បំណុលឯកជនរបស់កម្ពុជា កើនដល់ដល់ជិត ៦១ ពាន់លានដុល្លារ

គិតត្រឹមខែតុលា ឆ្នាំ២០២៤ ឥណទានវិស័យឯកជនផ្តល់ដោយគ្រឹះស្ថានធនាគារ និងហិរញ្ញវត្ថុទៅក្នុង​វិស័យ​សេដ្ឋ​​កិច្ចមានចំនួនជិត ៦១ ពាន់លានដុល្លារ កើន ២,២% ធៀបនឹងឆ្នាំមុន។ នេះបើយោងតាម​របាយ​ការណ៍របស់ធនាគារជាតិ។

ការកើនឡើងនេះរួមចំណែកចម្បងដោយកំណើនឥណទានទៅកាន់វិស័យជួញដូរដុំ និងរាយ សំណង់ អចលនទ្រព្យ កម្មន្តសាល និងវិស័យផ្សេងៗទៀត។​ ឥណទានជាប្រភពទុន​ដ៏សំ​ខាន់​សម្រាប់អ្នកប្រើប្រាស់ និងក្រុមហ៊ុន​សហគ្រាស​ក្នុងការ​ពង្រីកអាជីវកម្ម និងដើរតួនា​ទីយ៉ាង​សំខាន់ក្នុងការគាំទ្រដល់សកម្មភាពសេដ្ឋកិច្ច បង្កើត​ឱកាសការងារ និងបង្កើនផលិតភាព។

លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិតសភាកម្ពុជា មានប្រសាសន៍ថា៖ «បំណុលក្នុងវិស័យឯកជនមាន ៥៧ ពាន់លានដុល្លារ ពីមុនបើយើងប្រៀបធៀបជាមួយ GDP វាឡើងទៅដល់ ១៨០% នៃ GDP តែដល់ឥឡូវនៅសល់តែ ១៣៥% ដោយសារតែ GDP របស់យើងបានធ្វើការកែតម្រូវ ពីមុនយើងគណនាតាមថ្លៃឆ្នាំចាស់ ឆ្នាំ ២០០០ ចឹងយើង​អាច​ស្រម៉ៃមើល ឆ្នាំ ២០០០ យើងយកមកគុណថ្លៃម្ហូបអាហារ គុយទាវមួយចានថ្លៃតែ ៥០០០ ដល់ឥឡូវគុយទាវមួយចានមួយម៉ឺនរៀល អញ្ចឹងតម្លៃគុណនឹង ២ នៅពេលដែលយើងគុណមក GDP យើងឡើង ៤៥ ពាន់លាន    អញ្ចឹងបំណុល ៥៧ ពាន់លាន យក​​មកចែក ៤៥ ពាន់លាន វានៅសល់តែ ១៣៥% អញ្ចឹងសម្ពាធបំណុលនេះ បើយើង ធៀប​ជាមួយ GDP វាហាក់ដូច​ជា​មិនទាន់មានបញ្ហាទេ ដែលបំណុលនៅលើសកល​លោកគឺ​យើងឃើញ​ថា មាន ១៤៦% នៃ GDP របស់សកលលោក»។

លោកបណ្ឌិត គី សេរីវឌ្ឍន៍ បន្ថែមថា បំណុលវិស័យឯកជន​របស់​កម្ពុជា នៅទាបជាងសក​ល​លោក។ លោកថា ​បំណុល​ឯកជនភាគច្រើនគឺជាឥណទានលក្ខណៈបុគ្គល មានដល់ទៅ ៥០ ពាន់លាន ខណៈកម្ចីអាជីវកម្មមានត្រឹមតែ ៧ ពាន់​លានដុល្លារ។

យោងតាមទិន្នន័យរបស់ធនាគារជាតិនៃកម្ពុជា បង្ហាញថា ការផ្តល់ឥណទានតាមវិស័យសេដ្ឋកិច្ច រួមមាន៖ ការជួញដូរដុំ និងរាយ ប្រមាណ ១៥ ពាន់លានដុល្លារ កើន ០,០១% សំណង់ប្រមាណជាង ៧ ពាន់លានដុល្លារ កើន ៣៣,៣% ការទិញផ្ទះជាកម្មសិទ្ធិផ្ទាល់ខ្លួន ប្រមាណ ៦,៩០ ពាន់លានដុល្លារ ថយចុះ ៣,៩ អចលនទ្រព្យ ប្រមាណ ៦,២០ ពាន់​លានដុល្លារ កើន ១៧,៨% កសិកម្មប្រមាណ ៥,៩២ ពាន់លានដុល្លារ ថយចុះ ០,៩% សេវាកម្មប្រមាណ ៤,៨៨ ពាន់​លានដុល្លារ ថយចុះ ៥,៨% កម្មន្តសាលប្រមាណ ២,៥៨ ពាន់លានដុល្លារ កើន ៥% អង្គភាពគ្រួសារ ប្រមាណជាង ៦០០ លានដុល្លារ ធ្លាក់ចុះ ៦០,៤% និងផ្សេងប្រមាណជាង ១២ ពាន់លានដុល្លារ៕

អត្ថបទ៖ ឡេង ដេត