អ្នកជំនាញបារម្ភថា​​ ការលក់ឡាននៅថៃ នឹង​បន្តធ្លាក់ចុះ​ ១-២ ឆ្នាំ ទៅ​មុខទៀត​

​ការធ្លាក់ចុះ​នៃ​ការ​លក់​ឡាន​ក្នុងប្រទេស​ថៃ​ រំពឹង​ថា​នឹង​បន្ត​ញាំញី​ឧស្សាហកម្មរថយន្ត​ថៃ​ យ៉ាងហោចណាស់​ចន្លោះ​ពី​ ១-២ ឆ្នាំ​ខាង​មុខ​ទៀត​ ដោយ​ការ​លក់ក្នុងស្រុក​សរុប​រំពឹង​ថា​នឹង​ធ្លាក់​ចុះ​ដល់​ ៥៦០ ០០០ នៅឆ្នាំ​ ២០២៤​។ នេះ​បើ​តាម​ការ​ឱ្យដឹង​របស់​ក្រុមហ៊ុនផលិត​រថយន្ត​​កូរ៉េខាង​ត្បូង​ Hyundai ប្រចាំប្រទេស​ថៃ​។

ការ​លក់​ឡាន​ក្នុងស្រុក​ប្រចាំឆ្នាំ​កាល​ពីឆ្នាំ​ ២០២៣ មាន​ប្រមាណ​ ៧៧៥ ៧៨០ គ្រឿង​។ យ៉ាងណា​មិញ​ ​ឧស្សាហកម្មរថយន្ត​ថៃ​កំពុង​ប្រឈម​មុខ​នឹង​ការ​ធ្លាក់ចុះ​ ដោយ​ទីផ្សារ​មាន​បញ្ហាជាច្រើន រួមទាំងកំណើនសេដ្ឋកិច្ចថៃយឺតយ៉ាវ​ កម្សោយ​នៃ​អំណាចទិញរបស់អតិថិជន​ និង​លក្ខខណ្ឌវិនិច្ឆ័យកម្ចីរថយន្តដ៏តឹងរឹងពីធនាគារ និងក្រុមហ៊ុនផ្តល់ហិរញ្ញប្បទានរថយន្តដោយសារតែ​បំណុល​គ្រួសារ​ខ្ពស់​។ ​

នាយកគ្រប់គ្រងក្រុមហ៊ុន Hyundai Mobility Thailand លោក Wallop Chalermvongsavej មានប្រសាសន៍ថា ប្រសិនបើរដ្ឋាភិបាល​មិនស្វែងរកមធ្យោបាយដើម្បីជួយលើកទីផ្សារទេ នោះ​ស្ថានភាពនឹងកាន់តែអាក្រក់ទៅៗ។ លោក​បន្តថា​៖ «រដ្ឋាភិបាលត្រូវតែប្រុងប្រយ័ត្នចំពោះការធ្លាក់ចុះនៃឧស្សាហកម្មរថយន្ត»។

ភាពលំបាកក្នុងការទទួលបានប្រាក់កម្ចី គឺជាកត្តាចម្បងនៅពីក្រោយការធ្លាក់ចុះនៃការលក់រថយន្តនៅឆ្នាំនេះ ដែលបណ្តាលឱ្យក្លឹបឧស្សាហកម្មយានយន្តនៃ​សហព័ន្ធឧស្សាហកម្មថៃ កាត់បន្ថយគោលដៅផលិតរថយន្តសរុបរបស់ខ្លួន មកត្រឹម ១,៥ លានគ្រឿងសម្រាប់ឆ្នាំ ២០២៤ ​ដែលជាកម្រិតទាបបំផុតចាប់តាំងពី ២០២១។

នៅឆ្នាំ ២០២៣​ ការផលិតរថយន្តសរុបមានចំនួន ១,៨៤ លាន​គ្រឿង​។ ​លក្ខខណ្ឌវិនិច្ឆ័យប្រាក់កម្ចីតឹងរ៉ឹង បានចាប់ផ្តើមធ្វើឱ្យទីផ្សារធ្លាក់ចុះនៅឆ្នាំនោះ ដែលបណ្ដាល​ឱ្យការលក់រថយន្តក្នុងស្រុកធ្លាក់ចុះ ជាពិសេស​ប្រភេទរថយន្តភីកអាប់សុទ្ធ។

ទោះបីជាធនាគារកណ្តាលថៃបាននិយាយថា បំណុលគ្រួសារធៀប​នឹង​ផលិតផលក្នុងសរុប បាន​ធ្លាក់ចុះ​មក​ត្រឹម​ ៨៩,៨ ភាគរយ​ នៅ​ត្រីមាស​ទី​២​ ពី​ ៩០,៨ ភាគរយ​ នៅត្រីមាសទី​១​ក្ដី​ ប៉ុន្តែ​វា​នៅ​តែ​មាន​ទំហំ​ធំ​ ដែល​នេះ​ជះ​ឥទ្ធិពល​ខ្លាំង​លើ​ការ​សម្រេច​ចិត្ត​របស់​ធនាគារ​ក្នុងការ​ផ្ដល់​ប្រាក់​កម្ចី​។

​​ជាផ្នែក​មួយ​នៃ​ការ​ដោះស្រាយ​បញ្ហា​ លោក Wallop បានអំពាវនាវដល់រដ្ឋាភិបាលឱ្យពិចារណាកាត់បន្ថយពន្ធ​ ដើម្បី​ជំរុញ​ការ​លក់​ឡាន​ រួមជាមួយនឹងវិធានការដើម្បីទប់ទល់នឹងបញ្ហាបំណុលគ្រួសារផ្សេងៗ​៕