ការដោះដូរពាណិជ្ជកម្មកម្ពុជា-ចិនសម្រេចបានជាង១៥ ពាន់លានដុល្លារក្នុងឆ្នាំ២០២៤

ទំហំពាណិជ្ជកម្មទ្វេរភាគីរវាងកម្ពុជា-ចិនសម្រេចបានជាង១៥ ពាន់លានដុល្លារក្នុងឆ្នាំ២០២៤ កើនឡើងជិត២៤ភាគរយ បើធៀបនឹងរយៈពេលដូចគ្នាកាលពីឆ្នាំ ២០២៣ ដែលមានជាង ១២ ពាន់លានដុល្លារ។ នេះ​បើ​យោងតាម​អគ្គនាយកដ្ឋាន​គយ និង​​​រដ្ឋាករ​កម្ពុជា ​(GDCE)​។​

យោងតាម GDCE គិតចាប់ពីដើមខែមករា ដល់ដំណាច់ខែធ្នូឆ្នាំ​២០២៤កន្លងទៅនេះ កម្ពុជាបាននាំចេញទៅចិនសម្រេចបានជាង ១,៧៥ ពាន់លានដុល្លារ ​ កើនឡើង ១៨,៤ ភាគរយ​ ​ ខណៈការនាំចូលមានជាង ១៣,៤៣៩ ពាន់លានដុល្លារកើនឡើងប្រមាណ២៤,៦ភាគរយ។ សម្រាប់តុល្យភាពជញ្ជីងពាណិជ្ជកម្មនៅក្នុងឆ្នាំ២០២៤កន្លងមកនេះ គឺកម្ពុជាមានឱនភាព រហូតទៅដល់ជាង ១១,៦៨៩ ពាន់លានដុល្លារ។

លោកអ្នកឧកញ៉ា លឹម ហេង​ អនុប្រធាន​សភាពាណិជ្ជកម្ម​កម្ពុជា បាន​និយាយលើកឡើងថាចាប់តាំងពីប្រទេសទាំងពីរបានអនុវត្តន៍នូវកិច្ចព្រមព្រៀងពាណិជ្ជកម្មសេរីទ្វេភាគីក្នុងរយៈពេលប៉ុន្មានឆ្នាំមកនេះ ទាំងការដោះដូរទំនិញ និងការលំហូរវិនិយោគមានកំណើនជាលំដាប់។

លោកអ្នកឧកញ៉ាបានថ្លែងថា៖«យើងសង្កេតឃើញថាផលិតផលរបស់កម្ពុជា ជាពិសេសគឺផលិតផលកសិកម្មជាច្រើនត្រូបាននាំចេញទៅកាន់ទីផ្សារចិន ខណៈដែលយើងក៏បានទាក់ទាញទាំងអ្នកវិនិយោគិនចិន និងប្រទេសដទៃទៀតមកវិនិយោគសម្រាប់នាំចេញទៅចិនផងដែរ។

ពាក់ព័ន្ធនឹងឱនភាពពាណិជ្ជកម្មដែលកម្ពុជាមានច្រើនជាមួយប្រទេសចិនមានទំហំច្រើននោះ លោកអ្នកឧកញ៉ា លឹម ហេងបានបញ្ចាក់ថា​ ដោយសារតែប្រទេសចិនជាប្រទេសដែលផ្គត់ផ្គង់វត្ថុធាតុដើមសម្រាប់វិស័យកាត់ដេរនៅតាមបណ្តារោងចក្រនានា ​​។

លោកអ្នកឧកញ៉ា ថា លើសពីនោះទៅទៀត ចិនក៏ជាប្រភពនៃអ្នកផ្គត់ផ្គង់សំភារៈសំណង់ដ៏ធំមួយរបស់កម្ពុជាផងដែរ ស្របពេលដែលផលិតផលចំណីអាហារនិងម្ហូបមួយចំនួនក៏ត្រូវបានកម្ពុជានាំចូលដើម្បីបំពេញសេចក្តីត្រូវការក្នុងស្រុកផងដែរ។

លោក ហុង វណ្ណៈ អ្នកជំនាញ​សេដ្ឋកិច្ច​នៃ​រាជបណ្ឌិត្យសភាកម្ពុជា បាន​ប្រាប់​កម្ពុជាថ្មីកាលពេលថ្មីៗនេះ​ថា រហូតមកទាល់បច្ចុប្បន្ន​ការនាំចេញ​របស់​កម្ពុជា​ទៅ​ប្រទេស​ចិន​កំពុង​កើនឡើងជារៀងរាល់ឆ្នាំ ស្របពេលដែលប្រទេសទាំងពីរបានកំពុងអនុវត្តន៍នូវកិច្ចព្រមព្រៀងពាណិជ្ជកម្មសេរីដែលមុខទំនិញកម្ពុជាកាន់តែច្រើនត្រូវបាននាំចេញទៅកាន់ទីផ្សារដ៏ធំជាងគេនៅអាស៊ីមួយនេះ។​

​​លោកថា​៖«​ស្របពេលដែលកម្ពុជាកំពុងពង្រីកការនាំចេញទៅកាន់ទីផ្សារចិន យើង​ក៏ត្រូវ​ខិតខំ​ពង្រឹងសមត្ថភាព​ផលិតកម្ម​របស់ខ្លួន​ឱ្យបាន​ខ្លាំង និង​កាន់តែសម្បូរបែប ដើម្បី​លើកកម្ពស់ការនាំចេញឱ្យកាន់តែច្រើន​»​។​

​​កន្លងមក​លោក ឃឹម ហ្វីណង់ រដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ផលិត​ផល​កសិផលជាច្រើនត្រូវបាននាំទៅកាន់ទីផ្សារប្រទេសចិន ដូចជាអង្ករ ដំឡូងមី ម្រេច មៀន​ប៉ៃលិន ស្វាយ ចេកជាដើម។ លោក ឃឹម ហ្វីណង់ បញ្ជាក់ថា ការនាំចេញទៅទីផ្សារបរទេសកើនឡើង ដោយ​សារ​កម្ពុជាបើកទីផ្សារថ្មីដូចជាប្រទេសចិនជាដើម៕

​​