ព័ត៌មានអន្ដរជាតិ

តម្លៃប្រេងធ្លាក់ចុះនៅថ្ងៃបញ្ចប់ការជួញដូរ ប៉ុន្តែកើនឡើងក្នុងអត្រាប្រចាំសប្ដាហ៍ មុនត្រាំឡើងកាន់អំណាច

បានផុស

២ years មុន

នៅ

ថ្ងៃសៅរ៍ ១៨ មករា ២០២៥

ដោយ

តម្លៃប្រេងបានធ្លាក់ចុះកាលពីថ្ងៃសុក្រ ដែលជាថ្ងៃបញ្ចប់ការជួញដូរ ប៉ុន្តែកើនឡើងក្នុងអត្រាប្រចាំសប្ដាហ៍ ដោយសារតែទណ្ឌកម្មរបស់អាមេរិកលើរុស្ស៊ី ដែលបង្កើនក្ដីបារម្ភពីការរំខានផ្នែកផ្គត់ផ្គង់។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃប្រេងឆៅនាពេលអនាគត ម៉ាក Brent បានធ្លាក់ចុះ ៥០ សេន ឬ ០,៦ ភាគរយ ដោយបញ្ចប់ការជួញដូរនៅតម្លៃ ៨០,៧៩ ដុល្លារ/បារ៉ែល ប៉ុន្តែបានកើនឡើង ១,៣ ភាគរយ នៅសប្ដាហ៍នេះ។ ចំណែកឯតម្លៃប្រេងឆៅអាមេរិក ម៉ាក West Texas Intermediate (WTI) វិញ បានធ្លាក់ចុះ ៨០ សេន ឬ ១ ភាគរយ ដោយជួញដូរនៅតម្លៃ ៧៧,៨៨ ដុល្លារ/បារ៉ែល ប៉ុន្តែបានកើនឡើង ១,៧ ភាគរយ ក្នុងអត្រាប្រចាំសប្ដាហ៍។

អ្នកជំនាញលើកឡើងថា កំណើនប្រចាំសប្ដាហ៍បណ្ដាលមកពីទណ្ឌកម្មទ្រង់ទ្រាយរបស់រដ្ឋបាលបៃដិនលើវិស័យប្រេងកាតរុស្ស៊ី ដែលធ្វើឱ្យប្រទេសអតិថិជនរុស្ស៊ីសំខាន់ៗរួមមានឥណ្ឌា និងចិន ងាកទៅរកប្រភពផ្គត់ផ្គង់ជំនួស ដែលជះឥទ្ធិពលសំខាន់លើតម្លៃប្រេង។

វិនិយោគិនក៏កំពុងរងចាំមើលគោលនយោបាយរបស់លោក ត្រាំ ដែលនឹងឡើងកាន់អំណាចនៅថ្ងៃចន្ទសប្ដាហ៍ក្រោយនេះផងដែរ ជាពិសេសគោលនយោបាយរបស់លោកចំពោះអ៊ីរ៉ង់ដែលជាប្រទេសនាំចេញប្រេងសំខាន់មួយទៀត។ លេខាធិការរតនាគារអាមេរិក ដែលលោក ត្រាំ តែងតាំង បាននិយាយថា ខ្លួនបានត្រៀមខ្លួនជាស្រេច ដើម្បីដាក់ទណ្ឌកម្មកាន់តែតឹងរ៉ឹងលើវិស័យប្រេងកាតរបស់រុស្ស៊ី ដែលការណ៍នេះអាចបន្តធ្វើឱ្យប្រេងឡើងថ្លៃ ទោះបីជាលោក ត្រាំ មានទំនោរបូមប្រេងបន្ថែមសម្រាប់ផលិតកម្មក្នុងស្រុកអាមេរិកក៏ដោយ។

ជាមួយគ្នានោះ វិនិយោគិនក៏សម្លឹងមើលកត្តាសំខាន់ៗផ្សេងទៀតដូចជាស្ថានការណ៍នៃតម្រូវការប្រេងសកល ឬកិច្ចព្រមព្រៀងបទឈប់បាញ់នៅហ្គាហ្សា ដែលអាចធ្វើឱ្យហានិភ័យនៃការរំខានផ្នែកផ្គត់ផ្គង់ប្រេងស្រកស្រាន្តជាដើម៕

Related Topics:តម្លៃប្រេងពិភពលោក