ព័ត៌មានអន្ដរជាតិ

ការបិទរោងចក្រនៅថៃ ទំនងកាន់តែធ្ងន់ធ្ងរទៅៗឆ្នាំនេះ

បានផុស

១ year មុន

នៅ

ថ្ងៃចន្ទ ១០ កុម្ភៈ ២០២៥

ដោយ

មជ្ឈមណ្ឌលស្រាវជ្រាវ Kasikorn (K-Research) បានឱ្យដឹងថា ស្ថានភាពនៃការបិទរោងចក្រនៅក្នុងប្រទេសថៃអាចនឹងកាន់តែធ្ងន់ធ្ងរទៅៗឆ្នាំនេះ ដោយសារតែការធ្លាក់ចុះនៃវិស័យផលិតកម្ម និងបញ្ហាប្រឈមសេដ្ឋកិច្ចដែលកំពុងបន្ត។ នេះបើតាមការចុះផ្សាយរបស់កាសែតបាងកកប៉ុស្តិ៍កាលពីសប្ដាហ៍មុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមមជ្ឈមណ្ឌលស្រាវជ្រាវដដែល អត្រានៃការបិទរោងចក្រគឺខ្ពស់ជាង ១០០/ខែ កាលពីឆ្នាំ ២០២៤ ដែលជាអត្រាខ្ពស់ជាង ១០០/ខែ ២ ឆ្នាំជាប់ៗគ្នា។ ក្នុងនោះ ការបិទនៃសហគ្រាសធុនតូច និងមធ្យម (SMEs) មានច្រើនជាងគេ ដោយសារតែកម្សោយនៃមូលធន។

ជាមធ្យម ក្រុមហ៊ុនដែលបិទរោងចក្រនៅឆ្នាំ ២០២៤ មានដើមទុនតិចជាង ៣,៨ ដង ធៀបនឹងរោងចក្រដែលបានបិទនៅឆ្នាំ ២០២៣។

ចាប់ពីឆ្នាំ ២០២១ ដល់ឆ្នាំ ២០២២ មានការបិទរោងចក្រចំនួន ៤ ៨៥៥ និងរោងចក្របើកថ្មី ១ ៨១៨។ តួលេខនេះបង្ហាញថា ក្នុងរយៈពេល ២ ឆ្នាំ រោងចក្រប្រមាណ ១២៧ បានបិទទ្វារជាមធ្យមក្នុងមួយខែ។ ចាប់ពីឆ្នាំ ២០២៣ ដល់ឆ្នាំ ២០២៤ មានការបិទចំនួន ៤ ៣០២ និងរោងចក្របើកថ្មី ៣ ០៣៤។ នេះមានន័យថា រោងចក្រ ៥៣ បិទទ្វារ ជាមធ្យម/ខែ។

K-Research បានកត់សម្គាល់ថា ឧស្សាហកម្មគ្រឿងសង្ហារឹម គ្រឿងអេឡិចត្រូនិច កាត់ដេរ យានយន្ត និងដែកថែប បិទទ្វាររោងចក្រច្រើនជាងគេ។

កត្តាសំខាន់ៗដែលបង្កការបិទរួមមាន កំណើនសេដ្ឋកិច្ចថៃយឺតយ៉ាវ កម្សោយនៃការទិញ និងតម្រូវការក្នុងស្រុក បិងបញ្ហារចនាសម្ព័ន្ធក្នុងវិស័យផលិតកម្មដែលបន្តធ្វើឱ្យសមត្ថភាពប្រកួតប្រជែងរបស់សហគ្រាសធុនតូច និងមធ្យមក្នុងស្រុកចុះខ្សោយជាដើម។

ជាមួយគ្នានោះ ភាពតានតឹងពាណិជ្ជកម្មរវាងសហរដ្ឋអាមេរិក និងចិន តម្រូវការសកលទាប និងការប្រកួតប្រជែងកាន់តែខ្លាំងទាំងក្នុងស្រុក និងទំនិញនាំចូល ក៏បានធ្វើឱ្យប៉ះពាល់ដល់ការប្រកួតប្រជែងរបស់ប្រតិបត្តិករអាជីវកម្មថៃផងដែរ៕