ្ញវត្ថុ ឧទាហរណ៍ថា មុនពេលកូវីដ១៩ មួយម៉ែត្រ ការ៉េ ៥០០ ដុល្លារ អញ្ចឹងដើម្បីបាន​លុយយកទៅ​ប្រើប្រាស់គាត់សុខចិត្តលក់ចុះថ្លៃ ៥០% ឬ ២៥០ ដុល្លារ អញ្ចឹងមានការទិញ លក់ និងអាចមានអ្នក​ចាប់យកឱកាស នោះទីផ្សារហ្នឹង​ចាប់ផ្ដើមដំណើរការឡើងវិញ»។

លោក ង៉ែត ជូ បន្តថា នៅតំបន់ជាយក្រុង មានការដាក់លក់អចលនទ្រព្យច្រើន ខណៈតម្លៃបានធ្លាក់ចុះពី ៤០ ទៅ ៥០% ទើបមានប្រតិបត្តិការទិញ-លក់ ប៉ុន្តែក៏អាស្រ័យលើប្រភពហិរញ្ញវត្ថុរបស់ម្ចាស់អចលទ្រព្យទី១ រឿងកម្រិតបំណុលរបស់គាត់ប្រសិនបើមានបំណុលតិច វាអត់បញ្ហាទេ ម្យ៉ាងទៀតប្រភពនៃបំណុល ប្រសិនបើធនាគារ អាចជែកគ្នាអាចរៀប​ចំឥណទានឡើងវិញបាន ចំណុចនេះ ហើយដែលធ្វើឱ្យអ្នកខ្លះ ដីគាត់ធ្លាប់លក់បាន ១ ការ៉េ ៥០០ ដុល្លារ បើឱ្យគាត់ ៣០០ ដុល្លារ គាត់អត់លក់ទេ គាត់សុខចិត្តទៅរៀបចំឥណទានឡើងវិញ។

ប៉ុន្តែប្រសិនបើម្ចាស់ដីគាត់មានប្រភពកម្ចីច្រើន លើសពីធនាគារ ឧទាហរណ៍ថា គាត់ចងការប្រាក់ពីឈ្មួញឯកជន អាហ្នឹងបំណុលធ្ងន់ហើយ អញ្ចឹងចុះ ៥០% ឬ ៦០ ក៏លក់ដែរ ពីព្រោះគាត់មានសម្ពាធច្រើន។

យោងតាមរបាយការណ៍របស់ក្រុមហ៊ុន CBRE នៅត្រីមាសទី៣ ឆ្នាំ ២០២៤ បង្ហាញថា វិស័យអចលនទ្រព្យ និងសំណង់នៅកម្ពុជាមានកំណើនយឺត ដោយការវិនិយោគភាគច្រើនបានហូរចូលទៅក្នុងវិស័យឧស្សាហកម្ម ទេសចរណ៍ និងកសិកម្ម។ ចំណែកទំហំវិនិយោគក្នុងឆ្នាំ២០២៤ ត្រូវបានគេព្យាករណ៍ថា នឹងមានកំណើនខ្ពស់បំផុតដល់ ៥,៥ពាន់​លាន​ដុល្លារអាម៉េរិក៕

អត្ថបទ៖ ឡេង ដេត