ក្រសួងឧស្សាហកម្មបន្ថែមសេវាឌីជីថលចំនួន៧ ដើម្បីផ្ត​ល់សេវាសាធារណៈឱ្យកាន់តែមានប្រសិទ្ធភាព

ដើម្បីបង្កើននូវ​ភាពងាយស្រួល ប្រសិទ្ធភាព និងតម្លាភាពនៃការផ្តល់សេវា និងការទទួលសេវាសាធារណៈ​ និងកាត់បន្ថយការលំបាកសម្រាប់ប្រជាពលរដ្ឋ និងធុរជន​ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (MISTI) បានដាក់ឱ្យដំណើរការសេវាសាធារណៈចំនួន ៧ បន្ថែមទៀត នៅលើប្រព័ន្ធផ្តល់សេវាសាធារណៈឌីជីថលរបស់ខ្លួន។

ការដាក់បន្ថែមនូវប្រព័ន្ធ​សេវាឌីជីថលនៃត្រូវបានប្រ​កាសដាក់ឱ្យ​ដំណើការជាផ្លូវការកាលពីថ្ងៃ​ទី៦ ខែមករា ដែលសេវាដែលទើបដាក់ឱ្យដំណើរការថ្មីលើប្រព័ន្ធឌីជីថលនេះ រួមមាន ៤ សេវាស្តីពីការចុះបញ្ជីផលិតផលយានយន្ត និងគ្រឿងបន្លាស់, ២ សេវាស្តីពីការចុះបញ្ជីឧបករណ៍មាត្រាសាស្ត្រ និង ១ សេវាស្តីពីការចុះបញ្ជីអង្គភាពវាយតម្លៃភាពអនុលោម។ សេវាសាធារណៈទាំង ៧ នេះបំពេញបន្ថែមលើការដាក់ឱ្យដំណើរការប្រព័ន្ធផ្តល់សេវាសាធារណៈឌីជីថលរបស់ក្រសួង ដែលបានចាប់ផ្តើមដំណាក់កាលទីមួយនៅឆ្នាំ២០២៤ និងរួមមានសេវាស្នើសុំប្រកាសបង្កើតសហគ្រាសធុនតូចនិងមធ្យម និងសិប្បកម្ម, សេវាស្នើសុំវិញ្ញាបនបត្រដំណើរការសហគ្រាសធុនតូចនិងមធ្យម និងសិប្បកម្ម (ថ្មី/បន្ត), និងសេវាស្នើសុំប្រកាសបង្កើតរោងចក្រ។

MISTI បានគូសបញ្ជាក់ថា៖«ការពង្រីកប្រព័ន្ធផ្តល់សេវាសាធារណៈឌីជីថលនេះជាជំហានថ្មីមួយទៀត នៅក្នុងបេស​កកម្មរបស់ក្រសួង ក្នុងការផ្តល់សេវាសាធារណៈដែលលឿន ងាយស្រួល និងមានប្រសិទ្ធភាពខ្ពស់។ ក្រសួងនឹងបន្តពង្រីកប្រព័ន្ធឌីជីថលនេះដោយបញ្ជូលសេវាជាបន្តបន្ទាប់ទៀត ដើម្បីបង្កើនតម្លាភាព និងគណនេយ្យភាព ព្រមទាំងលើកកម្ពស់ភាពងាយស្រួលក្នុងការប្រើប្រាស់សម្រាប់គ្រប់ភាគីពាក់ព័ន្ធទាំងអស់»។

បើយោងតាម MISTI ជាមួយនឹងការបញ្ចូលសេវាបន្ថែមទៅក្នុងប្រព័ន្ធឌីជីថលនេះ ក្រសួង​ បានធ្វើបរិវត្តកម្មឌីជីថលសេវាសាធារណៈសំខាន់ៗចំនួន ១៥ របស់ខ្លួន ដែលគ្របដណ្តប់អគ្គនាយកដ្ឋានឧស្សាហកម្ម, អគ្គនាយកដ្ឋានសហគ្រាសធុនតូចនិងមធ្យម និងសិប្បកម្ម, វិទ្យាស្ថានស្តង់ដារកម្ពុជា, មជ្ឈមណ្ឌលជាតិមាត្រវិទ្យាកម្ពុជា, និងអគ្គនាយកដ្ឋានវាយតម្លៃទទួលស្គាល់។

ក្រសួងក៏បានដាក់ឱ្យដំណើរការមុខងារស្វែងរកព័ត៌មានបន្ថែមនៅលើគេហទំព័ររបស់ខ្លួន ដែលសាធារណជនអាចស្វែងរកព័ត៌មានស្តីពីការចុះបញ្ជីផលិតផល (ច.ប.ផ) និងស្វែងរកព័ត៌មានស្តីពីស្តង់ដារកម្ពុជា (CS)។

«បរិវត្តកម្មឌីជីថលសេវាសាធារណៈរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ គាំទ្រគោលដៅយុទ្ធសាស្ត្ររបស់រាជរដ្ឋាភិបាលកម្ពុជា ក្នុងការប្រើប្រាស់បច្ចេកវិទ្យាសម្រាប់ការពង្រឹងអភិបាលកិច្ច និងជំរុញកំណើនសេដ្ឋកិច្ច ដោយសម្រួលការឈានចូលទៅ​ក្នុងប្រព័ន្ធផ្លូវការ កាត់បន្ថយនីតិវិធីដោយដៃ តម្រូវការនៃការជួបផ្ទាល់ និងពេលវេលាផ្តល់-ទទួលសេវា និងសម្រួលដល់ការទូទាត់ថ្លៃសេវា»។ នេះបើយោងតាមការលើកឡើងរបស់ MISTI៕