សេដ្ឋកិច្ច

លោក ទៀ ស្យាម៖ ប្រព័ន្ធចែកចាយប្រេង មិនត្រូវបានរចនាឡើង សម្រាប់ឱ្យមនុស្សទាំងទីក្រុង បើកឡានទៅចាក់ប្រេង ក្នុងពេលតែមួយទេ

បានផុស

៤ ខែ មុន

នៅ

ថ្ងៃពុធ ៤ មីនា ២០២៦

ដោយ

លោក ទៀ ស្យាម ប្រធានក្រុមប្រឹក្សាភិបាល នៃក្រុមហ៊ុន ភីស ភេត្រូលៀម បានសរសេរនៅលើបណ្ដាញសង្គមហ្វេសប៊ុកផេកផ្លូវការនៅថ្ងៃពុធនេះថា ប្រព័ន្ធចែកចាយប្រេងមិនត្រូវបានរចនាឡើង សម្រាប់ឱ្យមនុស្សភ័យខ្លាច ហើយព្យាយាមស្តុកប្រេងទុកដោយខ្លួនឯងនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ទៀ ស្យាម បានលើកឡើងបែបនេះ បន្ទាប់ពីមានការព្រួយបារម្ភពីការកើនឡើងតម្លៃប្រេងនៅកម្ពុជា ដោយសារសង្គ្រាមនៅតំបន់មជ្ឈឹមបូព៌ា ខណៈកម្ពុជាមិនមែនជាប្រទេសផលិតប្រេងពោលគឺពឹងផ្អែកលើការនាំចូល។

លោកបន្ថែមថា ប្រសិនបើយើងស្តុកប្រេងទុក វានឹងធ្វើឱ្យប្រេងនៅស្ថានីយអស់មុនពេលវេលាដែលត្រូវបានគ្រោងទុកសម្រាប់ការផ្គត់ផ្គង់។ ប្រព័ន្ធនេះត្រូវបានរចនាឡើង សម្រាប់ការប្រើប្រាស់ធម្មតា មិនមែនសម្រាប់ឱ្យមនុស្សទាំងទីក្រុងបើកឡានទៅចាក់ប្រេងពេលតែមួយទេ។

លោក ទៀ ស្យាម បញ្ជាក់ថា៖ «ការភ័យខ្លាច នឹងធ្វើឱ្យមនុស្សចាប់ផ្តើមស្តុកប្រេងទុក ហើយបើស្តុកប្រេងទុក នឹងធ្វើឱ្យស្ថានីយប្រេងខ្វះប្រេងជាបណ្តោះអាសន្ន»។

បើតាមលោក ទៀ ស្យាម បន្ទាប់មកភាពភ័យខ្លាចនឹងកាន់តែខ្លាំងឡើង ហើយតម្លៃប្រេងនឹងឡើងតាមប្រព័ន្ធទីផ្សារ ព្រោះតម្រូវការកើនឡើង។ ពេលតម្លៃប្រេងឡើង ទំនិញផ្សេងៗក៏នឹងឡើងតម្លៃតាមផងដែរ។ ចុងក្រោយប្រជាជនគ្រប់គ្នានឹងត្រូវទិញទំនិញក្នុងតម្លៃថ្លៃជាងមុនដោយសារហេតុផលតែមួយគត់គឺ “ភាពភ័យខ្លាច”។

ក្នុងស្ថានភាពវិបត្តិបច្ចុប្បន្ន អ្វីដែលល្អបំផុតគឺរក្សាភាពធម្មតា កុំឱ្យភាពភ័យខ្លាចនាំឱ្យយើងធ្វើអ្វីដែលប៉ះពាល់ដល់ខ្លួនឯង។

លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម មានប្រសាសន៍ថា តម្លៃប្រេងនៅកម្ពុជា អាចនឹងកើនឡើងពី ៥% រហូតដល់ ២៥% អាស្រ័យលើទីផ្សារអន្តរជាតិ ក្នុងករណីតម្លៃប្រេងកើនឡើងខ្លាំង រាជរដ្ឋាភិបាលនឹងធ្វើការឧបត្ថម្ភធន ដើម្បីបញ្ចុះថ្លៃប្រេងដល់ប្រជាពលរដ្ឋ។

លោកបណ្ឌិត ជ័យ តិច អ្នកតាមដានភូមិសាស្ត្រនយោបាយ និងសេដ្ឋកិច្ច មានប្រសាសន៍ថា អ៊ីរ៉ង់បានប្រកាសបិទច្រកសមុទ្រ Hormuz ដែលជាច្រកដឹកប្រេងប្រមាណ ២០% សម្រាប់ផ្គត់ផ្គង់នៅលើពិភពលោក បន្ទាប់ពីការវាយប្រហាររបស់អ៊ីស្រាអែល និងអាមេរិក។

លោកបណ្ឌិត ជ័យ តិច បញ្ជាក់ថា តម្លៃប្រេងនឹងកើនឡើងជិត ១០០ ដុល្លារ ក្នុងមួយបារ៉ែល ប្រសិនបើសង្គ្រាមអូសបន្លាយយូរ នាំឱ្យកើតមានអតិផរណា៕

អត្ថបទ៖ ឡេង ដេត